Lucas 10:16 - Qullan Arunaka DC

¹⁶ “¡Khititix jumanakar ist'ki ukax nayaruw ist'itu; khititix jumanakar jan katuqapktam ukanakasti nayaruw jan katuqkituti; nayar jan katuqirïki ukasti khithankitu ukaruw jan katuqkiti!”

Aymar Bibliia 1986

¹⁶ “¡Qhititejj jumanacar ist'qui ucajj nayaruw ist'itu; qhititejj jumanacar jan ist'apctam ucasti nayaruw jan ist'quituti; nayaru jan ist'irïqui ucasti qhitanquitu ucaruw jan ist'quiti!.”

Qullan Arunaca

¹⁶ “¡Qhititejj jumanacar ist'qui ucajj nayaruw ist'itu; qhititejj jumanacar jan ist'apctam ucasti nayaruw jan ist'quituti; nayaru jan ist'irïqui ucasti qhitanquitu ucaruw jan ist'quiti!.”

Lucas 10:16 Jak'a apnaqawi uñst'ayäwi

Éxodo 16:7

willjtarusti Tatitun jach'a kankañap uñjapxäta; jumanakan arusitanakam jupax ist'iwa. ¿Khitïpxarakta nanakasti, jumanakan nanakar k'umipxañamatakisti? —sasa.

Éxodo 16:8

Moisesasti saskakïnwa: —Jayp'thapiruw Tatitux manq'añatak aycha churapxätam, willjtarusti walja t'ant'a churapxarakïtam, sist'asiñkamaw manq'apxäta. Jupax jumanakan arusitanakam ist'iwa, ¿kunatarak nanakatak arusipxtasti? Janiw jumanakax nanakatak arusipktati jan ukasti Tatitutakiw tuqisipxtaxa —sasa.

Malaquías 1:6

Taqi ch'aman Tatitux sacerdotenakar akham siwa: “Wawanakax awkinakapar waqaychapxiwa, uywatanakas uywirinakaparux yäqapxarakiwa. Nayatix jumanakan awkimästa ukasti ¿kunatarak nayar jan waqaychapxistasti? Nayatix jumanakan uywirimästa ukasti, ¿kunatarak nayar jan yäqapxistasti? Jumanakax nayar jisk'achapxistawa, yatkasas sasipkakistawa: ‘¿Kun lurasarak nanakasti jumar jisk'achapxsmasti?’ sasa.

Números 14:11

Tatitusti Moisesarux sänwa: —¿Kunapachkamarak aka markasti nayar jisk'achaskakitanisti? ¿Kunapachkamarak nayat pächasisipkakini, jupanak taypin walja muspharkañanak lurkipansa?

Números 14:2

Jupanakax taqpachaniw Moisesampitaki, Aaronampitakix jan wal parlapxäna, akham sasa: “¡Egipto uraqinsa jiwaraskasäna, jan ukax, aka wasaransa jiwaraskasäna!

Números 16:11

Chiqpachansa janiw jumanakax Aaronatak arusipktati, jan ukasti, Tatituruw jumasa, masinakamas saykatapxtaxa —sasa.

Mateo 10:40

“Khititix jumanakar katuqapkätam ukanakax nayaruw katuqitu; khititix nayar katuqkitu ukax khithankitus ukaruw katuqi.

Mateo 18:5

Khititix sutixar aka wawarjam katuqkanixa, nayaruw katuqaskitu —sasa.

Marcos 9:37

—Khititix akham wawaru nayan sutixan katuqki ukaxa, nayaruw katuqitu; nayar katuqiristi, janiw nayarukit katuqki, jan ukasti khithankitu ukaruw katuqaraki —sasa.

Lucas 9:48

jupanakarusti sarakïnwa: —Khititix aka wawar sutixar katuqki ukax nayaruw katuqitu; khititix nayar katuqkitu ukasti khithankitu ukaruw katuqaraki. Ukhamasti khititix jumanak taypin juk'amp jisk'äki ukaw jach'ar tukuyatäni —sasa.

Juan 12:44

Jesusax jach'at arsusin jupanakarux säna: “Khititix nayar iyawskitu ukax, khithankitu uka Awkixaruw iyawsaraki.

Juan 12:48

Khititix nayar jisk'achkitu, ukatsti janirak arunakaxarjam lurki ukatakixa, niyaw juchañchiripax utjxi; kawkïr arunaktix nayax arskta ukanakaw qhipa urun jupar juchañchaskani.

Juan 13:20

Qhanak sapxsma, khititix nayar khithankitu ukar katuqixa, nayaruw katuqitu; nayar katuqiristi, khithankitu ukaruw katuqaraki” sasa.

Hechos 5:4

¿Janit uka uraqisti jumankkänsti? Aljstaxa, ¿janit uka qullqix jumankkarakïnxa? ¿Kunatarak akham lurañ amttasti? Chiqpachansa, janiw jaqinakar k'arintktati, jan ukasti Diosaruw k'arinttaxa —sasa.

Gálatas 4:14

Uka usuxax jumanakatak mä yant'äkaspas ukhamänwa, ukampis janiw janchin usuta uñjasitax layku jisk'achapkistati, janirakiw apanukupkistasa. Ukatsipana, Diosan angelapäkiristsa, jan ukax, pachpa Jesucristökiristsa ukham katuqapxistaxa.

1 Tesalonicenses 4:8

Ukhamasti khititix aka yatichäwir jisk'achki ukax janiw khiti jaqirus jisk'achkiti, jan ukasti Diosaruw jisk'achaski, khititix Qullan Ajayup churkistu ukaru.