Éxodo 18:12 - Qullan Arunaca

¹² Moisesan Jetro awcch'ipajj mä uywa Diosaru sacrificio loktasin nact'ayäna, uqhamarac yakha ofrendanacampi uqhama. Aaronampi, israelanquir take jilïrinacampisti sarapjjänwa Moisesan awcch'ipampi cheka Diosan nayrakatapana mank'aniñataqui.

Aymar Bibliia 1986

¹² Moisesan Jetro awcch'ipajj mä uywa Diosaru sacrificio loktasin nact'ayäna, uqhamarac yakha ofrendanacampi uqhama. Aaronampi, israelanquir take jilïrinacampisti sarapjjänwa Moisesan awcch'ipampi cheka Diosan nayrakatapana mank'aniñataqui.

Qullan Arunaka DC

¹² Jetró chachasti ukspachaw mä uywa katusin nakt'at wilañcha Diosar luqtäna, ukhamarak yaqha waxt'anakampi. Uka qhipatsti, Aaronampi, Israelan jilïrinakapampix Moisesan awkch'ipamp chikaw Diosan nayraqatapan manq'apxäna.

Éxodo 18:12 Jak'a apnaqawi uñst'ayäwi

Génesis 12:7

Ucanwa Tatitojj uñstäna, ucatsti saraquïnwa: “Aca orakjja wawanacamaruw churä” sasa. Ucatsti Abramajj uca chekanjja mä altar Tatitutaqui waquichäna, uca chekan Tatitojj uñstatap laycu.

Génesis 26:25

Uqhamasti Isaacajj uca chekarojj mä altar luräna, ucatsti Tatituruw art'asïna. Uca chekaruw carpapjja sayt'ayäna, sirvirinacapasti mä phuch'u allsupjjaraquïna.

Génesis 26:30

Uqhamasti Isaacajj mä jach'a fiesta luräna, mank'apjjäna, umapjjaraquïna.

Génesis 31:54

Ucjjarusti Jacobojj mä sacrificio kollu patan loktaraqui, familianacaparus jawsaraquïnwa mank'añataquejja, take jupanacaw mank'apjjäna, uca arumasti kollun khantatipjjaraquïna.

Génesis 4:4

Abelasti ovejanacapatjja suma liq'ïquis uca apaniraquïna, ucat qharsusin liq'imppach Diosar loktaraquïna. Diosasti Abelarojj, uqhamarac ofrendaparusa sumwa catokäna;

Génesis 43:25

Jupanacasti ucañcamajj wajjt'äwinacwa waquicht'apjjäna, ucatsti Josean puriniñapwa suyasipcäna, chica uru horasaru, yatipjjaraquitaynawa, ucan mank'apjjañapjja.

Génesis 8:20

Ucatsti janc'aquiraquiw Noejj Tatitutaqui mä altar luräna, ucatsti k'oma animalanacata, uqhamaraqui jamach'inacatsa mayacamwa catüna, ucatsti Tatituruw sacrificiot loktäna.

2 Samuel 9:7

Davidasti saraquïnwa: —Jan ajjsaramti, nayajj jumarojj wali sum uñjäma, Jonatán awquimat amtasitajj laycu. Saúl achachilaman orakenacapsti takwa cuttayayjjäma, ucatsti naya chicapuniw mesajjan mank'asiraquïta.

2 Crónicas 30:22

Ezequiasasti take levitanacarojj: “Waliquiw” saraquïnwa, jupanacan Tatitur sirviñataqui wali suma amtäwipa uñacht'ayapjjatap laycu. Jupanacajj pakallk uru fiestana mank'apjjatapata, uqhamarac sumancäwi loktäwinaca loktatatsa, nayra awquinacapan Tatit Diosapar yupaychapjjatapatsa,

Job 1:5

Uca mank'äwi pasatatsti, Job chachajj wawanacapa jawsayasinjja wali alwata sartasinwa sacrificionac nact'ayasin loktirïna, uqhamata sapa mayni jupanacajja juchanacapata k'omachatäñapataqui. Uqhamsti Job chachajja lurirïnwa wawanacapajja inampisa chuymanacapana jan walinaca amtasinjja Dios contra jucha lurapjjaspa uca amuyasina.

Job 42:11

Ucatsti take jilanacapawa jupar uñjirejj sarapjjäna, uqhamaraqui cullacanacapasa, amigonacapasa, nayra tiempo uñt'ata jakenacasa, ucatsti utapanjja mä jach'a mank'äwi lurapjjaraquïna. Job chachan take t'akhesitanacapatsti chuymachapjjänwa, cuna t'akhesiñanactejj Tatitojj jupjjaru apayancatayna take ucanacata; jupanacatsti sapa mayniraquiwa mä kawkha kollke churapjjäna, uqhamaraqui mä kori anillompi cuna.

Job 42:8

Jichhajj pakallko orko vacanacampi, pakallko orko ovejanacampi catupjjam, ucatsti Job sirvirejjaru uñjiri sarapjjam, ucatsti jumanacajj mä nact'ata sacrificio loktapjjaraquim pachpa jumanacataqui. Job sirvirejjaw jumanacataqui mayiraquini, nayasti jupan mayitapjja ist'araquïwa, jumanacarusti janiw ucatjja cuna ñankhanacsa lurapcaraquïmati, jumanacarojj mutuyañas waquiscchi ucasa, nayjjat jan chekaparu khanañchapjjatamata, cunjämatejj Job sirvirejjajj khanañchänjja uqhama.”

Éxodo 18:13

Khepärmanthisti Moisesajj israelitanacan nayrakataparuw kont'asïna jupanac taypina jan walt'ayasiñanacajj utjatapa uñjañataqui. Ucampis israelitanacajj Moisés nayrakatanjja alwat jayp'ucamaw sayt'at sayapjjäna.

Éxodo 2:16

Uca Madián sat chekansti mä sacerdotew utjäna pakallko phuchani. Ucampis uca chekar purisinjja mä phuch'u jac'aruw kont'asïna. Ucatsti uca urojja uca sacerdotena phuchanacapaw jutapjjäna phuch'ut uma apsusa ovej umañanacaru phokharañataqui, ucata awquipan ovejanacapar umarayañataqui.

Éxodo 2:20

Ucatsti awquejj phuchanacaparojj sänwa: —Jichhasti, ¿cawquincasquis uca jakejja? ¿Cunatsa sapaqui jaytanucuniwayapjjta? ¡Jawsanipjjam jiwasampi chica mank'asiñapataqui! —sasa.

Éxodo 20:24

Jichhasti nayataqui mä altara lak'at lurarapipjjeta, ucatsti uca altarjjarojj takpach nact'ayata sacrificionaca, uqhamarac sumancañataqui sacrificionac loktapjjeta ovejanacamata, uqhamarac vacanacamatsa. Nayasti jutasinjja bendicipjjämawa take orakena, cawqhanacantejj nayan sutejjajj amtatäñapa muncäjja ucqhanacana.

Éxodo 24:11

Ucampis Diosajja janiw cuna jan walsa lurcänti uca jilïri israelitanacarojja, jupanacasti Diosarojj uñjapjjänwa, uqhamarac mank'apjjäna, umapjjaraquïna.

Éxodo 24:5

Ucatsti Israelit waynanacwa qhithäna vaca kallunac qharsusa Tatitur jach'añchasina nact'ayasa loktapjjañapataqui, uqhamarac sumancthapiñataqui sacrificionacsa loktapjjaraquïnwa.

Éxodo 3:1

Moisesasti Jetro sat awcch'ipan ovejanacapwa awatïna, uca awcch'ipasti Madián sat chekanjja sacerdotënwa. Ucampis mä urojja ovejanacwa wali jayaru wasaranjama anaquïna, Horeb sat Diosan kolluparu puriñcama.

Éxodo 33:7

Moisesasti Diosampi jiquisiñ sat waquichat carpsti campamentotjja jaya chekaruw aptäna, ucsti sutichänwa Diosampi Jiquisiñ Carpa sasa. Ucampis qhititejj Tatituru cunsa jisct'asiña munqui ucajja saränwa campamentot ankäjjancqui uca Carparu.

Daniel (hebreo) 10:3

Janiw nayajj suma mank'anacjja mank'cäyätti, janiraquiw aychsa ni vinsa mallt'caraquïyätti, ni cuna casta suma k'aphinacampis uscuscaraquïyätti, uca quimsa semananac pasañapcama.

Números 10:29

Moisesasti mä urojj warmipan jilaparuw jawsäna, ucasti Hobab satänwa, Reuel sat madianita chachan wawaparaqui, ucatsti sänwa: —Nanacajj sarasipctwa cawquïri oraktejj Tatitojj churämaw sapquitu ucaru. Jutam, nanacampi chica sarañäni, sum uñjapjjaraquïma, Tatitojj arupampiw arsu Israel marcar munasiñampi uñjañataquejja —sasa.

Lucas 14:1

Mä samarañ urunsti Jesusajj mä fariseo jilïrin utaparuw mank'er saräna, maynïr fariseonacajj uñch'uquisipcaraquïnwa.

Lucas 14:15

Uc ist'asinjja mesan kont'atäpcän ucanacat maynïriw Jesusar säna: —Cusisiñaniw Diosan reinopan t'ant'a mank'erejja.

1 Corintios 10:18

Israel marcata amuyasipjjam; sacrificion churata yänacat mank'erinacajja mayaquïpjjewa maynit maynicama uqham mank'apjjatap laycu.

1 Corintios 10:21

Janiw Tatitun copapampita ñankha ajayunacan copapampitjja umapcasmati, janiraquiw Tatitun mesapampita ñankha ajayunacan mesapampitsa mank'apcaraquismati.

1 Corintios 10:31

Uqhamajj mank'apjjamsa, umapjjamsa jan ucajj cunsa lurapjjam, ucampis take cunsa Diosar jach'añchañataquiqui lurapjjam.

Deuteronomio 12:7

Qhä chekanwa Tatitu Diosaman nayräjjapana mank'apjjaraquïta, ucatsti familianacamampi chicaw cusisipjjäta luräwinacaman achupa uñjasina, cunanacampitejj Diosamajj bendicipjjätam ucanacata.

Deuteronomio 27:7

Sumancaña sacrificionaca churapjjäta; ucatsti Diosaman nayrakatapanwa mank'apjjäta fiesta lurasina.