ယေ​ရ​မိ 47 - မြန်​​​မာ့​​​စံ​​​မီ​​​သမ္မာ​​​ကျမ်း​​ မြန်​​​မာ့​​​စံ​​​မီ​​​သမ္မာ​​​ကျမ်း​​
ယေ​ရ​မိ 47

¹ ဂါဇ​မြို့​ကို ဖာရော​မင်းကြီး မ​တိုက်ခိုက်​မီ ဖိလိတ္တိ​လူမျိုး​တို့​နှင့်​ပတ်သက်၍ ထာဝရဘုရား​၏​နှုတ်ကပတ်တော်​သည် ယေရမိ​ထံ ရောက်လာ​၏​။

² ထာဝရဘုရား​က “​ကြည့်ရှု​လော့​။ ရေ​သည် မြောက်အရပ်​မှ​တက်လာ​၍ မြစ်ရေ​လျှံ​သကဲ့သို့ လျှံတက်​လိမ့်မည်​။ ထို​ရေ​သည် ပြည်​နှင့်​ထို​ပြည်​၌​ရှိသမျှ​၊ မြို့​နှင့်​မြို့သား​ရှိသမျှ​တို့​ကို လွှမ်းမိုး​လိမ့်မည်​။ လူ​တို့ အော်ဟစ်​ကြ​လိမ့်မည်​။ ပြည်သူပြည်သား​တို့ ညည်းတွားငိုကြွေး​ကြ​လိမ့်မည်​။

³ မြင်းခွာသံ​တခွပ်ခွပ်​၊ စစ်ရထား​သံ​တဂျုန်းဂျုန်း​၊ ဘီးလိမ့်​သံ​တဒုန်းဒုန်း​ကြောင့် ဖခင်​တို့​သည် လက်မှိုင်ချ​၍ သူ​တို့​၏​ကလေး​များ​ကို​ပင် လှည့်​မ​ကြည့်​နိုင်​ကြ​။

⁴ ဖိလိတ္တိ​လူမျိုး​အားလုံး​ကို ဖျက်ဆီး​မည့်​နေ့​၊ တိုင်ရာ​မြို့​နှင့်​ဆီဒုန်​မြို့​တို့​ကို စစ်ကူပေး​သော​ကြွင်းကျန်သူ​ရှိသမျှ​တို့​ကို ပယ်ဖျက်​မည့်​နေ့ ရောက်လာ​ပြီ​။ ထာဝရဘုရား​သည် ကတ္တောရ​ကျွန်း​ရှိ ကြွင်းကျန်​သော​ဖိလိတ္တိ​လူမျိုး​တို့​ကို ဖျက်ဆီး​မည်​။

⁵ ဂါဇ​မြို့​သည် ခေါင်းတုံး​ဖြစ်​လေ​ပြီ​။ အာရှကေလုန်​မြို့​သည် ဆိတ်ညံ​လေ​ပြီ​။ အို ချိုင့်ဝှမ်း​၌ ကြွင်းကျန်​သော​သူ​တို့​၊ မည်သည့်​အချိန်​အထိ ကိုယ့်​အသား​ကို ကိုယ်​မွှမ်း​ကြ​မည်နည်း​။

⁶ အို ထာဝရဘုရား​၏​ဓား​တော်​၊ မည်မျှ​ကြာ​အောင်​အငြိမ်​မ​နေ​ဘဲ တိုက်ခိုက်​နေ​ဦး​မည်နည်း​။ ဓားအိမ်​သို့​ပြန်ဝင်​ပါ​တော့​။ ရပ်​ပါ​တော့​။ ငြိမ်ငြိမ်​နေ​ပါ​တော့​။

⁷ ထာဝရဘုရား​သည် ဓား​ကို​အမိန့်ပေး​ထား​သည်​ဖြစ်၍ ဓား​က မည်သို့​ငြိမ်ငြိမ်​နေ​နိုင်​မည်နည်း​။ အာရှကေလုန်​မြို့​နှင့် ပင်လယ်​ကမ်းခြေဒေသ​တို့​ကို တိုက်ခိုက်​ရန် ဓား​ကို​အမိန့်ပေး​တော်မူ​ပြီ​”​ဟု မိန့်​တော်မူ​၏​။