Jeremías 11:8 - Qullan Arunaca

⁸ Ucampisa janiw nayarojj jaysapquituti, ni ist'apcaraquitusa, jan ucasti chuymanacapan jan wali amtatanacaparuquiw arcjjapjje. Cuntejj nayajj jupanacaru siscäyät uca arunacsti janiw phokhañ munapcänti, ucatpï jupanacjjarojja cuntejj arust'äwin yatiycäyäta uca mutuyäwi apayantjja.’ ”

Aymar Bibliia 1986

⁸ Ucampisa janiw nayarojj jaysapquituti, ni ist'apcaraquitusa, jan ucasti chuymanacapan jan wali amtatanacaparuquiw arcjjapjje. Cuntejj nayajj jupanacaru siscäyät uca arunacsti janiw phokhañ munapcänti, ucatpï jupanacjjarojja cuntejj arust'äwin yatiycäyäta uca mutuyäwi apayantjja.’ ”

Qullan Arunaka DC

⁸ Ukampis janiw nayarux jaysapkituti, janirakiw ist'apkitusa, jan ukasti chuymanakapan jan wali amtatanakaparukiw arkxapxi. Janiw nayan arsut arunakar phuqhañ munapkänti, ukatpï jupanakxarux kuntix arust'äwin yatiykäyäta uka mutuyäwi apayantxa.’ ”

Jeremías 11:8 Jak'a apnaqawi uñst'ayäwi

Nehemías 9:26

“Ucampis jupanacajj jan ist'asirinacäpjjänwa, juma contraw tucupjjäna, uqhamarac leyimarusa jisc'achapjjaraquïnwa. Ucjjarusti jiwayapjjänwa profetanacamarojja jupanacar juchañchatapata jumar cutt'anjjañapataqui, ucatjja jach'a juchanacwa juma nayrakatan lurapjjäna.

Nehemías 9:29

Jumasti jupanacarojj ewjjt'äyätawa leyinacama phokhapjjañapataqui; ucampis jupanacajja walicjamacwa amuyasipjjäna, ucatsti janiw arunacamarojja ist'apcänti. Ucatsti jupanacajj janiw phokhapcänti camachi arunaca, qhitinacatejj phokhasina jacaña jicjjatapjjañanacapäcäna ucjja; jupanacajj juma contraw tucupjjäna, uqhamarac chuymanacapa kalarayasisa janiw ist'apcänti.

Jeremías 13:10

Aca ñankha marcajj nayan arunacajjarojj janiw ist'añ munquiti, ucatsti jan cuna amuyasisaw chuymapan jan wali amtatanacaparojj arqui. Yakha diosanacan khepapa arcjjapjje, sirviñataqui, uqhamaraqui yupaychañataqui. Uca jan cunatac sirviri cinturonjamäpjjewa.

Jeremías 3:17

Ucapachaw Jerusalenajj Tatitun tronopa satänejja; take marcanacaw ucaru tantacht'asipjjani, ucatsti nayaruw jach'añchapjjaraquitani, janiraquiw chuymanacapan jan wali amtatanacaparojj arccjjapjjaniti.

Jeremías 31:32

Aca arust'äwisti janiw cunjämatejj nayra awquinacapampi lurcta uqhamäcaniti, cunapachatejj jupanacarojj amparat wayjjarusin Egipto marcat irpsuncta uqhama; jupanacasti janiw arust'äwejjarojj phokhapquiti, nayajj jupanacan uywiripäcchiyäta ucasa. Naya Tatituw ucjja arsta.

Jeremías 32:23

Ucampisa cunapachatejj jupanacajj aca orakeru mantanipjjän ucapachasti, aca oraksa catuntasipjjän ucapachasa, janiw jumarojj ist'apcäyätamti, uqhamaraqui cuna arunactejj siscäyäta ucanacsa janiw phokhapcaraquïyätamti, take cuntejj jumajj jupanacaru siscäyäta uca arunacsti janiw catokapcänti. Ucatwa jichhajj take aca t'akhesiñanac apayantajja.

Jeremías 34:14

Jupanacarojj saraquiyätwa: Sapa pakallko mara pasjjepanwa, cawquïri hebreo jaketejj jupa pacha aljasi ucatsti sojjta mara sirviraqui ucarojj antutjjapjjätaw sasa. Ucampisa nayra awquinacapajj janiw nayarojj ist'apquitänti, ni jaysapcaraquitänsa.

Jeremías 35:15

Nayar sirviri profetanacajjarusti mayampi mayampwa qhitanipjjsma jumanacaru aqham sañapataqui: Uca jan wali sarnakäwinacamsa uqhamaraqui jan wali luräwinacamsa apanucupjjam. Janiraqui yakha diosanacan khepapsa sarjjapjjamti ni ucanacarusa yupaychapjjaraquimti, uqhamatwa cuna oraktejj nayajj jumanacarusa uqhamaraqui nayra awquinacamarus churcäyät ucan jacasipjjätajja sasa. Ucampisa janiw jumanacajj nayan arunacajjarojj jaysapcäyätati ni ist'apcaraquïyätasa.

Jeremías 35:17

Ucatwa, naya Israel Diosapa take ch'amani Diosajj sistjja: Judá oraken uqhamaraqui Jerusalén marcan utjasiri jakenacjjarojja cunayman jan walinacwa apayanëjja, cuntejj jupanacaru yatiycta take ucanaca. Nayasti jumanacarojj parljjayapjjsmawa, ucampis jumanacajj janiw nayarojj ist'apquistati, jumanacarojj jawsapjjsmawa, ucampis jumanacajj janiw jaysapquistati.’ ”

Jeremías 38:20

Jeremiasasti ucjjarojj saraquïnwa: —Juma jach'a reyejj janiw jupanacan amparaparu jalt'cätati. Jach'a rey, jumajj jaysam Tatitun arunacaparu cuntejj nayajj jumaru yatiycsma uca arunacaru, ucapachasti take cunas waliquïscaquiniwa, janiw jiwayatäcaraquïtasa.

Jeremías 44:16

“Cuna arunactejj jumajj Tatitu toket apanipjjesta ucanacarojj janiw ist'apcäti.

Jeremías 44:17

Jan ucasti cuntejj lurañ amtasipjjta ucpun lurapjjäjja. Alajjpach Mama sat diosarojja incienso loktasisipcaquipunïwa, uqhamaraqui vinompisa ch'allasisipcaquïwa, cunjämtejj jichhacama lurapjjta uqhama nayra awquinacajjasa, reyinacajjasa, Judá orakenquiri jach'a jilïrinacajjasa, uca marcanacanjja uqhamaraqui Jerusalén marcan callenacapansa uqhampunwa lurapjjerïnjja. Nayrasti nanäcataquejj mank'as walïriwa, take cunas waliquïsquiriwa, janiraquiw cuna jan walt'añas jutirïquiti.

Jeremías 44:5

Ucampisa jumanacajj janiw nayarojj ist'apquistati, ni arunacajjarus jaysapcaraquïyätati. Uca ñankha luräwinacapa apanucuñat sipansa juc'ampwa uca diosanacaru inciensonaca loktasipjjayätajja.

Jeremías 7:13

Nayasti mayampi mayampwa jumanacarojj ñankha luratanacamatjja ewjjapjjsma, ucampisa jumanacajj janiw nayarojj ist'apquistati, ni jaysapcaraquistasa. Naya Tatituw acjja arsta.

Jeremías 7:24

Ucampisa janiw nayarojj ist'apquituti ni jaysapcaraquitusa, jan ucasti kala chuymanacapar jaysasaquiwa ñankha lurañanacaru catuyasjjapjjejja. Nayaru uñtañcamayasti, nayatjja maysaruw uñtapjjänjja.

Jeremías 7:26

Ucampisa jumanacajj janiw nayarojj jaysapquistati, ni ist'apcaraquistasa, jan ucasti juc'ampi khoru chuymaniw sarnakapjjtajja nayra awquinacamatsa juc'ampi.

Ezequiel 20:8

“Ucampisa jupanacajj cutcatasipjjetuwa janiraquiw arunacajjsa ist'añsa munapcänti; uca ajjtascañ diosanacapatsa janiw jithektapcänti, janiraquiw Egiptonquir c'ari diosanacapsa apanucuñ munapcänti. Nayasti colerasiñajjsa jupanacjjaru wartaniña amtäyätjja, pachpa Egipto oraken mutuyaña colerajjajj apaktañapcama.

Zacarías 1:4

Jan nayra awquinacamjam lurapjjamti, qhitinacarutï nayra profetanacajj naya toket jupanacaru sänjja jan wali sarnakäwinacapa, jan wali luräwinacapa jaytjjañapataqui, ucampis jupanacajja janiw ist'añsa, jaysañsa munapcänti. Naya Tatituw arstjja.

Zacarías 7:11

Ucampis marcajj janiw ist'asiñ munquiti. Takeniw cutt'awayjjapjje, okararaquiw tucupjje.