Éxodo 20:5 - Aymar Bibliia 1986

⁵ Janiwa uca diosanac nayrakatan alt'asïtati, janiraquiw yupaychätasa, naya sapaquïtwa jumana Tatitu Diosamajja, janiw muncti yakhanacampïpjjañama, nayaraquiwa mutuyaracta awquinacan juchanacapatsa, uqhamarac cunapachatejj nayar uñisipquitu ucqhajja wawanacarusa, allchhinacarusa, allchhinacan wawanacaparusa.

Qullan Arunaca

⁵ Janiwa uca diosanac nayrakatan alt'asïtati, janiraquiw yupaychätasa, naya sapaquïtwa jumana Tatitu Diosamajja, janiw muncti yakhanacampïpjjañama, nayaraquiwa mutuyaracta awquinacan juchanacapatsa, uqhamarac cunapachatejj nayar uñisipquitu ucqhajja wawanacarusa, allchhinacarusa, allchhinacan wawanacaparusa.

Qullan Arunaka DC

⁵ Janiw uka diosanakatak killt'asïtati, janirakiw yupaychätasa, nayaw juman Tatit Diosamätxa, jan yaqhampïñam munir Diosätwa, nayar uñisir awkinakan juchapatxa, nayaw wawanakaparusa, allchhinakaparusa, allchhinakan allchhinakaparus mutuyta;

Éxodo 20:5 Jak'a apnaqawi uñst'ayäwi

2 Samuel 21:1

Davidan urunacapansti mä jach'a mach'aw quimsa mara utjaraquïna. Ucatwa Davidajj Tatituru jisct'asïna, Tatitusti juparojj saraquïnwa: “Aca mach'ajj Saúl reyin juchanacap laycu, uqhamaraqui familiapan juchanacap laycuraquiw utji, jupanacan gabaonita jakenacar jiwarayapjjatap laycu” sasa.

2 Samuel 21:6

uca jaken wawanacapatjja pakallkoni nanacar catuyapjjeta, nanacasti ucanacarojj Gabaa chekanwa, pachpa Saúl reyin marcapana, Tatitu nayrakatan warccatapjjä —sasa. Reyisti —Waliquiwa —saraquïnwa,

1 Reyes 19:10

Jupasti sänwa: “Nayajj uñjtwa jumana munasiñama take ch'amani Dios Tata, israelitanacasti juman sumancäwi arunacamjja apanucupjjewa, uqhamarac altaranacamsa allinucupjje, ucatsti espadan puntapampiwa profetanacamarojj jiwarayapjje. Naya sapaquiwa kheparjjta, jichhasti thakasipquituwa jiwayañataqui” sasa.

1 Reyes 21:29

“¿Uñjtati cunjämsa Acab reyejj nayan nayrakatajjan jisc'ar tucujja? Ucampis nayan nayrakatajjan jisc'ar tucutapatjja, janiw familiapjjarojj jan walt'añjja apayancäti jupan jacañapcama, jan ucasti wawapan jacañapanwa ucjja apayanëjja” sasa.

2 Reyes 17:35

Cunapachatï Tatitojj jupanacampi suma parlt'äwiru mantcäna ucqhajja sänwa: “Janiw yakha diosanacar yupaychapjjätati, sirvipjjätasa sacrificionaca loktasina.

2 Reyes 17:41

Uqhamawa uca marcanacajj Tatitur yupaychapjjäna, uca pachpa horasanwa yakha diosanacarus yupaychasipcaquiraquïnwa. Uca jakenacat saraker wawanacapasti nayra awquinacapjamaraquiwa uca pachpa luräwinaca lurapjjaraquïna, jichhürcamasa uqhamjja lurasipcaquiwa.

2 Reyes 23:26

Ucampis Tatitojj Judá orakenquirinacataquejj colerataquïscänwa, Manasés reyejj cuna ñankhanactejj Dios nayrakatapana lurcäna ucanacata.

2 Reyes 5:18

Ucampis maywa Tatitur achict'asta nayar perdonañapataqui, ucasti acawa: Cunapachatï reyejjajja Rimón sat diosan temploparu yupaychiri sarcani, ucatsti amparajjaru catt'asina, uqhamarac uca templona quillt'asiñajjäni ucqhajja, aca luratajjatjja Tatitojj perdonitpan —sasa.

2 Reyes 5:27

Ucampis Naamanan lepra usupaw jumaru maqhatätam, uqhamarac juman wawanacamarusa wiñayataqui. Ucatjja cunapachatï Giezi uywatajj Eliseota sarakawayjjäna ucqhajja, wali lepra usunëjjänwa, qhunur uñtata jank'oquiraquiwa uñtasïna.

2 Crónicas 25:14

Amasiasajj Edom chekanquir jakenacaru atipjasa cutt'anjjasinjja, Seir chekanquir diosanacwa apasinïna, ucatjja jupan diosanacapatwa uñt'asïna, ucanacarusti inciensonaca naqhayasawa yupaychäna.

2 Crónicas 7:19

Ucampis jumanacatejj nayat sarakapjjetäta, janiraqui leyinacajjsa, ewjja arunacajjsa churapcsma ucanac phokhapcätati, jan ucasti yakha diosanacaruraqui sirvipjjäta, yupaychapjjaraquïta ucajja,

Job 21:19

Sataraquiwa: “Diosajj awquinacapan juchanacapatjja wawanacaruw t'akhesiyi” sasa. Ucampisa pachpa ñankha jakew t'akhesiscañapajja, juchapatsa phokhascañaparaquejja.

Job 5:4

Wawanacapasti janiraquiw qhiti yanapt'irsa jicjjatasquiti; tribunalanacansti janiraquiw chekaparu jupanacarojj uñjapquiti, janiraquiw qhiti arjjatasiris jupanacataquejj utjquiti.

Salmos 109:14

Awquipan ñankha luratanacap Tatitojj amtaspan, taycapan juchapsti janirac pampachpati;

Salmos 78:58

jucha lurañ altaranacapampiw Diosarojj k'apisiyapjjäna, acapach diosanacar yupaychatapampiw Diosan chuymap mayjt'ayapjjäna.

Salmos 79:8

Nayra awquinacajjan juchanacapatjja, janiquiy nanacar mutuyapjjestati; qhuyapayasiñamajj janc'aquiy purinpan, nanacajj aynacht'ataw uñjasipjjta.

Salmos 81:15

Tatitur uñisirinacajj ajjsarañat liwirtapjjaspa, juchañchäwipasti jan mayampitaquïspawa.

Éxodo 23:24

Ucampis uca marcanacajj cuna jan walinactejj lurqui ucanacjja janiraquiw luraraquïtati. Jumasti diosanacaparojj janiw quillt'asisa yupaychätati, jan ucasti uca diosanacapjja p'aquinokasaw tak tucjäta; uqhamarac jach'a kalanacapsa.

Éxodo 34:14

“Janipuniw yakha diosanacarojj yupaychapjjätati, Diosasti janiw munquiti yakhampïpjjañama, jan yakhampïñap muniri sataraquiwa.

Proverbios 8:36

Ucampis qhititï nayar jan jicjjatquitu ucajja, jacañapwa aynacht'añaru apasqui; ¡nayar take uñisirinacasti jiwaruwa munasipqui!”

Isaías 44:15

Jaketaquejj uca kokanacajj nina phichhañataquiw wali, jisc'a lawanac apasipjje ucampiraquiw junt'uchasipjje, mayanacampisti t'ant'a lurasipjjaraqui; mayninacasti uca lawanacjja mä diosa lurasiñataquiw apasipjjaraqui, ucat uca diosar yupaychañataqui diosäcaspas uqhama.

Isaías 44:19

Janiw amuyt'añar uscusipquiti, jupanacarojj amuyt'asiñ chuymaw jan utjquiti, ucatsti sapjjañapataqui: “Chicat maderjja naqhaytwa, ucampiraquiw t'ant'a lurastjja, aychsa ucan cancasiractjja ucat mank'aractjja; take uca jilt'atsti aca ajjtascañ yänaca luraractjja, ¡cunarutejj nayajj yupaychascta ucajj mä jisc'a lawaquiwa!”

Jeremías 2:9

“Ucatwa naya, Tatitojj, arsta: Mä juchañchäwi lurä jumanacampi uqhamarac allchhinacamampisa.

Jeremías 32:18

Jumasti jakenacarojj qhuyapayasiñamjja wawanacapan wawanacaparuraquiw uñacht'aytajja, uqhamaraquiwa jakenacarus mutuyaractawa awquinacapan juchanacapatjja. ¡Jach'a ch'amani Dios, sutimajj Take Ch'amani Dios satawa!

Ezequiel 18:19

Jumanacasti jichhajj sapjjätawa: ‘¿Cunatarac wawasti awquipan juchanacap jan phokhesti?’ sasa. Jïsa, wawajj cunatejj chekapäqui, cunatejj asquïqui ucwa phokharaqui, take leyinacajjsa phokharaquiwa; ucatwa jichhajj jacanejja.

Ezequiel 18:2

“¿Cunats Israel marcana parlasi aqham säwejja: ‘Awquinacaw c'allc'u uvanac mank'antapjjatayna, ucat jichhajj wawanacajj laca c'amancamaqui’ sasajja?

Ezequiel 20:7

Nayasti takpachaniruw saractjja uca ajjtascaña diosanacapjja apanucjjapjjañapa, uqhamaraqui Egiptonquir yakha diosanacampisa jani k'añuchasipjjañapa, naya Tatitojj Diosätajj laycu.

Ezequiel 39:25

Ucatpï jichhajj Tatitojj sejja: “Jichhajj take Israel marcpachatwa qhuyapayasëjja, take Jacobon wawanacapata. Jichhajj Israelan sarnakäwipajj sumäjjaniwa, uqhamat wayt'añajjataqui nayan kollan sutejjajj suma uñjatäñapataqui.

Ezequiel 8:3

Uca jakesti cunatejj amparapjamäcäna uc loktanisaw ñic'utat catuntitu. Ucatwa Diosan ch'amapajj alayaru waytitu, ucatsti cuna unañchäwinactejj Diosajj uñacht'ayquitu, uca tokwa Jerusalén marcaru irpitu, ucatsti marca mankhana puncu chekaruw sayt'ayaraquitu, cawquïri puncutejj amsta tokencqui ucqharu, uca chekancaraquïnwa cawquïri c'ari diosatejj Tatituru colerayqui ucajja.

Daniel (hebreo) 1:2

Tatitusti Joacim reyirojj Nabucodonosor reyimpiw catuntayäna, cuna yänacatejj templon utjcäna ucanacsa Nabucodonosor reyiruw catuyaraquïna. Nabucodonosor reyisti jakenacjja preso apasjjäna Babilonia marcaru, Diosan templopata apsuta kollana yänacsa diosanacapan yänacapampi chicwa uscjjaraquïna;

Daniel (hebreo) 3:18

Janis khespiyapquitani ucasa, juma, jach'a reyejj, yatiñamawa, janipuniw nanacajj uca korit lurata diosa nayrakatarojj quillt'asisina yupaychapquiristti —sasa.

Levítico 20:5

uca quipcaraqui familiapa contrasa, ucatsti jakenac taypitjja jiwayjjaraquïwa, take qhitinacatejj jupampi chica k'añuchasipcänjja ucanacampi chica, uqhamarac Moloc sat diosan ucarusa sarapcatayna ucanacampi chica.

Levítico 26:1

“Janipuni cuna casta yakha diosanacsa ni lluch'itanacsa lurasipjjamti; janiraqui jumanacan marcamanjja sirviña kalanacsa sayt'ayasipjjamti, ni cuna casta kellkani kalanacsa; janiraqui ucanac nayrakatarojj quillt'asipjjamti. Nayätwa jumanacan Tatitu Diosamajja.

Levítico 26:29

Ucapachaw jumanacajj pachpa imill wawanacama, uqhamarac yokall wawanacamsa mank'arasjjapjjäta.

Nahúm 1:2

“Tatitojj mutuyiri celoso Diosaraquiwa; qhitinacatejj jupa conträpqui ucanacarojj mutuyiwa, uñisirinacapampisti walrac colerasiraqui.

Números 14:18

“Janiw janc'aqui colerasirïcti, wali jach'aw qhuyapayasiñajjajja, uqhamarac perdonaractwa ñankhanacsa, naya contra sayt'asiñanacsa, janiraquiw juchanirojj jan mutuyata jaytcaractti jan ucasti mutuyaractawa awquinacapan juchanacapatjja wawanacapan wawanacaparu” sasa.

Números 14:33

Wawanacamasti pusi tunca maraw awatirit jacapjjaraquini, uqhamatwa jupanacajj jumanacan jan iyawsatanacamjja phokhapjjani, take jumanacan aca wasaran jiwarapjjañanacamcama.

Números 25:11

—Finees sat chachaw israelitanac toke colerasitajjjja t'acurayjjetu, jupasti nayjamaraquiwa colerasïna nayan jach'a cancañajj sum uñjañataqui, ucatwa jupanacarojj colerasiñajjampi jan tucjcjjäti.

Mateo 4:9

Ucatsti sänwa: —Take acanac nayajj churäma, jumatejj quillt'asisin nayar yupaychitäta ucajja —sasa.

Juan 15:18

“Acapachatejj jumanacar uñisipjjstam ucajja, yatipjjam nayaruw nayrakata uñisipjjetäna.

Juan 7:7

Acapachanquirinacajj janiw jumanacarojj uñisipquiristamti, ucampis nayarojj uñisipjjetuwa, nayan jupanacaru jan wali luratanacap khanañchatajj laycu.

Juan 9:2

Discipulonacapasti jisct'apjjänwa: —Yatichiri, ¿cunatsa aca jakejj uqham juyqhu naci? ¿Awquinacapan juchap laycuti, jan ucajj jupan juchapa laycucha aqham naciñapataquejja? —sasa.

Romanos 1:30

Jake masinacapatjja jan walinac parlapjje, Diosarusti uñisipjjaraquiwa, ñankhanacaracwa arsupjje, wali wali tucurinaca, jach'achasirinaca, jan walinac uñstayirinaca, awquipar jan jaysirinaca,

Romanos 8:7

Janchin jacañat llaquisirinacajja Diosan uñisiripäpjjewa, ucatsti janiw Diosarojj munapquiti ni camachi arunacaparusa jaysapcaraquiti.

1 Corintios 10:22

¿Jan ucajj Tatituruch colerayañänejja? ¿Jiwasajj Tatitut sipansa juc'ampi ch'amanïtancha?

Deuteronomio 32:21

Cawquïri diosatï jan diosäqui ucampiw colerayapjjestajja, uca jan yäkat diosanacampiw colert'ayapjjaraquista; ¡ucatwa nayajj colerayapjjaraquïma jan amuyun jakenacampi, cawquïritejj jan marcäqui, uca marcampiw colerayapjjaraquïma!.

Deuteronomio 32:41

Cunapachatejj lliphipquir espadajj afilasi, ucat cheka cancañajj laquintaraqui, ucapachaw uñisirinacajjatjja phoksusëjja. ¡Uqhamaraquiw phoksusëjja qhitinacatejj uñisipquitu ucanacatsa!

Deuteronomio 4:24

¡Jumanacan Tatitu Diosamasti, tumpasir Diosawa, take cuns naqhantir ninjamawa!

Deuteronomio 5:10

Ucatsti waranka warankanacaruw munasiñampi uñjaracta, qhitinacatejj nayaru munapquitu, camachi arunacajjsa phokhapcaraqui ucanacarojja.

Deuteronomio 5:9

Janiw ucanacar quillt'asïtati ni yupaycharaquïtasa; nayätwa Diosamajja wali ch'amani, janiraquiw muncti yakhampïpjjañamsa. Awquinacan juchanacapatsti wawanacan wawanacaparuw azot'iraquëjja, qhitinacatejj uñisipquitu ucanacaru.

Deuteronomio 6:15

Jumanacampïqui uca Tatitu Diosasti janiw munquiti yakhampïpjjañama, ucatsti jumanac tokwa colerasispa, take jumanacaru t'unjañataqui.

Deuteronomio 7:10

Ucampis mutuyaraquiwa qhititï juparu uñisqui ucarojja. Janc'aquiraquiw jupajj mutuyi qhititï juparu uñisqui ucarojja.

Santiago 4:4

¡Jan Diosa chuyma jakenaca! ¿Janit jumanacajj yatipcta acapachampi sumancañajj Diosampi jan walincañätapjja? Qhititejj aca pachampi sumancañ munqui ucajj Diosan uñisiripawa.

Josué 23:16

jumanacatejj Diosampi mantatäqui uca amtäwiru jan phokhapcäta, yakha diosanacaru yupaychapjjäta, uqhamaraqui quillt'asipjjätasa ucqhajj Diosajj jumanacataquejj colerasiniwa, ucatsti janc'aquiw aca suma orake churapctam ucatjja chhaktayapjjätam.”

Josué 23:7

Uqhamaraqui jumanac taypin jaquir yakha marcanquir jakenacampejj janipuni chicachasipjjamti, janiraqui diosanacaparus yupaychapjjamti ni ist'apjjamsa, ucatsti janiraqui cunataquis uca diosanacapan sutinacapjja aytasipjjamti ni jurapjjamsa, ni uca diosanacarus alt'asipjjamti.

Josué 24:19

Ucampisa Josué chachajj jupanacarojj sänwa: —Jumanacajj janiw Diosarojj sirviñ puedipcasmati, jupasti Kollana Diosawa, janiraquiw jumanacan jan wali sarnakäwinacama ni jucha luratanacamsa inaqui uñjcaniti.

Jueces 2:19

Cunapachatejj uca jilïrejj jiwjjäna ucqhajja, jupanacajj pachpa jan wali lurañanacaruraquiquiw cutt'apjjäna, uqhamata nayra awquinacapat sipansa juc'ampi jan walinaca tucusina yakha diosanacaru sirvisina, yupaychasina. Jupanacasti janiwa apanucuña munapcänti jan wali lurañanacapa, uqhamarac jan wali sarnakañanacapsa.