Jeremías 23:6 - Qullan Arunaca

⁶ Uca reyin apnakañapcamasti Judá orakejj khespiyatäniwa, Israelas take jan walit jarc'akataw jacasini. Aca sutimpiw sutichapjjaraquini: ‘Tatituw jiwasan atipjirisajja’ ” sasa.

Aymar Bibliia 1986

⁶ Uca reyin apnakañapcamasti Judá orakejj khespiyatäniwa, Israelas take jan walit jarc'akataw jacasini. Aca sutimpiw sutichapjjaraquini: ‘Tatituw jiwasan atipjirisajja’ ” sasa.

Qullan Arunaka DC

⁶ Uka reyin apnaqäwipansti, Judá uraqix qhispiyatäniwa, Israel markas taqi jan walit jark'aqataw jakasini. Aka sutimpiw sutichapxani: ‘Tatituw jiwasan atipjirisaxa’ ” sasa.

Jeremías 23:6 Jak'a apnaqawi uñst'ayäwi

1 Reyes 4:25

Salomón reyejj jaccäna ucqhajja Judá, Israel jakenacajja, Dan ucata Beerseba ucqhacamajja samarataquiw jacapjjäna uva alinac thiyana, uqhamarac higo alinac thiyana.

Salmos 45:5

Mich'inacamajj wali arinacawa, marcanacajj jumaruw maqhatjjapjjtam, reyimp timasirinacajj ajjsarayasjjapjjewa.

Éxodo 9:26

Ucampis Gosén sat orakerusti cawqhancapcäntejj israelitanacajj ucqharojj janiw mä chhijchhis purcänti.

Isaías 2:4

Tatituw take marcanacaru taripani, walja marcanacan ch'ajjwatanacapwa t'akjaraquini. Uca marcanacasti espadanacapjja kholliñ aradoruw tucuyjjapjjani, lanzanacapsti yawthapiñ hocenacaruraqui. Janiraquiw cawquïr marcas yakha marcampejj nuwasiñatac sartcaniti. Janiraquiw guerran nuwasiñataquis yatichäwinacjja catokapcaniti.

Isaías 32:1

Mä reyiw utjani, jupasti chekaparuraquiw apnakani, marca apnakerinacasti cheka uñjäwimpiw apnakapjjaraquini.

Isaías 32:18

Marcajjasti mä suma samarañ chekanwa jacani, suma utanacana, samarata jacañ utanacana,

Isaías 33:22

Uca barcon pitanacapasti janiw barcon jach'a lawapjja catjjäscaspati, velopasti janiw janatatañjamäquiti. Uñisirinacasatsti uca kamir cancañanacapjja aparañäni, juyqhus jupanccani ucjja catokaniwa, suchunacasti apsuñaruw uscusipjjani. Tatituw chekapar uñjirisajja, jiwasan apnakerisajja, jiwasan reyisajja, jupaw khespiyistani.

Isaías 33:5

Tatitojj munañaniwa, alajjpachan jaquiriraquiwa; juparaquiw Sionarojj cheka cancañampi cheka uñjäwimpi phokhanti,

Isaías 35:9

Ucanjja janiw leonanacajj utjcaniti, janiraquiw monte animalanacas jac'achasincaniti. Uca thaquinjamwa khespiyatanacajj jutjjapjjani, qhitinacarutejj Tatitojj khespiyqui ucanacajja.

Isaías 42:6

“Naya, Tatituw, jumarojj jawssma cheka cancañajj phokhañamataqui, amparamatracwa wayjjarsma, uqhamat jumajj khespiyasiñ apañamataqui; nayaw jumarojj sayt'aysma, munaractwa jumajj mä chimpüñama marcajjampi arust'äwiru mantatajjatjja, marcanacataquisa mä khanäñamaraqui.

Isaías 45:17

Ucampis Israelarojj Tatituw khespiyi, wiñayataquiw khespiyi, janiraquiw jupajj p'enkachatasa, jisc'achatasa uñjascaniti.

Isaías 54:17

ucampis jumar tucjañäquis uca armjja janiw qhitis jichhacam lurquiti. Qhitinacatejj jumar juchañchapcätam ucanacarojj amuct'ayätawa. Ucwa nayajj churta qhitinacatejj nayar sirvipquitu ucanacarojja: ‘Atipjäwi’ Tatituw ucjja arsu.

Isaías 7:14

Tatitu quipcaw jumanacarojj mä chimpu churasipcätam: Uñtapjjam, mä tawakow usur jakeptata, mä yokall wawa wawachasiraquini, Emanuel sasaraquiw sutichani.

Isaías 9:6

Mä wawaw jiwasataqui yurini, Diosaw mä yokall wawa churistani, uca wawaw jichhajj apnakaraquini. Aqham sasaw sutichapjjaraquini: ‘Amtäwinacapanjja Muspharcaña, jan atipjcay Dios, Wiñay Awqui, Sumancañan Jilïripa’ sasa.

Jeremías 29:11

Nayasti yatiractwa cuna amtäwinacatejj jumanacataqui utjquitu ucanacjja, uca amtäwinacasti jumanacan asquinacamataquiwa, janiw jumanacan jan walt'apjjañanacamataquïquiti, uqhamat khepa urunacanjja wali suma jacasipjjañanacamataqui, suyt'añanacansa phokhantataraqui. Naya Tatituw ucjja arsta.

Jeremías 30:10

“Naya Tatituw arsta: Jacobon marcapa, nayan sirvirejja, jan ajjsaramti; Israel marca, jan ajjsaramti. Jumampiru, uqhamaraqui wawanacamarusa, jichhajj nayaw khespiyapjjäma, uca jaya marcaru apanucuyatäpcta ucatjja. Uqhamaraqui samarata sarnakasiriw cuttanjjäta, janiraquiw qhitis sustjcjjätamti.

Jeremías 31:23

Israelan Diosapa, take ch'amani Diosasti siwa: “Cunapachatejj nayajj Judá marcanquir jakenacan sarnakäwipa maysaru tucuyjjä, ucat jupanacajj wasitat orakenacapancjjapjjaraquini, uqhamaraqui marcanacapana, ucapachasti wasitatwa sapjjani: ‘¡Tatituy bendispan aca kollan kolluru, cawqhantejj cheka cancañajj utjqui ucaru!’

Jeremías 32:37

Nayaw jakenacaparojj take marcanacat anthapinjjä, cawquïri marcanacarutejj ananuccta ucanacata, cunapachatejj nayajj jupanacataqui sinti coleratäcäyät ucapacha. Nayasti jupanacarojj aca pachpa orakeruw cuttayanjjä ucan c'uchiqui jacasjjapjjañapataqui.

Jeremías 33:15

Uca uru purincani ucapachasti Davidataquejj mä jupan wawapwa utjayaraquëjja, juparaquiw aca marcanjja asquimpi chekapampi utjayani;

Jeremías 33:16

uca urunacanjja Judá orakejj sumaquiw sarnakasini, Jerusalén marcasti jan qhitin cun sataraquiw jacasiraquini. Aca sutimpiw uca wawarojj sutichapjjaraquini: ‘Tatituw jiwasan atipjañasajja’ sasa.

Ezequiel 21:27

Take cunsa mayjaru t'unthapitwa jaytawayaraquëjja, take cunas t'unthapitcama. Ucampisa take ucanacajj lurasiniwa, cunapachatejj nayajj siscä qhitirutejj take acanaca lurañapataqui ucaru, uqhamat cheka cancañajj utjañapataqui.’

Ezequiel 28:26

Ucanwa suma samarata jacasipjjaraquini, utanaca utachasipjjaraquini, uva alinaca ayrusipjjaraquini. Nayaw juchañcharaquï take qhitinacatejj jac'anquiri marcanacatjja Israelar jisc'achapqui ucanacarojja. Ucapachaw yatisini nayajj Israelan Dios Tatitupätajja” sasa.

Ezequiel 38:14

“Jichhajj waliquiwa, Gog sisqui ucarusti nayan sutejjaru parlam, saraquim: ‘Aqham siw Tatitojja: Cunapachatejj Israel marcajjajj c'uchiqui jacasiscani ucapachaw jumajj jupanacar tucjir sarantaraquïta.

Ezequiel 48:35

Uca perkasti takpachajja llätunca waranka metroniraquïniwa largorojja, uca marcan sutipasti acat ucsarojja: ‘Tatituw acanqui’ sataraquïniwa.”

Daniel (hebreo) 9:24

“Pakallko tunca semananacaw pasañapa marcamjjaru, uqhamaraqui kollana marcamjjarusa, uqhamat ñankha luräwiru, juchampiru tucjañataqui, ñankha luräwinacatjja pampachäwi jicjjatañataqui, ucatsti cunatejj chekapäqui uca wiñayataqui utt'ayañataqui, uqhamat unañchäwi uñjcta, uqhamaraqui profecía arunac ist'cta ucanacajj phokhasiñapataqui, ucjjarusti cawquïritejj kollanäqui ucajja Diosar catuyatäjjañapcama.

Daniel (hebreo) 9:7

Jumajj, Tata, chekapapunïtawa, ucampisa nanaca judionacajj wali p'enkasipjjta; cawquïrinacatejj Jerusalén marcan jacapqui ucanacjamaraqui, uqhamaraqui yakha israelitanacjamaraqui, uca quipcaraqui cawquïrinacatejj jacapqui yakha marcanacana, uqhamaraqui jumaw ucanacarojj uqham ananucuracta juma nayrakatan sayt'asipjjatap laycu.

Oseas 1:11

Ucapachawa Israel marcanquir jakenacampi, Judá marcanquir jakenacampejj mayacht'asjjapjjani, ucatsti mä sapa jilïriruwa utt'ayasjjapjjani, take toketsti Jerusalén marcarcamaraquiw cuttanjjapjjani. ¡Jezreelan urupasti wali jach'apunïniwa!

Oseas 1:7

Ucampisa, Judá marcatjja qhuyapt'ayasïwa, naya quipca, Tatitu Diosaparaquiw khespiyä. Janiw guerrampiti khespiycäjja; jan ucasti, jan armampi, jan espadampi, jan caballeriampiquiw khespiyäjja.”

Oseas 2:18

“Qhä urunsti, Israel marcar munatajj laycojja, pampanquir animalanacampisa, jamach'inacampisa, catarinacampisa, mä suma arust'äwiruw mantäjja, aca marcatsti, nuwasiñsa, armanacsa, espadanacsa apakasinjja k'al t'unthapëjja, uqhamat marcajjajj suman sarnakasiñapataqui.

Abdías 1:17

Ucampis Sión kollojj mä kollana chekawjapunïniwa, ucanwa yakhepanacajj khespiyasipjjaraquini. Jacobon wawanacapasti orakenacapjja wasitatwa aptasjjapjjani.

Abdías 1:21

Atipjañampiwa Sión kollurojj maqhatapjjani, qhitinacatï Esaun kollunacapan utjapquis ucanac contra arsuñataqui, ucansti Tatituraquiw apnakaraquini.

Sofonías 3:13

Israel marcan jilt'iri jakenacasti janiraquiw cunatejj jan chekapäqui ucanacjja lurcjjapjjaniti, c'arisipcaraquinisa, janiraquiw engaño arunacsa parlcjjapjjaniti. Jupanacasti jan cuna ajjsarasaw mank'asipjjani, samarapjjaraquini” sasa.

Zacarías 10:6

Tatitojj siwa: “Nayaw ch'am churäjja Judá familiat jutirinacarojja, José familiat jutirinacarusti khispiyaraquïwa. Wasitatwa orakeparojj irpjjaraquëjja, qhuyapayasiñajjajj jupanacatac utjatap laycu. Janipunis nayajj jan ist'iri tucuriscäyäta uqhamaw tucjjapjjanejja, nayajj Tatitu Diosapätap laycu, ist'aractwa mayisitanacaparusa.

Zacarías 3:10

Cunapachatï uca urojj purinjjani ucapachajj jumanacajj maynit maynicamaw suman kamart'añataqui jawsayasipjjäta uva alinacan higo kokanacan ch'iwipana. Naya take ch'aman Tatituw arstjja.’ ”

Romanos 3:22

Diosajj cunjämattejj jiwasanacarojj asqui jaket catokquistaspan ucajja Jesucristor iyawsatas laycuquiwa, janiraquiw yakha yakhäñajj utjquiti;

1 Corintios 1:30

Jumanacarusti Dios quipcaw Jesucristompi mayaruqui tucuyapjjtam uqhamaraquiw Diosajj jiwasan yatiñ cancañasjja Jesucristompi utjayi. Uca Jesucristo tokeracwa khespiyistu, jupar catuyata tucuyaraquistu.

2 Corintios 5:21

Cristojj janiw cuna juchsa lurcänti, ucampis Diosajj juparojj mä juchan jakerjamaw uñjäna jiwasanac laycu, jiwasajj Cristomp chicäjjatas laycojj mä chekap jacañanëjjañasataqui, cunjämtï Diosajj jacañas munqui uqhama.

Filipenses 3:9

Jupampi chict'ata jicjjatasiñajjataquiraquiwa Diosampi catokatäta, janiw leyerjam cheka sarnakatajj laycuti, jan ucasti Cristor iyawsatajj laycuwa, Diosajj catokewa qhitinacatejj iyawsapqui ucanacarojja.