Jeremías 23:22 - Qullan Arunaca

²² Jupanacatejj nayan amtatanacajja yatipjjasapän ucajja, nayan arunacajjwa marcajjarojj yatiyapjjasapänjja; jan wali thaquinacapatsa cuttayanipjjasapänwa, ñankha lurañanacapsa apanucuyapjjaraquisapänwa.”

Aymar Bibliia 1986

²² Jupanacatejj nayan amtatanacajja yatipjjasapän ucajja, nayan arunacajjwa marcajjarojj yatiyapjjasapänjja; jan wali thaquinacapatsa cuttayanipjjasapänwa, ñankha lurañanacapsa apanucuyapjjaraquisapänwa.”

Qullan Arunaka DC

²² Jupanakatix nayan amtatanakax yatipxasapän ukkhasti, markaxarux nayan arunakax yatiyapxasapänwa; jan wali thakhinakapatsa kuttayanipxasapänwa, ñanqha lurañanakapsa apanukuyapxarakisapänwa.”

Jeremías 23:22 Jak'a apnaqawi uñst'ayäwi

Jeremías 23:14

Jerusalenanquir profetanacarusti nayaw uñjta, ajjtascañ luräwinaca lurasipquiri: Wachok juchanac lurapjje, lunthatapjjaraqui, janiraquiw maynis ñankha lurañanacapjja apanucquiti. Jupanacasa, marcan jaquirinacasa, nayataquejj Sodoma, Gomorra marcanacjamäpjjewa.

Jeremías 23:18

Ucampisa, ¿qhitis Tatitun amtäwinacapjja yati? ¿Qhitis arunacapjja ist'araqui uqhamaraqui juparusa uñjaraqui? ¿Qhitis arsutaparojj ist'araqui?

Jeremías 25:5

Jupanacasti jumanacarojj sapjjäyätamwa: ‘Jan wali sarnakäwinacamjja uqhamaraqui jan wali luräwinacamsa apanucupjjam, cawquïri oraktejj Tatitojj jumanacaru nayra awquinacamarusa churcatayna ucan wiñayataqui jacapjjañamataqui.

Jeremías 35:15

Nayar sirviri profetanacajjarusti mayampi mayampwa qhitanipjjsma jumanacaru aqham sañapataqui: Uca jan wali sarnakäwinacamsa uqhamaraqui jan wali luräwinacamsa apanucupjjam. Janiraqui yakha diosanacan khepapsa sarjjapjjamti ni ucanacarusa yupaychapjjaraquimti, uqhamatwa cuna oraktejj nayajj jumanacarusa uqhamaraqui nayra awquinacamarus churcäyät ucan jacasipjjätajja sasa. Ucampisa janiw jumanacajj nayan arunacajjarojj jaysapcäyätati ni ist'apcaraquïyätasa.

Jeremías 36:3

Inasa uqhamat Judá orakenquir jakenacajj cuna t'akhesiñanactejj jupanacjjaru apayaniña amtcta ucanac yatisajj, jan wali luräwinacapa apanucjjapjjchini, ucatsti nayajj jupanacarojj ñankha luratanacapatsa, jucha luratanacapatsa perdonjjaraquirista” sasa.

Jeremías 9:12

¿Qhitis wali amuyt'anejja take acanac amuyt'añataquejja? ¿Qhitirus Tatitojj take acanac yatiyi, mayninacaru yatiyañapataqui? ¿Cunatsa aca marcajj k'ala t'unjata uñjasi, waña mä wasarar uñtata, cawqhantejj jan qhitis pasqui uqhama?

Ezequiel 13:22

Jumanacajj c'arisiñanacamampejj asqui jakenacarojj llajlla tucuyapjjtajja, uca lurañsti janiw nayajj muncäyätti, ucampisa ñankha lurir jakenacarojj juc'ampi ch'amañcht'apjjaractajja juc'ampi jan wali luräwinaca lurapjjañanacapataqui, uqhamat nayajj jan jupanacaru jacañ churañajjataqui.

Ezequiel 13:5

Israel marcaru arjjatañataquisti janiw cunsa lurapquiti, cunapachatejj Tatitun urupa urojj purinqui uca urojj nuwasïwina sayt'asipjjañapataquejja.

Ezequiel 18:30

Nayasti israelit jakenaca, sapakat mayniruw uñjapjjsma, luräwinacamarjama. Naya Tatituw ucjja arsta. Ñankha lurañanacamjja mäpita apanucupjjam, uqhamat jan jumanacpacha uca ñankha luräwinacam laycu jiwarascañataqui.

Ezequiel 2:7

Jumajj arunacajja jupanacarojj khanañcham, ist'apjjpasa janis ist'apjjpan, jupanacan naya toke sayt'asiri jakenacäpjjatap laycu.

Ezequiel 3:17

“Nayasti jumarojj, chacha, Israel marcan uñjiripatwa uscuracsma. Cunapachatejj nayajj cunsa jumaru yatiyäma ucapachasti janc'aquiw Israel marcarojj yatiyañamaraqui, uqhamat jupanacajj take cunsa suma yatipjjañapataqui.

Amós 3:7

Tatitojj janipuniw cuns lurcaspati profeta servirinacaparu jan yatiyasajja.

Zacarías 1:4

Jan nayra awquinacamjam lurapjjamti, qhitinacarutï nayra profetanacajj naya toket jupanacaru sänjja jan wali sarnakäwinacapa, jan wali luräwinacapa jaytjjañapataqui, ucampis jupanacajja janiw ist'añsa, jaysañsa munapcänti. Naya Tatituw arstjja.

Malaquías 2:6

Leví tribusti cunatejj chekapäqui ucwa yatichäna, janiraquiw lacapansa jucha parlañajj utjcänti. Nayampisti suma samarañ arust'äwinrac jacaraquïna, ucatsti waljaniruraquiwa jucha lurañat jithektayaraquïna.

Hechos 20:27

Nayasti jumanacarojj yatiyapjjsmawa takpach Diosan thaquipatjja, jan cuns imt'asa.

1 Tesalonicenses 5:6

ucatpï jan icjañasäquitejj mayninacjamajja, jan ucasti p'arjjtatäñasawa take amuyumpi.