Jeremías 22:3 - Qullan Arunaka DC

³ Aka chiqansti kunatix chiqapäki, askïkaraki uk lurapxam, t'aqhisiyatarusti t'aqhisiyiripat qhispiyapxam, yaqha markat jutirinakarusti jan jisk'achapxamti, wajchanakaru, ijma warminakarus janirak kuna jan walsa lurapxamti. Jan juchan jaqinakarusti jan jiwayapxamti.

Aymar Bibliia 1986

³ Aca chekansti cunatejj chekapäqui, uqhamaraqui asquïqui uca lurapjjam, t'akhesiyatarusti t'akhesiyiripat khespiyapjjam, yakha marcat jutirinacarusti janiraqui jisc'achapjjamti, ni cuna jan walsa lurapjjaraquimti, wajchanacarusa, ijma warminacarusa. Jan juchani jakenacarusti janiraqui jiwayapjjamti.

Qullan Arunaca

³ Aca chekansti cunatejj chekapäqui, uqhamaraqui asquïqui uca lurapjjam, t'akhesiyatarusti t'akhesiyiripat khespiyapjjam, yakha marcat jutirinacarusti janiraqui jisc'achapjjamti, ni cuna jan walsa lurapjjaraquimti, wajchanacarusa, ijma warminacarusa. Jan juchani jakenacarusti janiraqui jiwayapjjamti.

Jeremías 22:3 Jak'a apnaqawi uñst'ayäwi

2 Samuel 23:3

Israelan Diosapaw arsu; Israelar arxatiriw sarakitu: ‘Khititix jaqinakar chiqa kankañamp apnaqkani, khititix Diosar axsartas apnaqkani ukaxa,

Job 22:9

Ijma warminakarux uksak khithanukurïtaxa, wajcha wawanakarusti t'aqhisiyirïtawa.

Job 24:9

Ijma warminakat asu wawanakap aparapxi, pisin jakasirinakat qullqi manutsa isinakap lluch'supxi.

Salmos 68:5

5 (6) Diosax wajchanakan awkipawa, ijma warminakan arxatiripawa, jupax qullan utjäwipan jaki.

Salmos 82:4

¡Jan yäqat jaqiru, jan kunan jaqinakar qhispiyapxam, ñanqha lurir jaqinakat arxatapxam!

Salmos 94:21

aski jaqir ñanqha lurañ amtirinakampi, jan juchan jaqir jiwayañatak juchañchirinakampi.

Salmos 94:6

Ijma warminakaruw jiwayapxi, qurpachayasir jaqinakaruw jiwayapxi, wajchanakaruw jiwayapxi,

Éxodo 22:21

21 (20) “Janiw yaqha markat jutir jaqirux t'aqhisiyätati, janirakiw llakisiyätasa, jumanakax Egipto markan yaqha markankir jaqinakäpxarakïyätawa.

Éxodo 22:22

22 (21) “Janiw ijma warminakarusa, wajchanakarus t'aqhisiyätati,

Proverbios 23:10

Nayra pacha uchat qurpanak jan jithiyamti, janirak wajchanakan uraqip katuntasimti;

Proverbios 6:17

Jach'a jach'a tukuñanakaru, k'ari parlañanakaru, jan juchan jaqi jiwayañanakaru,

Isaías 1:23

Jilïr apnaqirinakamas nayatak sayt'asirkamakiwa, lunthatanakampis suman jakasipxi. Taqinis qullqi chilltayasirkamakiwa, waxt'äwinak katuqañak munasipki. Wajcharux janiw chiqapar uñjapkiti, ijma warminakarus janirakiw chiqapar uñjapkiti.

Isaías 58:6

chiqpachansa janiw ukax ukhamäkiti. Kawkïri ayunotix kusisiykitu ukax akawa: ina ch'usat katuntatanakar antutxañawa, t'aqhisiyatanakar antutxañawa, jan suman uñjañanak apanukxañawa;

Isaías 58:7

manq'at awtjatarux manq'a churañawa, jan utaninakarusti utamar katuqañawa, jan isinirux ist'ayañawa, jaqi masirusti yanapt'añarakiwa.

Jeremías 19:4

Israelitanakax nayarux apanukupxituwa, aka uraqsti yaqha uraqiruw tukuyapxaraki, aka chiqan yaqha diosanakar inciensonak luqtasipxaraki, uka diosanaksti janiw jupanakax uñt'apkänti; janirakiw nayra awkinakapasa, Judá uraqinkir reyinakas uñt'apkänti; aka chiqanarak jan juchan jaqinakarus jiwarayapxi.

Jeremías 22:17

“Ukampis jumax jan wali lurañanakampi jikxatatanakamatak llakistaxa; jan juchanirux jiwaytawa, markamankirinakarus ch'ama lurañanakampiw t'aqhisiyaraktaxa.”

Jeremías 26:16

Ukhamasti jilïrinakampi, jaqinakampisti sacerdotenakaru, profetanakaruw sapxarakïna: “Aka jaqir jiwayañatakix janiw kuna juchas utjkiti, Tatitu Diosan sutipxaruw jiwasarux parlaskistu” sasa.

Jeremías 5:28

wali lik'intatäpxiwa, jach'a jach'aw tukupxaraki. Ñanqha luratanakapasti waljapuniwa. Janiw wajcharux chiqapar uñjapkiti, janirakiw t'aqhin jakir jaqinakarus chiqapar uñjapkiti.

Jeremías 7:23

Ukampis jupanakarux nayar ist'apxañapatakiw mayta; ukhamat nayax jupanakan Diosapïrista, jupanakasti nayan markaxarakïspa sasa. Ukatsti sarakïyätwa kunjämtix nayax siskta ukarjam sarnaqapxañapa, ukhamat taqi kunas sumak sarañapataki.

Jeremías 9:24

24 (23) Maynitix jach'a jach'a tukuñ munchixa, nayar uñt'atapat jach'a jach'a tukpan, nayan Tatitütax yatitapata, aka uraqin munasiñampi, askimpi, chiqampi lurataxata, ukham luräwix wal kusisiyitu. Naya, Tatituw uk arsta.”

Lamentaciones 3:36

chiqapar uñjañäki uk maysar q'iwiñasa, Tatitux taqi ukanakarux juchañchiwa.

Ezequiel 18:12

pist'añan jakir jaqirus t'aqhisiyani, mayninakatsa lunthatani, manuniparus kuntix manu lanti katuqkatayna uksa jan kutt'aykani, uka k'ari diosanakar katuyasini, nayax uñiskta uka luräwinaksa lurarakini,

Ezequiel 18:7

janiw khitirus t'aqhisiykiti, jan ukasti manuniparux kuntix manu lanti katuqkatayna uksa kutt'ayxarakiwa; janiw khititsa lunthatkiti, manq'añapatsti khititix jan manq'añanïki ukarus churarakiwa, jan isinirusa ist'ayarakiwa;

Ezequiel 22:7

Jaqinakamasti janiw awkiparusa, taykaparusa suman uñjapkiti, yaqha markat jutiri jaqinakarus ñanqhachapxiwa, wajchanakarusa, ijma warminakarus inakiw irnaqayapxi.

Ezequiel 45:9

“Tatitux akham siwa: ¡Israel marka apnaqir jilïrinaka, ukkhakamaki! ¡Jan juk'ampi markaxar t'aqhisiykxapxamti, janirak inakis irnaqayaskxapxamti! ¡Taqi kunsa askiru, chiqapar lurapxam! ¡Jan juk'ampi markaxat uraqinakap lunthatkxapxamti! Naya, Tatituw uk mayipxsma.

Joel 3:19

19 (19) Judá markankir jaqinakar nuwapxatapata, markapan jan juchan jaqinakar jiwayapxatapatxa, Egipto markax ch'usa laqayanakar tukuyatäniwa, Edom uraqisti ch'usa wasarar tukuyatarakïniwa.

Levítico 19:15

“Kunapachatix mä jan walt'añ taripañas wakisini ukkhasti, kunatix chiqäki ukhamarjamapun luram; janirak pisi ch'amanirukisa, jan ukax qamirirukisa arxatamti. Juchañchañ wakisipanxa, kunatix chiqapäki ukhamarupun uñjam.

Amós 5:15

¡Jan walïki uk uñisipxam! ¡Sumäki uksti munapxam! Taripañ utanakan chiqapar uñjañax utjpan; inach taqi ch'amani Tatitux Israel markat jilt'irinakarux khuyapt'ayasispa.

Amós 5:24

Ukat sipana, chiqapar uñjäwix walja umanakjam jalpan, askin sarnaqañasti jalsur umjam jan tukuskirïpan.

Miqueas 3:11

Kunatix chiqäki ukanak uñjirinakasa qullqi chilltayasipxi, sacerdotenakas qullqi laykukiw yatichapxi, profetanakasti profecía arunakapxa aljapxarakiwa; taqi akanakatxa Tatitux walikiw siskaspasa ukhama. Ukatsti sapxarakiwa: “Tatituw jiwasampïski, janiw kuna jan walis jiwasxar jutkaniti” sasa.

Miqueas 6:8

Tatitux niyaw sistam, kunsa lurasma askïñatakixa, kunsa jupax jumat suyixa: askïñama, taqinirus chiqap uñjañam muni, Tatit Diosamarus alt'at chuymamampi yupaychañama.

Malaquías 3:5

Taqi ch'aman Tatitux siwa: “Nayaw jumanakar taripir jutä. Ukhamarus nayax uñjkta ukanak arsü khitinakatix layqasipki, yaqha warminakamp sarnaqapki, k'ari juramento lurapki, irnaqirinakarus sallqjapki, ijmanakarusa, wajchanakarus jachayapki, yaqha markat jutir jaqinakarus jan wal uñjapki, nayarus jan axsarapkituti ukanakatakiw arsurakï.

Mateo 23:23

“¡Kamachi yatichirinaka, fariseonaka, k'ari chuymaninaka; kamacht'apkakïta!, jumanakax menta, anís, comino uka achunakat sapa tunkat maya churapxtaxa, ukampis kamachin yatichäwiparux janiw yäqapktati: chiqapar uñjaña, khuyapayasiña, chiqpach jaqïña. Ukanak lurapxañamaw wakisixa, jan mayanak lurañ jaytanukusa.

Deuteronomio 10:18

Jupasti chiqa kankañampiw wajcharusa, ijmarusa uñji, jumanak taypin jakki uka jan uñt'at jaqirux munasiwa, manq'ayiwa, isi churaraki.

Deuteronomio 24:17

“Janiw yaqha markat jutir jaqinakarusa, wajchanakarus t'aqhisiyapxätati, janirakiw mayt'asir ijma warmitsa isipa apaqätati.

Deuteronomio 24:7

“Mayni israelit jaqirutix jila masipar t'aqhisiyat uywatar tukuyañataki, jan ukax aljañatak imantaskir katjatäni ukasti, uka jaqirux jiwañapatakiw juchañchasini, ukhamat jumanak taypit ñanqha lurañanak tukjañataki.

Deuteronomio 25:1

“Kunapachatix yaqhipanakax ch'axwañan sarnaqapkani ukkhaxa, jupanakax taripatäñatak jilïrinak nayraqatar uñstapxañapawa, ukatsti taripir jilïrinakaw juchan jaqir juchañchaskani, jan juchan jaqirus jan juchanirjamaw uñjarakini.

Deuteronomio 27:19

“ ‘Ñanqhachatäpan yaqha markat jutir jaqiru, mä ijmaru, mä wajcharus jan chiqa kankañampi uñjir jaqixa.’ Uka arsutarusti taqpach markaw sani: ‘Ukhamäpan’ sasa.

Santiago 1:27

Dios Awkir q'uma chuymampi arkañax akanakawa: Wajchanakaru, ijmanakaru, llakitanakar yanapt'aña, ukatsti akapach q'añu lurañanakampix janirak q'añuchasiña ukawa.