Josoa 8 - Baiboly Protestanta Malagasy 2011

Ny nahazoana an’i Ay

¹ Hoy NY TOMPO tamin’i Josoa: Aza matahotra na mivadi-po ianao. Ento miaraka aminao ny vahoaka rehetra mpanafika ka miaingà, iakaro i Ay; indro, efa natolotro eo an-tananao ny mpanjakan’i Ay mbamin’ny vahoakany sy ny tanànany ary ny taniny.

² Tahaka ny nataonao tamin’i Jeriko sy ny mpanjakany no hataonao koa amin’i Ay sy ny mpanjakany; nefa ny fananana rehetra sy ny biby fiompy ao dia halainareo ho babo ho anareo ihany. Asio vela-pandrika avy ao ambadiky ny tanàna.

³ Dia niainga i Josoa sy ny mpanafika rehetra hiakatra any Ay, ary nifidy lehilahy mahery telo alina i Josoa ka nandefa ireo rehefa alina.

⁴ Ary nandidy azy izy hoe: Indro, hanao vela-pandrika avy ao ambadiky ny tanàna hamely azy ianareo ka aza manalavitra azy loatra fa aoka ho vonona ianareo rehetra.

⁵ Izaho sy ny vahoaka rehetra izay miaraka amiko kosa dia hanatona ny tanàna; ary rehefa manatona hamely anay tahaka ny teo ny olona dia handositra eo anoloany izahay.

⁶ Ary hivoaka hanenjika anay izy mandra-pitarikay azy hiala ao an-tanàna; fa hoy izy hoe: Mandositra eo anoloantsika tahaka ny teo izy; dia hanao tari-dositra eo anoloany izahay.

⁷ Nefa hiroatra avy ao amin’ny vela-pandrika kosa ianareo ka ho azonareo ny tanàna, fa hatolotry NY TOMPO Andriamanitrareo eo an-tananareo izy.

⁸ Rehefa azonareo ny tanàna dia doroy amin’ny afo, araka ny didin’NY TOMPO no hataonareo. Indro, efa nandidy anareo aho.

⁹ Dia nampandehanin’i Josoa izy ireo ka roso hanao vela-pandrika ary nitoetra teo andrefan’i Ay, teo anelanelan’i Betela sy i Ay. Fa i Josoa kosa dia nitoetra teo amin’ny vahoaka ihany tamin’izany alina izany.

¹⁰ Ary nifoha vao maraina i Josoa ka nandamina ny vahoaka dia niakatra teo alohan’ny vahoaka hankany Ay izy sy ny loholon’ny Israely.

¹¹ Ary ny vahoaka mpanafika rehetra, izay niaraka tamin’i Josoa, dia niakatra ka nanakaiky sy nanandrify ny tanàna; ary nitoby teo avaratr’i Ay ireo ka ny lohasaha no teo anelanelan’i Ay sy rizareo.

¹² Dia naka olona tokony ho dimy arivo lahy izy ka nampanao vela-pandrika teo anelanelan’i Betela sy i Ay, andrefan’ny tanàna.

¹³ Ary rehefa voalahatry ny vahoaka ny toby rehetra izay teo avaratry ny tanàna sy ny vela-pandrika teo andrefan’ny tanàna dia nandeha nankeo amin’ny lohasaha i Josoa tamin’io alina io.

¹⁴ Rehefa hitan’ny mpanjakan’i Ay izany dia nifoha vao maraina ny olona tao an-tanàna ka nandeha haingana hiady tamin’ny Israely, teo amin’ny toerana nifamotoanany tandrifin’i Arabà, ireo moa dia ny mpanjaka sy ny vahoakany: Satria tsy fantany ho nisy vela-pandrika hamely azy tao ambadiky ny tanàna.

¹⁵ Ary i Josoa sy ny Israely rehetra dia nody resy teo anoloany ka nanao tari-dositra tamin’ny lalana mankany an-tany efitra.

¹⁶ Dia nifampiantso hanenjika azy ny vahoaka rehetra izay tao an-tanàna; ary nanenjika an’i Josoa izy ka voatarika ho tafavoaka ny tanàna.

¹⁷ Tsy nisy lehilahy tavela, na tao Ay na tao Betela, fa tsy nisy izay tsy nandeha hanenjika ny Israely; ary nilaozany mbola nivoha ny tanàna ka lasa nanenjika ny Israely izy.

¹⁸ Ary hoy NY TOMPO tamin’i Josoa: Atondroy an’i Ay ny lefona izay eny an-tananao fa hatolotro eo an-tananao i Ay. Dia natondron’i Josoa ny tanàna ny lefona izay teny an-tanany.

¹⁹ Raha vao natondrony ny tanany dia nirohotra haingana ny nanao vela-pandrika avy tao amin’ny nitoerany ka nihazakazaka; dia niditra tao an-tanàna izy ireo ka nahazo azy ary nandoro azy haingana tamin’ny afo.

²⁰ Ary niherika ny mponina tao Ay ka hitany fa indro, ny setroky ny tanàna niakatra ho any an-danitra, sady tsy nisy handosirany na aiza na aiza intsony, na ho etỳ na ho erỳ. Ny Israely izay nanao tari-dositra ho any an-tany efitra dia nifotitra namely ny mpanenjika kosa.

²¹ Rehefa hitan’i Josoa sy ny Israely rehetra fa efa azon’ny vela-pandrika ny tanàna ka niakatra ny setroky ny tanàna dia nifotitra izy ka namely ny mponina tao Ay.

²² Ary ireo tao an-tanàna koa dia niainga hamely azy ka latsaka teo afovoan’ny Israely ny olona, fa ny Israely sasany dia teo an-daniny iray ary ny sasany dia teo an-kilany; dia nifandafaran’ny Israely teo izy ka tsy nasiany niangana na dia iray akory aza.

²³ Ary nataony sambo-belona ny mpanjakan’i Ay ka noentiny teo amin’i Josoa.

²⁴ Rehefa avy namono ny mponina rehetra tao Ay tany an-tsaha ny Israely, tany amin’ny tany efitra nanenjehany azy, ka lavo tamin’ny lelan-tsabatra avokoa izy rehetra mandra-pahalany ritra azy dia niverina tany Ay ny Israely rehetra ka namely azy tamin’ny lelan-tsabatra.

²⁵ Ary ireo rehetra maty tamin’izany andro izany, na lehilahy na vehivavy, dia roa arivo sy iray alina, izany hoe ny mponina rehetra tao Ay.

²⁶ Ary tsy nampihemotra ny tanany izay nanondro tamin’ny lefona i Josoa mandra-panaony ny mponina rehetra tao Ay ho zavatra voaozona.

²⁷ Nefa ny biby fiompy mbamin’ny fananana rehetra tao amin’izany tanàna izany dia nalain’ny Israely ho babony ihany, araka ny tenin’NY TOMPO izay nandidiany an’i Josoa.

²⁸ Ary nodoran’i Josoa i Ay ka nofoanany ho tanàna haolo mandrakizay, dia toy izany mandraka androany izy.

²⁹ Nahantony tamin’ny hazo mandra-paharivan’ny andro ny mpanjakan’i Ay; ary rehefa tokony ho maty masoandro dia nasain’i Josoa nesorina tamin’ny hazo ny fatiny ka nariana teo anoloan’ny vavahadin’ny tanàna sady notsindriany antontam-bato avo mandraka androany.

Ny namakiana ny lalàna teo an-tendrombohitra Ebala

³⁰ Tamin’izany dia nanorina alitara ho an’NY TOMPO, Andriamanitry ny Israely, teo an-tendrombohitra Ebala i Josoa,

³¹ araka izay nandidian’i Mosesy, mpanompon’NY TOMPO, ny Zanak’Israely, araka ny voasoratra ao amin’ny bokin’ny lalànan’i Mosesy, ka alitara vato tsy voavoatra, izay tsy nopehim-by no natao; dia nanolotra fanatitra dorana manontolo teo amboniny ho an’NY TOMPO izy sady namono zavatra hatao fanati-pihavanana koa.

³² Ary nosoratany teo amin’ny vato ny dika mitovy tamin’ny lalànan’i Mosesy, izay nosoratany teo anatrehan’ny Zanak’Israely.

³³ Ny Israely rehetra sy ny loholony sy ny mpifehy azy ary ny mpitsara azy, na olona hafa firenena na Israely, dia nitsangana teo an-daniny roa amin’ny vata misy ny Fanekena, teo anatrehan’ny levita mpisorona izay nitondra ny vata misy ny faneken’NY TOMPO: Ny antsasany dia nanandrify ny tendrombohitra Gerizima, ary ny antsasany dia nanandrify ny tendrombohitra Ebala, araka izay efa nandidian’i Mosesy, mpanompon’NY TOMPO fahiny, mba hitsodrano ny vahoakan’Israely.

³⁴ Rehefa afaka izany dia namaky ny tenin’ny lalàna rehetra izy, dia ny fitahiana sy ny fanozonana, araka izay rehetra voasoratra ao amin’ny bokin’ny lalàna.

³⁵ Tsy nisy teny tamin’izay rehetra nandidian’i Mosesy, izay tsy novakin’i Josoa teo anatrehan’ny fiangonan’ny Israely manontolo, mbamin’ny vehivavy sy ny ankizy madinika ary ny vahiny izay teo aminy.