2 Samuel 15:11 - Die Bybel 2020-vertaling

¹¹ Saam met Absalom het tweehonderd man uit Jerusalem vertrek, genooides wat in onskuld saamgegaan en van die hele saak niks geweet het nie.

Bybel vir almal

¹¹ Absalom het 200 manne van Jerusalem genooi, en hulle het saam met hom gegaan. Hulle het nie saam met hom planne gemaak nie en hulle het nie geweet wat hy wil doen nie.

Afrikaans 1933-1953

¹¹ En uit Jerusalem het tweehonderd man met Absalom saamgetrek wat genooi was en in hulle onskuld gegaan het sonder dat hulle van die hele saak iets geweet het.

Afrikaans 1983

¹¹ Saam met Absalom was daar twee honderd genooides wat te goeder trou uit Jerusalem saamgegaan het. Van die hele sameswering het hulle niks geweet nie.

Contemporary Afrikaans Bible 2023

¹¹ En saam met Absalom het twee honderd man uit Jerusalem uitgetrek wat geroep is; en hulle het in hulle eenvoudigheid gegaan, en hulle het niks geweet nie.

Die Boodskap

¹¹ Daar het 200 mans saam met Absalom van Jerusalem af na Hebron toe gegaan. Hulle was genooi en het ewe onskuldig saamgegaan, want hulle het niks van die hele affêre geweet nie.

Nuwe Lewende Vertaling

¹¹ Hy het 200 gaste uit Jerusalem saamgeneem. Hulle het niks geweet van die hele plan nie.

2 Samuel 15:11 Kruisverwysings

Genesis 20:5

Het hy self dan nie vir my gesê, ‘Sy is my suster’ nie? En sy, ook sy het gesê, ‘Hy is my broer.’ Met 'n eerlike hart en met rein hande het ek hierdie ding gedoen.”

Spreuke 14:15

Onkundiges glo elke woord, maar 'n slim mens oorweeg sy voetstappe.

Spreuke 22:3

'n Slim mens sien gevaar en skuil, maar onverstandiges gaan voort en betaal die prys.

Matteus 10:16

“Kyk, Ek stuur julle uit soos skape onder die wolwe. Wees dan behoedsaam soos slange en onskuldig soos duiwe.

1 Samuel 22:15

Het ek nou eers God vir hom begin raadpleeg? Hoegenaamd nie! Die koning moet nie sy dienaar en sy hele familie by die saak betrek nie, want u dienaar het van hierdie hele saak, groot of klein, niks geweet nie.”

1 Samuel 9:13

Sodra u die dorp binnegaan, sal u hom teëkom voordat hy na die offerhoogte opgaan om te eet; want die mense eet nie voordat hy kom nie, omdat hy die een is wat die offer moet seën. Eers daarna eet die genooides. Gaan dan op, want u sal hom nou daar aantref.”