Josoa 12 - Baiboly Protestanta Malagasy 2011

Lisitry ny tany azon’ny Israely

¹ Izao no mpanjakan’ny tany resin’ny Zanak’Israely ka nobaboiny ny tany, teny andafy atsinanan’i Jordana hatreo amin’ny lohasahan-driaka Arnona ka hatrany amin’ny tendrombohitra Hermona sy ny ilany atsinanan’ny tany ngazana:

² I Sihona, mpanjakan’ny Amorita izay nonina tany Hesbona ka nanjaka hatrany Aroera, teo amoron’ny lohasahan-driaka Arnona, hatreo afovoan’ny lohasaha sy ny antsasak’i Gileada ka hatramin’ny lohasahan-driaka Jaboka izay sisintanin’ny taranak’i Amona,

³ ary ny ilany atsinanan’ny tany ngazana hatreo amin’ny ranomasina Kinerota ka hatramin’ny ranomasina Arabà, ny Ranomasintsira, amin’ny lalana mankany Bety-Jesimota, ary hatrany amin’ny tany atsimo eo amin’ny sisin’i Pisga.

⁴ Azony koa ny tanin’i Oga, mpanjakan’i Basana, isan’ny Refaìta sisa, izay nitoetra tany Astarota sy Edrehy,

⁵ nanjaka tany an-tendrombohitra Hermona, tany Saleka ary tany Basana rehetra hatrany amin’ny sisintanin’ny Gesorita sy ny Makatita ary ny antsasak’i Gileada, faritanin’i Sihona, mpanjakan’i Hesbona.

⁶ I Mosesy, mpanompon’NY TOMPO, sy ny Zanak’Israely no nandresy ireo; ary nomen’i Mosesy, mpanompon’NY TOMPO, ho lovan’ny Robenita sy ny Gadita ary ny antsasaky ny fokon’i Manase ny tanin’ireo.

⁷ Ary izao no mpanjakan’ny tany izay resin’i Josoa sy ny Zanak’Israely tany andafy andrefan’i Jordana, hatrany Baala-Gada, eo an-dohasahan’i Libanona ka hatramin’ny tendrombohitra mangadihady izay fiakarana ho any Seìra; koa ny taniny dia nomen’i Josoa ny fokon’ny Israely araka ny fizarany,

⁸ dia ny any amin’ny havoana, any Sefela, any amin’ny tany ngazana, any amin’ny tany an-tsisin’ny tendrombohitra, any an-tany efitra ary any Negeva, dia ny an’ny Hetita, ny Amorita, ny Kananita, ny Perizita, ny Hivita ary ny Jebosita:

⁹ Ny mpanjakan’i Jeriko, iray; ny mpanjakan’i Ay izay eo anilan’i Betela, iray;

¹⁰ ny mpanjakan’i Jerosalema, iray; ny mpanjakan’i Hebrona, iray;

¹¹ ny mpanjakan’i Jarmota, iray; ny mpanjakan’i Lakisy, iray;

¹² ny mpanjakan’i Eglona, iray; ny mpanjakan’i Gezera, iray;

¹³ ny mpanjakan’i Debira, iray; ny mpanjakan’i Gedera, iray;

¹⁴ ny mpanjakan’i Horma, iray; ny mpanjakan’i Arada, iray;

¹⁵ ny mpanjakan’i Libna, iray; ny mpanjakan’i Adolama, iray;

¹⁶ ny mpanjakan’i Makeda, iray; ny mpanjakan’i Betela, iray;

¹⁷ ny mpanjakan’i Tapoa, iray; ny mpanjakan’i Hefera, iray;

¹⁸ ny mpanjakan’i Afeka, iray; ny mpanjakan’i Lasarona, iray;

¹⁹ ny mpanjakan’i Madona, iray; ny mpanjakan’i Hazora, iray;

²⁰ ny mpanjakan’i Simrona-Merona, iray; ny mpanjakan’i Aksafa, iray;

²¹ ny mpanjakan’i Tanàka, iray; ny mpanjakan’i Megido, iray;

²² ny mpanjakan’i Kadesy, iray; ny mpanjakan’i Jokneama any Karmela, iray;

²³ ny mpanjakan’i Dora eo amin’ny havoanan’i Dora, iray; ny mpanjakan’i Goima any Gilgala, iray;

²⁴ ny mpanjakan’i Tirza, iray. Iraika amby telopolo no isan’ny mpanjaka rehetra.