Psalms 61 - Die Bybel 2020-vertaling

¹ Vir die •musiekleier. Met snarespel. Van Dawid.

² Hoor my klaagroep, o God, luister aandagtig na my gebed.

³ Van die einde van die aarde roep ek na U, wanneer my moed my begewe. Lei my na 'n rots wat vir my te hoog is;

⁴ want U is vir my 'n skuilplek, 'n versterkte toring teen die vyand.

⁵ Ek wil vir altyd in u tent vertoef, ek wil skuil onder die beskutting van u vlerke. •Sela

⁶ U is immers die Een wat luister na my geloftes, o God; U gee 'n erfdeel aan hulle wat vir u Naam ontsag het.

⁷ Vermeerder tog die dae van die koning se lewe, mag sy lewensjare geslagte lank duur,

⁸ mag hy altyd voor God regeer. Voorsien toewyding en waarheid, laat dit oor hom wag hou!

⁹ Só wil ek u Naam vir altyd besing, om my geloftes dag ná dag te betaal.