ဆာ​လံ 61 - မြန်​​​မာ့​​​စံ​​​မီ​​​သမ္မာ​​​ကျမ်း​​ မြန်​​​မာ့​​​စံ​​​မီ​​​သမ္မာ​​​ကျမ်း​​
ဆာ​လံ 61

¹ အို ဘုရားသခင်​၊ အကျွန်ုပ်​၏​ဟစ်ကြော်သံ​ကို နားညောင်း​တော်မူ​ပါ​။ အကျွန်ုပ်​၏​ဆုတောင်းချက်​ကို အာရုံစိုက်​နားထောင်​တော်မူ​ပါ​။

² အကျွန်ုပ်​သည် စိတ်နှလုံး​ညှိုးငယ်​သောအခါ ကိုယ်တော်​ကို ကမ္ဘာမြေကြီး​အစွန်း​မှ ခေါ်​ပါ​၏​။ အကျွန်ုပ်​ထက်​မြင့်မား​သော​ကျောက်ဆောင်​ပေါ်သို့ အကျွန်ုပ်​ကို​ပို့ဆောင်​တော်မူ​ပါ​။

³ အကြောင်းမူကား ကိုယ်တော်​သည် အကျွန်ုပ်​၏​ခိုလှုံ​ရာ​၊ ရန်သူ့​ရှေ့​မှာ ခိုင်ခံ့​သော​ရဲတိုက်​ဖြစ်​တော်မူ​၏​။

⁴ ကိုယ်တော်​၏​တဲ​တော်​၌​အစဉ်အမြဲ​နေထိုင်​၍ ကိုယ်တော်​၏​အတောင်​တော်​ကွယ်ကာ​ရာ​အရပ်​၌ ခိုလှုံခွင့်​ပေး​တော်မူ​ပါ​။(​စေလာ)

⁵ အကြောင်းမူကား အို ဘုရားသခင်​၊ ကိုယ်တော်​သည် အကျွန်ုပ်​၏​ကတိသစ္စာ​စကား​များ​ကို ကြား​တော်မူ​၍ ကိုယ်တော်​၏​နာမ​တော်​ကို ကြောက်ရွံ့​သော​သူ​တို့​ဆက်ခံ​ရ​သည့်​အမွေ​ကို အကျွန်ုပ်​အား ပေး​တော်မူ​ပြီ​။

⁶ ရှင်ဘုရင်​၏​နေ့ရက်​များ​ကို ထပ်၍​တိုးပေး​တော်မူ​ပါ​။ သူ​၏​နှစ်ကာလ​တို့​ကို​လည်း မျိုးဆက်​အစဉ်အဆက် တည်​စေ​တော်မူ​ပါ​။

⁷ သူ​သည် ဘုရားသခင်​၏​ရှေ့​တော်​၌ အစဉ်အမြဲ​စိုးစံ​ပါစေသော​။ မေတ္တာကရုဏာ​နှင့်​သမ္မာတရား​သည် သူ့​ကို​ကာကွယ်​စောင့်ရှောက်​မည့်​အကြောင်း စီရင်​တော်မူ​ပါ​။

⁸ သို့ဖြစ်၍ အကျွန်ုပ်​သည် နေ့စဉ်နေ့တိုင်း အကျွန်ုပ်​၏​ကတိသစ္စာ​များ​ကို​ပြည့်စုံ​စေရန် ကိုယ်တော်​၏​နာမ​တော်​ကို ထာဝစဉ်​သီဆိုချီးမွမ်း​ပါ​မည်​။