1 Corintios 12:8 - Qullan Arunaca

⁸ Uca Ajayu tokeraquiw yakheparu cunsa sum parlt'añapataqui yatiñ ch'ama churi, uca pachpa Ajayu tokeraquiw yakheparojj take cunas wali suma uñt'añampi parlt'aña churaraqui.

Aymar Bibliia 1986

⁸ Uca Ajayu tokeraquiw yakheparu cunsa sum parlt'añapataqui yatiñ ch'ama churi, uca pachpa Ajayu tokeraquiw yakheparojj take cunas wali suma uñt'añampi parlt'aña churaraqui.

Qullan Arunaka DC

⁸ Yaqhipanakarux Qullan Ajay tuqiw yatiñ kankañampi arsuñapatak churi; yaqhipanakarusti uka pachpa Ajay tuqiw taqi kun yatiñampi arsuñ churi.

1 Corintios 12:8 Jak'a apnaqawi uñst'ayäwi

Nehemías 9:20

Ucjjarusti jumajj jupanacarojj churtawa suma ajayuma jupanacar yatichañataqui; janipuniw maná t'ant'jja mank'añapataqui pist'aycäyätati, uqhamarac umsa churäyäta pharjatäpcäna ucqhajja.

Job 32:8

Mä toketsti take jakew amuyt'anejja, take ch'amani Diosasti takeniruw amuyt'a churaraquejja.

Salmos 143:10

Munañam lurañ yatichita, nayan Diosajjätam laycu. Munasir ajayumajj cheka thaquinjamay irpitpan.

Éxodo 31:3

Ucatsti nayajj juparojj Diosan Ajayupampiw phokt'ta, uqhamarac yatiñ cancañampi, suma amuyumpi, asqui uñt'añanacampi, cunayman asqui lurañanacampiw phokt'jja,

Proverbios 2:6

Tatituwa yatiña churirejja; lacapataracwa yatiña, uñt'aña arunacapajj misturaqui.

Isaías 50:4

Tatitojj yatichituwa karitanacaru suma arunacampi chuymachañajjataqui. Sapa khantatiw nayarojj sum kont'ayitu, uqhamat suma ist'añajjataqui.

Isaías 59:21

Tatitojj siwa: “Nayaw jumanacampejj mä arust'äwi lurta, arsuractwa, ch'amajjasa, yatichäwinacajj churapcsma ucanacasa janiw jumanacatjja juc'ampi jayarst'cjjaniti, janiraquiw wawanacamatsa jayarst'caniti, wiñayan wiñayapataqui.”

Daniel (hebreo) 2:21

Jupaw urunacsa, maranacsa mayjt'ayaraqui, reyinacsa apakaraqui, uscuraqui. Yatiñaninacarusti juc'ampi yatiñwa churi, ch'iqhinacarusti juc'ampi ch'iqhi chuyma churaraqui.

Mateo 13:11

Jesusasti jupanacarojj sänwa: —Jumanacarojj Diosajj yatiyapjjtamwa cunanacatejj alajjpachan imantatäqui ucanacjja, ucampis jupanacarojj janiw yatiyatäpcänti.

Hechos 6:3

Uca laycupï jilatanaca, jumanac taypita pakallk chachanac ajllipjjañamajja. Uca chachanacasti sarnakäwinacapanjja asqui chachanacäñapawa, Kollan Ajayump phokt'ata suma amuyt'irinacaraqui. Ucatsti jupanacaru uca lurañanacjja churapjjam.

Romanos 15:14

Jilatanaca, nayajj yattwa jumanacajj qhuyapayasiñamp, yatiñ cancañampi wali phokhantatäpjjatama, yatipjjaractawa maynit maynicamar ewjjt'añsa.

1 Corintios 1:30

Jumanacarusti Dios quipcaw Jesucristompi mayaruqui tucuyapjjtam uqhamaraquiw Diosajj jiwasan yatiñ cancañasjja Jesucristompi utjayi. Uca Jesucristo tokeracwa khespiyistu, jupar catuyata tucuyaraquistu.

1 Corintios 1:5

Jesucristo toke, Diosajj ajayu token kamirïña churapjjtam, parlañansa yatiñ cancañansa.

1 Corintios 13:2

Diosat catokat arunactejj parliristjja, uqhamarac Diosan amtatanacapsa k'al yatirista, take cuns yatiraquirista, iyawsañajjas jach'araquïspa kollunac onjjtayañcamajja, ucat janiraqui munasiñanïquiristjja, janiw nayajj cunäctsa.

1 Corintios 13:8

Munasiñajj janipuniw tucusquiti. Mä urojj janiw Diosan arunacapajj parlascjjaniti, janiraquiw jan uñt'at arunacatsa parlascjjaniti, ni take cun yatiñas munascjjaraquiniti.

1 Corintios 14:26

Uqhamajj jilatanaca, jichhajj acaw utji: Cunapachatï tantacht'asipjjäta ucqhajja, jumanacatjja mayninacajj k'ochusiñwa munapjje, yakhepanacajj yaticht'aña, yakhepanacanjja utjaraquiw Diosan mä cuna yatiyäwipasa, jan ucajj jan uñt'at arunacat parlañasa, jan ucajj uca jan uñt'at arunacat parlatäquis uc khanañchañasa. Ucampis take cunas ajayu token iglesianquirinacar jiltayañataquïpan.

1 Corintios 14:6

Ucatpï jilatanaca, nayatejj jutasin jan uñt'at arunacat parlapjjäma ucqhajja ¿cuna asquirac jumanacasti jicjjatapjjasmasti? Inas cun Diosajj yatiyañ munchi jan ucajj mä chekapa arunaca, jan ucajj Diosan arunacapa jan ucajj mä yatichäwi parlañ utjchi ucqhaquiwa parliristjja.

1 Corintios 2:11

Jakenac taypitsti ¿qhitirac yatispa jaken amtatanacapsti? Cawquïritejj chuymapancqui uca ajayuquiw yatejja. Uqhamaraquipï Diosan amtatanacapjja pachpa Diosan Ajayupaquiraquipï yatejja.

1 Corintios 2:16

Diosan Kellkatapasti saraquiwa: “¿Qhitirac Tatitun amtäwinacapsti amuyt'aspasti? ¿Qhitirac Diosarusti yaticharaquispasti?” sasa. Ucampis jiwasajj Cristo Tatitun amtäwinacapanïpjjtanwa.

2 Corintios 1:12

Mayaw nanacarojj cusisiyapjjetu. Chuymanacajjajj sapjjetuwa nanacajj aca orakenjja mä suma chuymampi, uqhamarac k'oma chuymampi sarnakapjjatajja, jumanac taypinjja yämasa. Diosaw qhuyapayasiñapanjja uqham sarnakañataquejj yanapapjjetu, janiw nanacan amuyt'asipjjatanacajj laycuti.

2 Corintios 11:6

Parlatajjajj inas jan sumäcchiti ucampis yatitanacajjajj janiw uqhamäquiti. Acsti jumanacarojj uñacht'ayapjjsmawa, take cuntejj lurapcta ucanacana.

2 Corintios 2:14

Yuspagaratäpan Diosajja. Jupasti atipañarupuniw irpistu Cristomp chica, jiwas tokeraquiw arunacapsa yatiyi mä suma k'apquir kolläcaspas uqham take chekar puriyasina.

2 Corintios 4:6

Diosajj khanapjja ch'amacan khantaycäna, uca pachpa Diosaraquiw khanapjja chuymanacasan khanayi. Uca khanampisti Diosan c'ajquir cancañapajj Jesucriston ajanupan khanquis uc uñt'apjjañasataquiwa.

2 Corintios 6:6

Take ucanacsti uñacht'ayapjjaractwa suma sarnakatanacajjampi, cunatejj chekäqui uc uñt'apjjatanacajjampi, llamp'u chuymanïpjjatajjampi, suma chuymanïpjjatajjampi, uqhamarac Kollan Ajayojj nanacampïtap laycu chekpach munasiñanïpjjatajj laycuraqui,

2 Corintios 8:7

Jumanacajj take cunansa jilt'atäpjjtawa; iyawsañansa, yatichañansa, yatiñansa, cusisiñansa, nanacar munañansa. Uqhamajj jumanacajj aca munasiñampi ofrenda apthapt'añansa jilt'atäpjjañamaraquiwa.