1 КАРЫНФЯНАЎ 8 - Біблія (пераклад А.Бокуна) Біблія (пераклад А.Бокуна)
1 КАРЫНФЯНАЎ 8

¹ Адносна ахвяраў ідалам мы ведаем, бо маем усякае веданьне. Але веданьне робіць ганарыстым, а любоў будуе.

² А калі хто думае, што ён нешта ведае, той яшчэ нічога не разумее, як трэба разумець.

³ А калі хто любіць Бога, той мае разуменьне ад Яго.

⁴ Дык адносна ежы, ахвяраванай ідалам, мы ведаем, што ідал у сьвеце — нішто, і што няма іншага Бога, акрамя Аднаго.

⁵ Бо хаця і ёсьць гэтак званыя богі, ці ў небе, ці на зямлі, бо ёсьць шмат багоў і шмат гаспадароў,

⁶ але ў нас адзін Бог Айцец, з Якога ўсё, і мы для Яго; і адзін Госпад Ісус Хрыстос, праз Якога ўсё, і мы праз Яго.

⁷ Але не ў-ва ўсіх такое веданьне; некаторыя і дагэтуль з сумленьнем, [якое прызнае] ідалаў, і ядуць [ахвяраванае ідалам] як ахвяры ідалам, і слабое сумленьне іхняе апаганьваецца.

⁸ А ежа не набліжае нас да Бога, бо ані калі ямо, не набываем, ані калі не ямо, не губляем.

⁹ Але глядзіце, каб вашая ўлада ня сталася спатыкненьнем для нядужых.

¹⁰ Бо калі хто ўбачыць, што ты, які маеш веданьне, узьлягаеш у паганскай бажніцы, ці сумленьне яго, як слабога, не збудуецца, каб есьці ахвяры ідалам?

¹¹ І праз тваё веданьне загіне нядужы брат, за якога памёр Хрыстос.

¹² А гэтак грэшачы супраць братоў і б’ючы па слабым сумленьні іхнім, вы грашыцё суп­раць Хрыста.

¹³ Дзеля гэтага, калі ежа горшыць брата майго, ня буду есьці мяса давеку, каб ня горшыць брата майго.