Jueces 2:11 - Qullan Arunaca

¹¹ Israelitanacajja Diosansa uñjcatawa jan walinaca lurapjjäna. Jupanacasti kalltapjjänwa cunayman Baal sat diosanacaru yupaychaña.

Aymar Bibliia 1986

¹¹ Israelitanacajja Diosansa uñjcatawa jan walinaca lurapjjäna. Jupanacasti kalltapjjänwa cunayman Baal sat diosanacaru yupaychaña.

Qullan Arunaka DC

¹¹ Israelitanakan luräwinakapax Tatit nayraqatan janiw walïkänti, jupanakax Baal diosan kunayman uñtasitanakaparuw yupaychañ qalltapxäna.

Jueces 2:11 Jak'a apnaqawi uñst'ayäwi

Génesis 13:13

cawqhantejj jakenacajj jan walïpjjäna, uqhamarac Tatitu contras sinti jach'a juchanaca lurapjjaraquïna.

Génesis 38:7

Ucampisa Er chachajj Tatitu Dios nayrakatanjja jan wali sarnakäna, ucatwa Diosajj juparojj jiwayjjäna.

1 Reyes 11:5

Salomonasti yupaychänwa Astarté sat diosaru, ucasti sidonianacana diosapänwa, uqhamarac yupaychäna Milcom sat c'ari diosarusa, ucasti amonitanacana ajjtcaña diosapänwa.

1 Reyes 18:18

—Ucjjarusti Eliasajj sänwa —Janiw nayäcti ch'ajjwayirejja, jan ucasti juma, uqhamarac jakenacamawa ch'ajjwayasipquejja Tatitun camachi arunacapa apanucusina, uqhamarac Baal diosan walja lantinacaparu yupaychasina.

1 Reyes 22:53

Ucjjarusti yupaycharaquïnwa Baal diosaru, cunjamtï nayrajj awquipajj lurcäna Israelan Tatit Diosar colerayasa uqhama.

2 Crónicas 28:2

Jan ucasti Israelanquir reyinacan sarnakäwinacaparuwa arcäna, uqhamaraquiw lurayaraquïna c'ari diosanaca metalata umatatayasa, ucanacasti Baal diosan lantinacapänwa.

2 Crónicas 28:3

Ben-hinom Vallenjja incienso naqhayäna, uqhamarac wawanacaparusa sacrificion loktasina naqhantayäna, cunjämatï Tatitojj israelitanaca nayrakatapata ajjtcaña luräwinacani marcanacaru jakonuccäna uca luräwinacapa lurasa.

2 Crónicas 33:6

Ucjjarusti wawanacaparuwa sacrificiot loktasina naqhantayäna Ben-hinom valle sat chekana, ajayunacaru jisct'asisin yupaychäna, ucatsti utt'ayänwa ch'amacaninaca, ajayunacampi parlañanaca, uqhamarac laykasiñanaca. Tatitun nayrakatapanjja luräwinacapajja sinti jan walinacänwa, Tatitun colerasiñapa sartayañcama.

Esdras 8:12

Hacatán chachan Johanán yokapasti, Azgad familiata jutirïnwa, jupamp chicasti pataca tuncani chachanacänwa.

Nehemías 9:26

“Ucampis jupanacajj jan ist'asirinacäpjjänwa, juma contraw tucupjjäna, uqhamarac leyimarusa jisc'achapjjaraquïnwa. Ucjjarusti jiwayapjjänwa profetanacamarojja jupanacar juchañchatapata jumar cutt'anjjañapataqui, ucatjja jach'a juchanacwa juma nayrakatan lurapjjäna.

Salmos 78:56

Jupanacasti Alajjpachanquir Diosarojj, arsutanacapar jan yäkasaw yant'apjjäna, kallasipjjaraquïna,

Jeremías 11:10

Cuna juchanactejj nayra awquinacapajj lurcäna uca pachpa jucha lurañanacaruw cuttapjjaraqui, uca awquinacapasti janiw nayarojj ist'añ munapquitänti, ucatsti yakha diosanacaruw arcjjapjjäna uqhamaraqui yupaychapjjaraquïna. Israelasa uqhamaraqui Judá marcasa cuntejj nayajj nayra awquinacapampi mä arust'äwi lurcäyätjja ucanacjja t'unjapjjewa.

Jeremías 16:11

Jumasti jupanacarojj saraquim: ‘Tatitusti arsuwa: Acasti jutiwa jumanacan nayra awquinacamajj nayaru apanucuwayasinjja yakha diosanacan khepapwa sarjjapjjäna, ucanacar quillt'asisina yupaychañataqui; nayarusti apanucuwayapjjetänwa, janiraquiw cuntejj nayajj jupanacaru siscäyäta ucanacjja phokhapcänti.

Jeremías 2:20

“Nayratpachwa nayataquejj sayt'astajja, nayarusti janiw jayscaraquistati. ‘Janiw sirviñ muncti’ saractawa. Take alto kollunac patana, uqhamaraqui jach'a kokanac c'uchunacanwa, yakhampi jucha lurasa sarnaktajja.

Jeremías 2:23

¿Cunjämraqui sätasti: ‘Janiw nayajj k'añucht'ascti, janiraquiw yakha diosanacarus yupaychcaractti’ sasasti? Amuyasim cunjämänsa valle token sarnakatamajja, take luratanacamatsti wali amuyasiraquim, kachu camellor uñtata, orko camellon khepapjja cawcsarusa jalaquiractawa.

Jeremías 32:23

Ucampisa cunapachatejj jupanacajj aca orakeru mantanipjjän ucapachasti, aca oraksa catuntasipjjän ucapachasa, janiw jumarojj ist'apcäyätamti, uqhamaraqui cuna arunactejj siscäyäta ucanacsa janiw phokhapcaraquïyätamti, take cuntejj jumajj jupanacaru siscäyäta uca arunacsti janiw catokapcänti. Ucatwa jichhajj take aca t'akhesiñanac apayantajja.

Jeremías 9:14

Jan wali chuymanacapan amtatanacaparuquiw arcapjjänjja, ucatsti c'ari diosanacaruw quillt'asipjjaraquïnjja, cunjämtejj awquinacapajj yatichcatayna uqhama.

Números 25:3

Uqhamatwa jupanacajj Baal-peor diosar yupaychañaru uchasipjjäna. Ucatwa Tatitojj jupanacataquejj wal colerasïna.

Deuteronomio 31:16

Ucapachasti Tatitojj Moisesarojj sänwa: “Niyaw jumajj jiwjjäta, aca marcajj naya contra sayt'asisajj yakha diosanacaruwa arcapjjani cawquïri oraktejj catupcani ucanjja; ucapachasti jupanacajj nayarojj apanucupjjetaniwa, uqhamaraquiw suma arust'äwiru jupanacampi mantapcta ucsa p'aquintapjjani.

Deuteronomio 4:25

“Cunapachatejj jumanacajj wawanacanëjjapjjäta, uqhamarac allchhinacani, jumanacajj awquëjjapjjäta uca orakena, ucqhajj jumanacajj yakha diosanac lurasisa jucharu puripjjäta, cuna animalar uñtatsa, uqhamat Tatitu Diosama nayrakatana mä jach'a jucha lurasina ucata jupar colerayapjjät ucqhajj,

Jueces 10:10

Ucatsti israelitanacajj Diosaruw yanapa mayipjjän aqham sasa: “Dios Tatitu, juma contraw nanacajj jucha lurapjjta, uqhamarac apanucupjjaracsmawa c'ari diosanacaru yupaychatanacajj laycu” sasa.

Jueces 10:6

Israelitanacasti wastatampiw Dios nayrakatana jan walinac lurjjapjjaraquiquïna cunayman Baal Astarté sat c'ari diosanacar yupaychasina. Uqhamarac Siria, Sidón, Moab, Amón uca marcanquirinacan diosanacaparu, filisteonacan diosanacapar yupaychasinjja Diosaru take chuyma yupaychañjja apanucjjapjjänwa.

Jueces 13:1

Israelitanacasti wastatampiw Dios nayrakatanjja jan walinaca lurjjapjjaraquiquïna. Ucatsti Diosajja pusi tunca maranaca filisteonacampi t'akhesiyatäñaruw catuyäna.

Jueces 3:12

Otoniel jiwjjatatsti israelitanacajj wastatampiw Diosajj cuntejj jan munqui uca jan wali jucha lurañanaca lurjjapjjaraquiquïna, uqhamïpansti Diosajj Moab marcanquir Eglón sat reyiruw wali ch'amani tucuyäna, israelitanacat sipansa.

Jueces 3:7

Israelitanacasti Dios Awquipat armasisajja cunanacatejj Diosatac jan walïqui ucanacwa lurapjjäna. Jupanacasti cunayman uñtasit Baal, Astarté sat yakha diosanacaruw yupaychapjjäna.

Jueces 4:1

Aod sat chacha jiwjjatapatsti, israelitanacajj wastatampiw Diosataquejj cunanacatejj jan walïqui uca jan wali lurañanacarojj puripjjaraquiquïna.

Jueces 6:1

Israelitanacasti Diosan uñjcatajja cunayman jan walinacwa lurapjjäna. Ucatsti Diosajja pakallko maranacawa madianitanacan apnakatäñaru catuyäna.

Jueces 6:25

Ucampis uca arumpacharaquiw Diosajj, Gedeonaru saraquïna: —Awquiman vacanacapatsti mayïri orko vaca catum, maysti pakallko marani orko vacäquis ucaraqui, ucjjarojj awquimana Baal sat diosapan altarapa allthapiraquim, uqhamarac uca Baal diosan altarapa jac'ancqui uca koksa qhuchthapiraquim.

Jueces 8:33

Gedeón jiwjjatatsti israelitanacajj Diosat armt'asiwayasinsti cunayman Baal sat diosanacaru yupaychiriw cutt'awayjjapjjäna, ucampis jupanacajj diosapataquejj ajllirïpjjänwa Baal-berit sataru.

1 Samuel 12:10

Ucampis jupanacajj Tatituruw juchanacap arsusipjjäna, uqhamarac juparu apanucutanacapsa, Baal uqhamaraqui Astarté sisqui uca yakha diosanacapar sirvisina, ucatsti achict'asipjjaraquïnwa, uñisirinacapat khespiyañapataqui, jupa saparu sirviñataquiw arsupjjaraquïna.

1 Samuel 7:3

ucatwa Samuelojj take israelitanacaru saraqui: “Jumanacatejj take chuymampi Tatitur cutt'anjjapjjäta ucapachajja, uca yakha diosanacamsa, Astarté diosanacamsa apanucjjapjjañamawa, ucatsti jacañanacamjja jupa saparuquiw churjjapjjañamaraqui, jupa saparuquiraquiw yupaychapjjañama. Ucapachaquiw jupajj take filisteo jakenacan amparapatjja khespiyapjjätam” sasa.

1 Samuel 7:4

Israelitanacasti chekapuniw Baal diosanacsa, Astarté diosanacsa apanucjjapjjäna, ucatsti Tatitu saparuquiraquiw yupaychapjjäna.