ПСАЛТЫР 55 - Біблія (пераклад А.Бокуна) Біблія (пераклад А.Бокуна)
ПСАЛТЫР 55

¹ Кіраўніку хору: на струнных інструмэнтах. Навучаньне Давіда.

² Прыхілі вуха, Божа, да малітвы маёй і не хавайся ад маленьня майго!

³ Зваж на мяне і адкажы мне; я стогну ў тузе маёй і енчу

⁴ ад голасу ворага, ад уціску бязбожніка, бо злачынства закідаюць мне і ў гневе змагаюцца са мною.

⁵ Сэрца маё трапеча ў-ва мне, і жахі сьмерці напалі на мяне;

⁶ страх і дрыжаньне прыйшлі на мяне, і трывога ахапіла мяне.

⁷ І я сказаў: «Хто дасьць мне крылы, як у голуба! Я паляцеў бы і супачыў!

⁸ Вось, уцёк бы далёка і жыў бы ў пустыні». (Сэлях)

⁹ Я б сьпяшаўся, каб схавацца перад ветра віхурай, перад бурай!

¹⁰ Вынішчы іх, Госпадзе, падзялі мову ім, бо я бачыў крыўды і спрэчкі ў горадзе.

¹¹ Дзень і ноч яны ходзяць па мурах ягоных наўкола, злачынства і ліхоцьце ў сярэдзіне яго.

¹² Загуба ў сярэдзіне яго, і не зыходзяць з плошчаў ягоных ашуканства і здрада.

¹³ Бо ня вораг мяне зьневажае, я дараваў бы [гэта], ня той, што мяне ненавідзіць, узьвялічваецца супраць мяне, ад яго б я схаваўся,

¹⁴ але ты, чалавек, як я, сябра мой і знаёмы мой,

¹⁵ з якім мы разам вялі шчырыя гутаркі, з якім у Дом Божы хадзілі ў грамадзе.

¹⁶ Няхай, зьнішчаючы, зьнішчыць іх сьмерць! Няхай зыйдуць жывыя ў пекла, бо ліхота [жыве] ў вандраваньні іхнім, у нутры іхнім.

¹⁷ А Я буду клікаць да Бога, і ГОСПАД збавіць мяне.

¹⁸ Увечары, і раніцаю, і ў белы дзень я буду енчыць і галасіць, і Ён пачуе голас мой.

¹⁹ Ён выбавіць душу маю, каб даць супакой ад [тых, што] варагуюць супраць мяне, бо шмат было тых, якія супраць мяне.

²⁰ Пачуе Бог, і ўпакорыць іх Той, Які жыве спрадвеку. (Сэлях) Бо няма ў іх паправы, і яны не баяцца Бога,

²¹ руку сваю выцягваюць на тых, што з імі ў супакоі жылі, і парушаюць запавет свой;

²² гладкія, як тое масла, вусны ягоныя, а ў сэрцы — варожасьць; словы ягоныя лагаднейшыя за алей, але яны — мячы аголеныя.

²³ Ускладзі бярэмя тваё на ГОСПАДА, і Ён паклапоціцца пра цябе; ня дасьць Ён ніколі, каб пахіснуўся праведнік.

²⁴ І Ты, Божа, іх кінеш у ямы парахненьня; людзі крыважэрныя і падступныя не [дажывуць] паловы дзён сваіх. А я на Цябе спадзяюся!