උපදේශකයා හෙවත් සිරාක් 44 - Sinhala New Revised Version 2018

ආදි පියවරුන් පැසසීම

¹ පරපුරෙන් පරපුරට පැමිණි අපගේ ආදි පියවරුන් වන සත්කීර්තිමත් මිනිසුන් පැසසීම අපි දැන් අරඹමු.

² සමිඳාණෝ විපුල මහිමයෙන් ඔවුන් සැරසූ සේක. ආදි යුගයෙහි සිට සිය ශ්‍රේෂ්ඨත්වය විදහා ලූ සේක.

³ ඇතැමෙක් භූපතීන් මෙන් අධිකාරි බලය පෙන්වූ හ. මෙලෙස ඔවුන්ගේ බලසම්පන්නකම නිසා ඔව්හු යසස් ලත්හ. ඇතැමෙක් නුවරුන්ට උපදේශකයෝ වූ හ. ඔව්හු දූරදර්ශී දිවැස් වැකි ප්‍රකාශ කළහ.

⁴ ඇතැමෙක් තම උවදෙස් මඟින් ද පොදු ජනතාව පිළිබඳ නැණනුවණින් ද තම ඉගැන්වීම්හි පැණසර වදනින් ද ජනතාවට මඟ පෙන්වූ හ.

⁵ ඇතැමෙක් කන්කලු ගීත රචනය කළහ. මෙලෙස ඔව්හු සැහැලි ගෙතූ හ.

⁶ ඇතැමෙක් ධනවත් වූ හ, බලවත් වූ හ; සාමකාමී ව සිය නිවෙස්හි විසූ හ.

⁷ මේ සියලු දෙන තත්කාලීනයන් විසින් ගරු කරනු ලැබූ හ. ඔව්හු සිය ජීවිත කාලයෙහි දී මහිමවත් වූ හ.

⁸ ඔවුන් අතරෙහි සමහරෙක් උදාර නාමයක් තබා ගියහ. එබැවින් තවමත් ඔවුන්ගේ ගුණ ගයනු ලැබේ.

⁹ තවත් අය ඔවුන් සිහි වීමට කිසිවක් තබා නොගියහ. ජීවත් වී නො සිටියාක් මෙන් ඔව්හු නොපෙනී ගියහ. දැන් ඔවුන් මිහි පිට කිසි දාක නොසිටියාක් මෙනි. ඔවුන්ගෙන් පැවතෙන දරුවන්ට ද එලෙස වනු ඇත.

¹⁰ එහෙත් මෙන්න, සත්ගුණවත් මිනිසුන්ගේ නාමාවලියක්. ඔවුන්ගේ සාධු ක්‍රියා අමතක වී ගොස් නැත.

¹¹ ඔවුන්ගේ පරපුරෙන් පැවතෙන අය අතර, ඔවුන්ගෙන් ජනිත, වටිනා ප්‍රවේණියක් ඇති වන්නේ ය.

¹² ඔවුන්ගෙන් පැවතෙන්නෝ ගිවිසුම්වලට ගරු කරති. ඔවුන් නිසා ඔවුන්ගේ දරුවන්ගේ දරුවෝ ද එලෙස කරති.

¹³ ඔවුන්ගේ දරුදැරියෝ සදා පවතින්නෝ ය. ඔවුන්ගේ මහිමය මලානික නොවනු ඇත.

¹⁴ ඔවුන්ගේ මළසිරුරු සාමයෙන් වළලන ලදී. පරපුරෙන් පරපුරට ඔවුන්ගේ නාමය පවතිනු ඇත.

¹⁵ සෙනඟ ඔවුන්ගේ ප්‍රඥාව පවසන්නෝ ය. සභාව ඔවුන් ගැන පසස් ගී ගයන්නී ය.

ඒනොක්

¹⁶ ඒනොක් සමිඳුන් හට ප්‍රසන්න වූයේ ය. ඔහු හැරගෙන යන ලද්දේ ය. සිය පරම්පරාවල සිත් හැරීමට ආදර්ශයකි.

නෝවා

¹⁷ නෝවා සම්පූර්ණ ලෙස දැහැමි ව සිටියේ ය. උදහස පැමිණි කාලයේ දී ඔහුගේ වංශය විනාශයෙන් ගළවා නැවත ඇති කළ සේක. ජලගැල්ම ඇති වූ කාලයෙහි දී ඔහු නිසා පොළොවෙහි ඉතා කුඩා පිරිසක් ආරක්ෂා කරන ලද්දේ ය.

¹⁸ ජීවමාන සත්ත්වයා නැවත ජලගැල්මකින් විනාශ නොවන පිණිස සදාකාලික ගිවිසුමක් ඔහු සමඟ පිහිටුවන ලද්දේ ය.

ආබ්‍රහම්

¹⁹ ආබ්‍රහම් ජාතීන් සමූහයකගේ කීර්තිමත් ආදි පියා විය. කිසිවෙක් මහිමයෙන් ඔහුට සමාන නො වී ය.

²⁰ ඔහු මහෝත්තමයාණන් වහන්සේගේ නීතිය ඉටු කෙළේ ය; උන් වහන්සේ සමඟ ගිවිසුමක් කෙළේ ය. මේ ගිවිසුම ඔහු තම මාංසයෙහි ස්ථිර කෙළේ ය. පරීක්ෂා කරනු ලැබූ කාලයෙහි දී ඔහු විශ්වාසී ව සිටියේ ය.

²¹ එහෙයින් සමිඳාණෝ ඔහුගෙන් පැවත එන්නන් තුළ සියලු ජාතීන්ට ආශීර්වාද කිරීමට ද ඔහුගෙන් පැවත එන්නන් පොළොවේ වැලි මෙන් වැඩි කිරීමට ද අහසේ තරු මෙන් ඔවුන් උසස් කිරීමට ද මුහුදේ පටන් තවත් මුහුදක් දක්වාත් මහා ගංගාවේ පටන් පොළොවේ කෙළවර දක්වාත් දේශය ඔවුන්ගේ උරුමය වශයෙන් දීමට ද ගිවිසුමෙන් පොරොන්දු වූ සේක.

ඊසාක් සහ ජාකොබ්

²² උන් වහන්සේ ඊසාක්ට ඔහුගේ පියා වූ ආබ්‍රහම් නිසා සිය මනුෂ්‍යයන් කෙරෙහි ආශීර්වාදය අලුත් කළ සේක. ජාකොබ්ගේ හිස පිට ගිවිසුම පවතින්නට සැලැසූ සේක.

²³ උන් වහන්සේ ඔහුගේ ආශීර්වාදයන් තුළ ඔහු ස්ථිර කළ සේක. දේශය ඔහුගේ උරුමය වශයෙන් දුන් සේක. උන් වහන්සේ එය කොටස්වලට බෙදා, ගෝත්‍ර දොළොස අතර හවුල් කොට දුන් සේක.