ПСАЛТЫР 106 - Біблія (пераклад В. Сёмухі)

Пс 106

¹ Алілуя. Слаўце Госпада, бо Ён добры, бо навечна літасьць Ягоная!

² Так хай скажуць уратаваныя Госпадам, як іх збавіў Ён ад рук ворага

³ і сабраў з краін, ад усходу і захаду, ад поўначы і мора.

⁴ Яны блукалі ў пустыні бязьлюднымі шляхамі, і не знаходзілі населенага горада;

⁵ цярпелі голад і смагу, душа іхняя тлелася ў іх.

⁶ Але паклікалі Госпада ў скрусе сваёй, і Ён выбавіў іх ад нягодаў іхніх,

⁷ і павёў іх простай дарогай, каб яны ішлі да населенага горада.

⁸ Хай славяць Госпада за ласку Ягоную і за дзівосныя дзеі Ягоныя для сыноў чалавечых:

⁹ бо Ён спатоліў душу спрагненую, і душу сьмяглую напоўніў дабром.

¹⁰ Яны сядзелі ў цемры і ў засені сьмяротнай, скаваныя скрухаю і жалезам;

¹¹ бо не ўпакорваліся словам Божым і волю Ўсявышняга занядбалі.

¹² Ён упакорыў ім сэрца працаю; і яны зьнемаглі, і ня было памочніка.

¹³ Але паклікалі Госпада ў скрусе сваёй, і Ён выратаваў іх ад бедстваў іхніх,

¹⁴ вывеў іх зь цемры і засені сьмяротнай, і разарваў іхнія путы.

¹⁵ Хай славяць Госпада за ласку Ягоную і за цудоўныя справы Ягоныя для сыноў чалавечых:

¹⁶ бо Ён разбурыў браму медную, і жалезныя кайданы паламаў.

¹⁷ Неразумныя цярпелі за беззаконныя шляхі свае і за няпраўды свае;

¹⁸ усякаю ежаю грэбавала душа іх, і яны набліжаліся да брамы сьмерці.

¹⁹ Але паклікалі Госпада ў скрусе сваёй, і Ён уратаваў іх у іхняй нягодзе;

²⁰ паслаў слова Сваё, і ацаліў іх, і выбавіў іх ад магілаў іхніх.

²¹ Хай славяць Госпада за ласку Ягоную і за цудоўныя дзеі Ягоныя сынам чалавечым!

²² Хай прыносяць Яму ахвяру хвалы, і хай абвяшчаюць пра справы Ягоныя песьняю!

²³ Хто выпраўляецца на караблях у мора, хто справы ўчыняе на водах вялікіх, -

²⁴ бачыць Гасподнія дзеі і цуды Ягоныя ў бездані:

²⁵ Ён маўляе, - і паўстае буйны вецер, і высока падымае хвалі яго:

²⁶ узыходзяць да неба, ападаюць у бездань; душа іхняя растае ў нягодах;

²⁷ яны кружацца і хістаюцца, нібы п'яныя, і ўся мудрасьць іхняя зьнікае.

²⁸ Але паклікалі Госпада ў скрусе сваёй, і Ён вывеў іх зь нягодаў іхніх.

²⁹ Ён ператварае буру ў цішыню, і хвалі сунімаюцца.

³⁰ І радуюцца, што яны суцішыліся, і Ён прыводзіць іх да жаданае прыстані.

³¹ Хай славяць Госпада за ласку Ягоную і за дзівосныя дзеі Ягоныя сынам чалавечым!

³² Хай славяць Яго на сходзе народным, і хай славяць Яго ў гурце старэйшынаў!

³³ Ён ператварае рэкі ў пустыню і крыніцы вады - у сушу,

³⁴ зямлю пладавітую - у саланчак, за бязбожнасьць тых, што жывуць на ёй.

³⁵ Ён ператварае пустыню ў возера, і зямлю высахлую - у крыніцу вады;

³⁶ і пасяляе там спрагненых, і яны будуюць горад, каб жыць у ім;

³⁷ засяваюць палеткі, садзяць вінаграднікі, якія родзяць ім багатыя плады.

³⁸ Ён дабраслаўляе іх, і яны вельмі памнажаюцца, і ў іх быдла ня менее.

³⁹ Паменшыліся яны, і ўпалі ад прыгнёту, гароты і скрухі;

⁴⁰ Ён вылівае зьнявагу на князёў, і пакідае іх блукаць у пустыні, дзе дарог няма.

⁴¹ А гаротнага выцягвае з гароты, і род ягоны памнажае, як статак авечак.

⁴² Праведнікі бачаць гэта, і радуюцца, а ўсякае няверства засланяе вусны свае.

⁴³ Хто мудры, той заўважыць гэта, і зразумее ласку Госпада.