Mga Awit 1 - Ang Salita ng Dios

Salmo 1 Mapalad ang Taong Matuwid

¹ Mapalad ang taong hindi namumuhay ayon sa payo ng masasama, o sumusunod sa mali nilang halimbawa, at hindi nakikisama sa mgataong nangungutya.

² Sa halip ay nagagalak siyang sumunod sa mga aral na mula sa Panginoon, at araw-gabi ito ay kanyang pinagbubulay-bulayan.

³ Ang katulad niyaʼy isang punongkahoy na itinanim sa tabi ng sapa, na namumunga sa takdang panahon at hindi nalalanta ang mga dahon. Magtatagumpay siya sa anumang kanyang ginagawa.

⁴ Ngunit iba ang mga taong masama; silaʼy parang ipa na tinatangay ng hangin.

⁵ Parurusahan sila ng Dios sa araw ng paghatol, at ihihiwalay sa mga matuwid.

⁶ Sapagkat pinapatnubayan ng Panginoon ang mga matuwid, ngunit ang buhay ng taong masama ay hahantong sa kapahamakan.