မိရိအံနှင့်အာရုန်တို့ဆန့်ကျင်ကြခြင်း1 မောရှေသည် ကုရှိအမျိုးသမီးတစ်ယောက်နှင့်စုံဖက်သဖြင့် ထိုကုရှိအမျိုးသမီးနှင့်ပတ်သက်၍ မိရိအံနှင့်အာရုန်သည် မောရှေအား ဆန့်ကျင်ပြောဆိုကြ၏။ 2 သူတို့က “ထာဝရဘုရားသည် မောရှေအားဖြင့်သာ စကားပြောတော်မူသလော။ ငါတို့အားဖြင့်လည်း မိန့်မြွက်တော်မူသည်မဟုတ်လော”ဟု ဆိုကြသည်ကို ထာဝရဘုရားကြားတော်မူ၏။ 3 (မောရှေသည် ကမ္ဘာမြေပေါ်ရှိလူအားလုံးတို့ထက် စိတ်အနှိမ့်ချဆုံးသူဖြစ်၏။) 4 ထာဝရဘုရားက “တွေ့ဆုံစည်းဝေးရာတဲတော်သို့ သင်တို့သုံးယောက်လာကြလော့”ဟု မောရှေ၊ အာရုန်နှင့် မိရိအံတို့အား ချက်ချင်းမိန့်တော်မူသဖြင့် သူတို့သုံးယောက်သည် ထွက်လာကြ၏။ 5 ထာဝရဘုရားသည်လည်း မိုးတိမ်တိုင်အားဖြင့် ကြွဆင်း၍ တဲတော်အဝင်ဝ၌ရပ်လျက် အာရုန်နှင့်မိရိအံကိုခေါ်သဖြင့် သူတို့နှစ်ဦးစလုံး ရှေ့တော်သို့လာကြ၏။ 6 ထိုအခါ ထာဝရဘုရားက “ငါ့စကားကို နားထောင်ကြလော့။ သင်တို့တွင် ပရောဖက်ရှိလျှင် ငါထာဝရဘုရားသည် ထိုပရောဖက်အား နိမိတ်အာရုံအားဖြင့် ကိုယ်ထင်ရှားပြမည်။ အိပ်မက်အားဖြင့် မိန့်မြွက်မည်။ 7 ငါ၏အိမ်တော်တစ်ခုလုံးအပေါ်သစ္စာရှိသော ငါ၏အစေအပါးမောရှေနှင့်မူကား ထိုသို့မဟုတ်ဘဲ 8 သူနှင့်မျက်နှာချင်းဆိုင် ရှင်းလင်းစွာမိန့်ဆို၏။ သွယ်ဝိုက်၍ မမိန့်ဆို။ သူသည် ထာဝရဘုရား၏ပုံသဏ္ဌာန်ကို မြင်ရ၏။ သင်တို့သည် ငါ့အစေအပါးမောရှေကို အဘယ်ကြောင့် ဆန့်ကျင်ပြောဆိုဝံ့သနည်း”ဟု မိန့်တော်မူပြီးနောက် 9 ထာဝရဘုရားသည် သူတို့ကိုအမျက်ထွက်လျက် ကြွသွားတော်မူ၏။ 10 မိုးတိမ်သည် တဲတော်အပေါ်မှ ကွာသွားသည်နှင့် မိရိအံသည် အနာကြီးရောဂါစွဲ၍ နှင်းပွင့်ကဲ့သို့ဖြူလေ၏။ အာရုန်သည် မိရိအံကိုလှည့်ကြည့်သောအခါ အနာကြီးရောဂါစွဲနေသည်ကို မြင်လျှင် 11 အာရုန်က မောရှေအား “အို အကျွန်ုပ်၏သခင်၊ အကျွန်ုပ်တို့သည် မိုက်မဲ၍ပြစ်မှားမိပါပြီ။ အကျွန်ုပ်တို့၏အပြစ်ကို မှတ်တော်မမူပါနှင့်။ 12 ကိုယ်အင်္ဂါမစုံမလင်နှင့် အမိဝမ်းမှထွက်လာသောအသေကောင်ကဲ့သို့ သူ့ကိုမဖြစ်စေပါနှင့်”ဟု တောင်းပန်သဖြင့် 13 မောရှေက “အို ဘုရားသခင်၊ မိရိအံကို ရောဂါပျောက်ကင်းစေတော်မူပါ”ဟု ထာဝရဘုရားထံအော်ဟစ်တောင်းလျှောက်လေ၏။ 14 ထာဝရဘုရားက မောရှေအား “သူ့ဖခင်သည် သူ့မျက်နှာကို တံတွေးထွေးလျှင် သူသည် ခုနစ်ရက်ပတ်လုံး အရှက်ရမည်မဟုတ်လော။ သူ့ကို တပ်စခန်း၏အပြင်ဘက်၌ ခုနစ်ရက်ပတ်လုံး နေစေရမည်။ ထို့နောက်မှ သူ့ကိုပြန်ခေါ်လာရမည်”ဟု မိန့်တော်မူ၏။ 15 ထို့ကြောင့် မိရိအံကို တပ်စခန်းအပြင်ဘက်၌ ခုနစ်ရက်ပတ်လုံး နေစေ၏။ မိရိအံကို ပြန်မခေါ်လာမီတိုင်အောင် လူတို့သည် ခရီးမပြုဘဲ နေကြ၏။ 16 ထို့နောက်မှ လူတို့သည် ဟာဇရုတ်အရပ်မှ ခရီးပြု၍ ပါရန်တောကန္တာရတွင် စခန်းချကြ၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative