Proverbios 15:1 - Qullan Arunaca

¹ Suma arumpi cutt'ayañajja colerañjja apakewa, ucampis jan wali arumpi cutt'ayañajja, juc'ampwa colerasiyi.

Aymar Bibliia 1986

¹ Suma arumpi cutt'ayañajja colerañjja apakewa, ucampis jan wali arumpi cutt'ayañajja, juc'ampwa colerasiyi.

Qullan Arunaka DC

¹ Suma arumpi kutt'ayañax q'apisiñ chuyma llamp'uchi, jan wali arumpi kutt'ayañasti, q'apisiñ juk'amp naktayi.

Proverbios 15:1 Jak'a apnaqawi uñst'ayäwi

2 Samuel 19:43

Israelitanacasti ucjjarojj sapjjaraquïnwa: —Nanacajj jumanacat sipansa reyjjarojj tunca cuti derechonïpjjtwa. Uqhamarusa, nanacajj tribunacjamajja, jumanacan jilïri jilamjamäpjjtwa. Uqhamasti, ¿cunatsa nanacarojj jisc'achapjjesta? ¿Janit nanacasti nayrakata mayipctsti reyin cuttanjjañapataquisti? Ucampis Judá orakenquirinacajj juc'ampi jach'atwa arsusisipcaquïna, israelitanacat sipansa.

1 Reyes 12:7

Jupanacasti sapjjänwa —Jumatejj jichhüruna aca marcar sirviñataqui uchasïta ucajja, uqhamarac wali suma arunacampiraqui parlaraquïta ucajja, jupanacasti jumarojj wiñayataquiw sirvipjjätam —sasa.

2 Crónicas 10:7

Jupanacasti sapjjänwa: —Jumatejj aca jakenacaru sumampi uñjäta, mayipctam ucanacsa churañ munaraquïta, uqhamarac suma arunacampiraqui arusjjataraquïta ucajja, jupanacajj wiñayataquiw sirvipjjätam —sasa.

Job 41:3

¿Jupasti jumarojj qhuyapt'ayasiñamataquiti achict'asiristamsti, uqhamaraqui suma arunacampiti achict'asiristamsti?

Proverbios 10:12

Uñisiñajj ch'ajjwanacwa utjayi, ucampis munasiñajj take juchanacwa pampachi.

Proverbios 15:18

Mäqui colerasir jakejj nuwasiñanacwa utjayi; qhititejj llamp'u chuymanïqui ucasti, pachparuwa ch'ujtayi.

Proverbios 25:15

Llamp'u chuymanïñajja coleratarojj sumaptayiwa; suma arunacasti colerat arsüwinacarojj p'aquintiwa.

Proverbios 28:25

Qhititejj juc'ampi munqui ucajja, nuwasiñanacwa utjayi, ucampis qhititejj Tatitur iyawsqui ucawa nayrar sarti.

Proverbios 29:22

Qhititejj mäqui cunatsa colerasqui ucajja, nuwasiñanacwa utjayi, waljanacan pantjasiraqui.

Proverbios 29:8

Ojjoñanacan sarnaker jakenacasti marcarojj ch'ajjwanacwa apti, ucampis yatiñan jakenacajj marcarojj sumancañwa utjayi.

Hechos 19:41

Take acanac arsutatsti, jupajj uca tantachäwjja tuct'ayjjänwa.