ПСАЛТЫР 46 - Біблія (пераклад А.Бокуна) Біблія (пераклад А.Бокуна)
ПСАЛТЫР 46

¹ Кіраўніку хору. Сыноў Караха. На аламот. Сьпеў.

² Бог для нас — прыстанішча і моц, у бядзе ўспамога, якая заўсёды прыходзіць.

³ Дык ня будзем баяцца, хоць бы захісталася зямля і горы рушылі ў сэрца мора,

⁴ хоць бы раўлі і ўздымаліся воды ягоныя, хоць бы трэсьліся горы ад шалу яго. (Сэлях)

⁵ [Вось] рака, струмяні ейныя радуюць горад Божы, сьвятую сялібу Найвышэйшага.

⁶ Бог пасярод яго, дык ён не захістаецца; Бог дапаможа яму, як настане раніца.

⁷ Зараўлі народы, захісталіся валадарствы; Ён выдаў голас Свой, і зямля растапілася.

⁸ ГОСПАД Магуцьцяў з намі, умацаваны замак наш — Бог Якуба. (Сэлях)

⁹ Прыйдзіце, пабачце дзеі ГОС­ПАДА, якое спусташэньне Ён зрабіў на зямлі,

¹⁰ Ён войны спыняе аж да краю зямлі, крышыць лукі і дзіды расьсякае, калясьніцы паліць у агні.

¹¹ «Спыніцеся, пазнайце, што Я — Бог! Я буду ўзьвялічаны між народамі, буду ўзьвялічаны на зямлі!»

¹² ГОСПАД Магуцьцяў з намі, умацаваны замак наш — Бог Якуба! (Сэлях)