ПСАЛТЫР 107 - Біблія (пераклад В. Сёмухі) Біблія (пераклад В. Сёмухі)
ПСАЛТЫР 107

¹ Песьня. Псальма Давідава.

² Гатовае сэрца маё, Божа, гатовае сэрца маё; буду пяяць і апяваць у славе маёй.

³ Паўстань, псалтыр і арфа! Я ўстану рана.

⁴ Славіць буду Цябе, Госпадзе, сярод народаў; славіць буду Цябе, сярод плямёнаў,

⁵ бо вышэй за нябёсы ласка Твая і ў пазахмар'і праўда Твая.

⁶ Узьнясіся вышэй за нябёсы, Божа; і над усёю зямлёю будзе слава Твая,

⁷ каб вызваліліся аблюбенцы Твае: уратуй правіцай Тваёю, і пачуй мяне.

⁸ Бог сказаў у сьвятыні Сваёй: няхай разьвесялюся - падзялю Я Сіхем, і даліну Сукот абмераю.

⁹ Мой Галаад, Мой Манасія, Яфрэм крэпасьць Маёй галавы, Юда скіпетр Мой,

¹⁰ Мааў умывальная шаля Мая, на Эдом абуткам кіну Маім, над зямлёю Філістымскаю клікаць буду.

¹¹ Хто ўвядзе мяне ў горад умацаваны? Хто давядзе мяне да Эдома?

¹² Ці ня Ты, Божа, Які нас адкінуў, і ня выходзіш, Божа, з войскам нашым?

¹³ Падай дапамогу нам ва ўціску, бо абарона людзкая - марнота.

¹⁴ З Богам мы выявім сілу; Ён скіне ворагаў нашых.