ဆာ​လံ 6 - မြန်​​​မာ့​​​စံ​​​မီ​​​သမ္မာ​​​ကျမ်း​​

သနားတော်မူရန်ဆုတောင်းခြင်း

ဂီတမှူး​အတွက်​၊ ကြိုးတပ်​တူရိယာ​များ​ဖြင့်​၊ ရှစ်​ကြိုး​တပ်​စောင်း​သံစဉ်​၊ ဒါဝိဒ်​၏​ဆာလံ

¹ အို ထာဝရဘုရား​၊ ကိုယ်တော်​၏​အမျက်​တော်​ဖြင့် အကျွန်ုပ်​ကို​ဆုံးမ​တော်​မ​မူ​ပါ​နှင့်​။ ကိုယ်တော်​၏​အမျက်ဒေါသ​ဖြင့် အကျွန်ုပ်​ကို​ပဲ့ပြင်​တော်​မ​မူ​ပါ​နှင့်​။

² အို ထာဝရဘုရား​၊ အကျွန်ုပ်​သည် အားအင်ချည့်နဲ့​နေ​သည်​ဖြစ်၍ အကျွန်ုပ်​ကို​သနား​တော်မူ​ပါ​။ အို ထာဝရဘုရား​၊ အကျွန်ုပ်​အရိုး​တို့​သည် ထိတ်လန့်​လျက်​ရှိ​ကြ​သည်​ဖြစ်၍ အကျွန်ုပ်​ကို​ကျန်းမာ​စေ​တော်မူ​ပါ​။

³ အကျွန်ုပ်​၏​စိတ်ဝိညာဉ်​သည်​လည်း အလွန်​ထိတ်လန့်​နေ​ပါ​၏​။ အို ထာဝရဘုရား​၊ မည်မျှ​ကြာ​ပါ​မည်နည်း​။

⁴ အို ထာဝရဘုရား​၊ တစ်ဖန်​ကြွလာ​၍ အကျွန်ုပ်​၏​စိတ်ဝိညာဉ်​ကို ကယ်မ​တော်မူ​ပါ​။ ကိုယ်တော်​၏​မေတ္တာကရုဏာ​တော်​ကို​ထောက်၍ အကျွန်ုပ်​ကို ကယ်တင်​တော်မူ​ပါ​။

⁵ အကြောင်းမူကား သေလွန်သူ​တို့​အလယ်​တွင် ကိုယ်တော်​ကို​အောက်မေ့​ခြင်း​မ​ရှိ​ပါ​။ မရဏာနိုင်ငံ​တွင် ကိုယ်တော်​ကို​မည်သူ​ချီးမွမ်း​ပါ​မည်နည်း​။

⁶ အကျွန်ုပ်​သည် ညည်းတွား​ရ​သဖြင့်​ပင်ပန်း​လှ​ပါ​၏​။ ညစဉ်ညတိုင်း အကျွန်ုပ်​၏​မျက်ရည်​များ​ဖြင့် အကျွန်ုပ်​၏​ညောင်စောင်း​သည် အိုင်ထွန်း​၍ အကျွန်ုပ်​၏​ခုတင်​သည် စိုရွှဲ​လျက်​ရှိ​ပါ​၏​။

⁷ အကျွန်ုပ်​၏​မျက်စိ​သည် ပူဆွေး​ခြင်း​ကြောင့်​အားယုတ်​၍ အကျွန်ုပ်​၏​ရန်သူ​အပေါင်း​တို့​ကြောင့် မှုန်ဝါး​သွား​ပါ​၏​။

⁸ အပြစ်ဒုစရိုက်​ပြု​သော​သူ​အပေါင်း​တို့​၊ ငါ့​ထံမှ​ထွက်သွား​ကြ​လော့​။ အကြောင်းမူကား ထာဝရဘုရား​သည် ငါ​၏​ငိုကြွေး​သံ​ကို​ကြား​တော်မူ​ပြီ​။

⁹ ထာဝရဘုရား​သည် ငါ​၏​အသနားခံချက်​ကို ကြား​တော်မူ​ပြီ​။ ထာဝရဘုရား​သည် ငါ​၏​ဆုတောင်းချက်​ကို လက်ခံ​တော်မူ​၏​။

¹⁰ ငါ​၏​ရန်သူ​ရှိသမျှ​တို့​သည် အရှက်ကွဲ​၍ အလွန်​ထိတ်လန့်​ကြ​လိမ့်မည်​။ သူ​တို့​သည် ပြန်လှည့်​၍ ချက်ချင်း​ပင်​အရှက်ကွဲ​ကြ​လိမ့်မည်​။