Psalms 37 - Die Bybel 2020-vertaling

¹ Van Dawid. Moet jou nie ontstel oor die kwaaddoeners nie; moenie afgunstig wees op hulle wat kwaadwillig optree nie,

א ALEF

א ALEF

² want soos gras verdor hulle vinnig, en soos groen plante verwelk hulle.

ב BET

ב BET

³ Vertrou op die Here en doen die goeie, bewoon die land en waak oor betroubaarheid.

⁴ Vind jou vreugde in die Here, dan sal Hy jou gee wat jou hart begeer.

ג GIMEL

ג GIMEL

⁵ Vertrou jou lewenspad aan die Here toe, vertrou op Hom, en Hy sal optree.

⁶ Hy sal jou •geregtigheid soos die oggendlig laat verskyn en jou reg soos die middagson.

ד DALET

ד DALET

⁷ Wees stil voor die Here, en krimp ineen van vrees voor Hom. Moet jou nie ontstel oor iemand wat sukses behaal op sy lewenspad nie, oor 'n mens wat komplotte smee nie.

ה HE

ה HE

⁸ Moenie kwaad word nie en laat vaar die woede; moet jou nie ontstel nie, dit bring net kwaad.

⁹ Want kwaaddoeners sal vernietig word, maar wie op die Here wag – hulle sal die land besit.

ו WAW

ו WAW

¹⁰ Nog net 'n rukkie, dan sal daar geen goddelose meer wees nie. Jy sal sy plek dophou, maar hy sal nie daar wees nie.

¹¹ Die verdruktes sal die land besit en hulle verlustig in die oorvloed vrede.

ז ZAJIN

ז ZAJIN

¹² 'n Goddelose beplan onheil teen die regverdige en kners op sy tande vir hom.

¹³ My Heer lag vir hom, want Hy sien dat sy dag kom.

ח GET

ח GET

¹⁴ Goddeloses trek die swaard en span hulle boog om die magtelose en behoeftige neer te vel, om dié wat opreg leef, af te slag.

¹⁵ Hulle swaard sal hulle eie hart binnedring, en hulle boë sal gebreek word.

ט TET

ט TET

¹⁶ Die bietjie wat 'n regverdige het, is beter as die oorvloed van baie goddeloses.

¹⁷ Want die arms van goddeloses sal gebreek word, maar die Here ondersteun regverdiges.

י JOD

י JOD

¹⁸ Die Here dra sorg vir die lewensdae van hulle wat onberispelik leef: Hulle erfdeel bly vir altyd behoue.

¹⁹ Hulle sal nie beskaamd staan in 'n tyd van teenspoed nie, en in tye van hongersnood is hulle versadig.

כ KAF

כ KAF

²⁰ Maar goddeloses gaan tot niet, die vyande van die Here – soos kosbare weiveld verdwyn hulle, in 'n rookwolk verdwyn hulle.

ל LAMED

ל LAMED

²¹ 'n Goddelose leen en betaal nie terug nie, maar 'n regverdige is goedhartig en mededeelsaam.

²² Ja, wie deur Hom geseën is, sal die land besit, maar wie deur Hom vervloek is, sal uitgeroei word.

מ MEM

מ MEM

²³ Danksy die Here stap 'n jong man met ferm treë; en die Here is tevrede met sy lewenspad.

²⁴ As hy val, sal hy nie neerslaan nie want die Here hou hom aan sy hand.

נ NUN

נ NUN

²⁵ Toe ek jonk was en selfs noudat ek oud geword het, het ek nie gesien dat 'n regverdige versaak word, of dat sy nageslag kos soek nie.

²⁶ Hy is altyd goedhartig en leen graag uit, sy nageslag is 'n seën vir ander.

ס SAMEK

ס SAMEK

²⁷ As jy die kwaad vermy en die goeie doen, sal jy vir altyd die land bewoon.

²⁸ Want die Here het •geregtigheid lief en wie aan Hom getrou is, verlaat Hy nie; en hulle word vir altyd beskerm, maar die nageslag van goddeloses word uitgeroei.

ע AJIN

ע AJIN

²⁹ Regverdiges sal die land besit en vir altyd daarin woon.

פ PE

פ PE

³⁰ Die mond van 'n regverdige prewel wysheid en sy tong praat wat reg is.

³¹ Die wet van sy God is in sy hart, sy voete sal nie struikel nie.

צ TSADE

צ TSADE

³² 'n Goddelose hou die regverdige dop, en is daarop uit om hom dood te maak.

³³ Die Here gee hom nie oor in sy hand nie, en veroordeel hom nie wanneer hy teregstaan nie.

ק KOF

ק KOF

³⁴ Wag op die Here, en hou by sy pad, dan sal Hy jou aansien gee om grond te besit. Jy sal toekyk wanneer goddeloses uitgeroei word.

ר RESJ

ר RESJ

³⁵ Ek het 'n goddelose gesien, 'n gewelddadige, wat gedy het soos 'n lowerryke, inheemse boom,

³⁶ maar toe iemand weer daar verbygaan, was hy weg! En toe ek hom soek, was hy nêrens te vinde nie.

שׁ SJIN

שׁ SJIN

³⁷ Let maar op 'n onbesproke mens, kyk maar na 'n opregte, want 'n vredeliewende mens het 'n toekoms;

³⁸ maar oortreders word almal saam uitgedelg, die toekoms van goddeloses word kortgeknip.

ת TAW

ת TAW

³⁹ Regverdiges se verlossing kom van die Here – hulle toevlug in 'n tyd van verdrukking.

⁴⁰ Die Here help hulle en bevry hulle. Hy bevry hulle van goddeloses en verlos hulle, want hulle skuil by Hom.