Éxodo 15:26 - Qullan Arunaca

²⁶ Saraquïnwa: “Jumanacatejj naya Tatitu Diosaman arunacajja suma ist'apjjäta, ucat munañajjarjam lurapjjaraquïta, uqhamarac camachinacajjarusa, leyinacajjarusa phokhapjjaraquïta ucqhajj janiw cawquïr usunactejj egipcionacar apaycta ucanacampejj t'akhesiyapcämati. Nayätwa jumanacar c'umarachir Tatitumajja” sasa.

Aymar Bibliia 1986

²⁶ Saraquïnwa: “Jumanacatejj naya Tatitu Diosaman arunacajja suma ist'apjjäta, ucat munañajjarjam lurapjjaraquïta, uqhamarac camachinacajjarusa, leyinacajjarusa phokhapjjaraquïta ucqhajj janiw cawquïr usunactejj egipcionacar apaycta ucanacampejj t'akhesiyapcämati. Nayätwa jumanacar c'umarachir Tatitumajja” sasa.

Qullan Arunaka DC

²⁶ Sarakïnwa: “Jumanakatix naya, Tatit Diosaman arunakapar sum ist'apxäta, munañaxsa lurapxäta, ukatsti kamachi arunakaxarusa, kamachinakaxarus phuqhapxarakïta ukapachaxa, janiw kawkïr mutuyäwinaktix egipcionakar apaykta ukanak apayanipkämati. Nayätwa jumanakar k'umarachir Tatitumaxa” sasa.

Éxodo 15:26 Jak'a apnaqawi uñst'ayäwi

1 Reyes 11:33

Salomonasti nayarojj apanucutuwa, ucatsti sidonios ucanacana Astarté sat diosaparuwa yupaychjje; ucatsti yupaycharaquïnwa moabitanacan Quemos sat diosaparuraqui; ucatsti yupaychänwa amonitanacan Milcom sat diosaparuraqui. Jupan luratanacapasti nayan nayrakatajjana janiw sumäquiti, janiraquiw leyinacajjsa, arsüwinacajjsa phokcaraquiti, cunjämatï David awquipajj lurcäna uqhama.

1 Reyes 11:38

Jumatejj ist'itäta take cuntejj luram siscäma ucanaca, uqhamarac luratanacamas nayan nayrakatajjana chekapäni, ucatsti phokharaquïta leyinacajjsa, camachi arunacajjsa, cunjämatï David sirvirejjajj lurquejja uqhama, nayajja jumampïyäwa, uqhamaraqui familiamsa ch'aman sayt'ayäjja, cunjämatï Davidaru lurcta uqhama; ucatsti Israeljja jumaruwa catuyäma.

2 Reyes 2:21

Eliseojj uca uma jalsuru sarasinjja jayjja wart'änwa aqham sasa: —Aqham siw Tatitojja: ‘Nayaw aca uma k'omachta, aca umajj janipuniwa jiwaycjjaniti, ni orakerus jan achursa jaytcaraquiniti’ —sasa.

2 Reyes 20:5

“Cutt'am, ucatsti marcajjana jilïri Ezequías reyiru aqham sam: ‘Nayra David awquimana Tatit Diosapajja aqham siwa: ‘Nayajj oracionamjja ist'smawa, uqhamarac jachatamsa uñjaracsmawa. Jichhasti jumarojj c'umaraptayämawa, ucatjja acat quimsa urut Tatitun temploparu saräta.

2 Reyes 22:2

Josías reyin luratanacapasti Tatitun nayrakatapanjja chekapänwa; jupasti arcänwa cunjämtï David nayra awquipajj sarnakcäna uqhamaru, jan ucat cawcsar sarakasa.

Job 5:18

Jupatejj chhojjriñchi ucajja, kolljjataraquiniwa, jupatejj amparapampi nuwantchi ucajja, samarañjja churaraquiniwa.

Salmos 103:3

Tatituw takpach juchanacajjat pampachitu, jupaw take usunacajjat c'umarachitu;

Salmos 147:3

Jupaw chuyma usuchjatanacarojj waliptayi, chhojjrinacap c'umaracharaqui.

Salmos 81:9

Janiw yakha marcanquir diosanacanïyätati, janiw yakha marcanquir diosanacarojj yupaychätati.

Éxodo 12:29

Chica arumasti Tatitojj take egipcionacan jilïr wawanacapwa jiwarayäna, faraonan jilïr wawapajj tronona kont'atäqui uca, carcelanquirinacan jilïr wawanacapa, uqhamarac uywanacan nayrïr kallunacapsa.

Éxodo 19:5

Jichhasti jumanacatejj nayan arunacajj sum ist'asina jaysapjjetäta, uqhamarac nayan jumanacampi mä suma amtäwi luratajjsa phokhapjjaraquïta ucajja jumanacasti nayan suma munat marcajjäpjjätawa take marcanac taypinjja. Ucampis take orakejja nayanquiwa.

Éxodo 19:6

Jumanacasti nayar sirviri sacerdotenacäpjjätawa, uqhamarac nayaru catuyat suma marcaraqui.’ Take acanac israelitanacar yatiyam —sasa.

Éxodo 20:2

“Nayätwa juman Tatitu Diosamajja, nayaw Egiptotjja apsunsma cawqhantejj sirviñampi t'akhesiscayäta ucqhatjja.

Éxodo 23:25

Jumasti Tatitu Diosamaruquiw yupaychäta, jupawa jumanacarojj bendicipjjätam t'ant'sa, uqhamarac umsa. “Nayasti take usunacwa jumanacatjja apakapjjäma.

Isaías 55:3

Nayan ucar jutapjjam, ucatsti ist'apjjeta, ist'apjjeta, ucatsti jacapjjätawa. Nayaw jumanacampejj wiñay arust'äwi lurä, uqhamat phokharaquï cuntejj mä uru Davidarojj munasiñampi arscta ucjja.

Isaías 57:18

Sarnakäwipjja uñjtwa, ucampis nayajj kolljjatäwa, samarañ churaraquï, chekpachansa samarataraquiw uñjasjjanejja. Llaquitanacarusti nayaw chuymachäjja,

Jeremías 11:7

Cunapachatejj awquinacaparu Egiptot apsuncäyäta ucapachasti saraquïyätwa, nayaruc jaysapjjeta sasa, ucatpacha jichhacamasti ucjja sascaquipuntwa.

Jeremías 17:24

‘Naya, Tatituw, acjja arsta: Chekpacha ist'apjjeta, marcan puncunacapansti janipuni cuna casta carganacsa apnakapjjamti samarañ urunjja; uca ursti nayaru loktanipjjeta, janiraqui uca urunjja cuna casta irnakäwsa lurapjjamti.

Jeremías 30:17

C'umar sarnakasiñ cuttayjjaraquïma, chhojjrinacamjja nayaw kolljjäma, uñisirinacamajj kawkhas parlascpan. ‘Sionajj apanucutawa, janiw qhitis jupatjja llaquiscjjeti’ sasa. Naya Tatituw ucjja arsta.”

Jeremías 33:6

Ucampisa kollapjjaraquïmawa, c'umara tucuyapjjaraquïma, ucatsti chekpachanaracwa sumana jan qhitin cun sata sarnakasjjapjjäta.

Jeremías 7:23

Ucampisa jupanacarojj saraquïyätwa nayaru ist'apjjañapa; uqhamatwa nayajj jupanacan Diosapäyäjja, jupanacasti nayan marcajjaraquïniwa sasa. Ucatsti saraquïyätwa cunjämtejj nayajj siscta uqhamar sarnakapjjañapa, uqhamat take cunas sumaqui sarañapataqui.

Jeremías 8:22

¿Janit cuna kollas Galaad chekanjja utjcpacha? ¿Janit ucanjja qhiti kollt'iris utjcpacha? ¿Cunataraqui marcajjarusti jan kollapjjesti?

Ezequiel 18:5

“Asqui jakesti cunatejj chekapäqui, asquïqui ucwa luraraqui.

Oseas 11:3

Ucampis nayaw Efraín marcarojj irpnakäyäta, uqhamarac sarnakañsa yaticharaquïyätwa; ucampis jupanacajj janiw amuyasipcänti nayan jupanacar uñjascatajja.

Oseas 6:1

Takeni jutapjjam, Tatitun ucar cuttjjañäni. Jupaw usuchjistu, juparaquiw c'umarachjjestani; chhojjriñchjistuwa, juparaquiw kolljjatjjestani.

Levítico 26:13

Nayätwa jumanacan Tatitu Diosamajja, nayaw jumanacarojj Egiptot apsunipjjaracsma jan ucan juc'ampi esclavot sarnakasipcañamataqui; cuna t'akhesiñatejj jumanacjjanccäna ucsa nayaw t'unatataracta, nayaw jumanacarojj jan cuna ajjsarasa sarnakayapjjaracsma.

Levítico 26:3

“Jumanacatejj nayan leyinacajjarjama sarnakapjjäta, uqhamarac camachi arunacajjsa phokhapjjaraquïta, ucarjamaraqui sarnakapjjäta ucapachasti,

Números 12:13

Ucatsti Moisesajj Tatitu Diosaruw mayïna aqham sasa: “Dios Tata, jumaruw achict'assma c'umarachjjañamataqui” sasa.

Deuteronomio 12:25

Janipuni mank'apjjamti, ucatsti jumanacas wawanacamasa suman jacapjjäta, Diosaru suma luräwinac uñacht'ayapjjatam laycu.

Deuteronomio 12:28

“Ist'apjjam, phokhapjjaraquim take cuntejj sapcsma uca arunaca, uqhamata jumanacasa, wawanacamasa sum sarnakapjjañamataqui, cunatejj Diosan nayrakatapana asquïqui ucanac lurasa.

Deuteronomio 13:18

cunapachatejj jumanacajj Tatitu Diosamarupuni ist'apjjäta, uqhamaraqui uca camachi arunacaparjam sarnakapjjäta, cuntejj jichhürun churapcsma ucanacaru, phokhapjjam chek sarnakasa jupan nayrakatapana.

Deuteronomio 28:27

“Diosasti, egipcionacarus t'akhesiycäna uqhamaw llejjtinacampi, tumor sat p'usunacampi, sarna usunacampi, tiña sat jasi jasi usunacampiw t'akhesiyätam, ucatsti janiraquiw uca usunacatjja c'umarachasiñ puedcätati.

Deuteronomio 28:58

“Jumatejj jan ist'cäta ni aca libron kellkat yatichäwinacarjamasa sarnakcaraquïta, ni ajjsartcaraquïtasa aca jach'a cancañan, ajjsarcaya Diosaman sutiparusa,

Deuteronomio 28:60

Ucatsti juma patjjarojj jutaniwa cawquïri lak'onacatï Egipto marcarojj apayatäcän uca pachpa lak'onaca, cawquïrinacatï wal ajjsarayayätam, ucampisti wiñayaraquiw t'akhesïta.

Deuteronomio 32:39

Naya sapaquïtwa Diosajja. Janiw yakha diosanacajj nayat sipan utjquiti. Nayaw jacañ churta, uqhamaraqui apakaractsa, nayaw usuchjaracta, uqhamaraqui kollaractsa. ¡Janiraquiw qhitis ch'amajjat khespiyirejj utjquiti!

Deuteronomio 5:1

Moisesasti Israel marcaru tantachthapisinjja sänwa: “Israelanquir jakenaca, sum ist'apjjam cawquïri leyinaca, arsutanactï jichhüru yatiyapcäma ucanacaru. Sum p'ekenacamar yatekapjjam, ucatsti take sarnakäwiman ucarjam sarnakapjjaraquim.

Deuteronomio 7:15

Tatitu Diosasti take usunaca, azot'inaca jumanacat apakapjjätam, cawquïri usunactï Egipto marcar apaycän ucanaca; ucampis take uca usunacampejj uñisirinacamaruwa t'akhesiyani.