Isaia 4 - Baiboly Protestanta Malagasy 2011

¹ Amin’izany andro izany dia hisy vehivavy fito hihazona lehilahy iray ka hiteny hoe: Ny haninay ihany no hohaninay ary ny fitafianay ihany no hanaovanay; fa izao no hany angatahinay: Aoka hampitondraina ny anaranao izahay ka afaho tondro-maso!

Ireo nieren-doza tamin’ny Israely

² Amin’izany andro izany dia ho tonga fahatsaran-tarehy sy voninahitra ny solofon’NY TOMPO, ary ny vokatry ny tany dia ho rehareha sy firavaka ho an’izay nieren-doza tamin’ny Israely.

³ Koa izay sisa any Ziona sy izay mbola mitoetra any Jerosalema dia hatao hoe masina, dia izay rehetra voasoratra ho isan’ny velona any Jerosalema.

⁴ Rehefa voasasan’ny Tompo ho afaka amin’ny fahalotoany ireo zanakavavin’i Ziona, ary voadion’ny fanahin’ny fitsarana sy ny fanahin’ny fandringanana ho afaka amin’ny ran’olona nalatsany i Jerosalema,

⁵ dia hamorona rahona sy setroka NY TOMPO amin’ny antoandro ary fahazavan’ny afo midedadeda amin’ny alina. Ho eny ambonin’ny toerana rehetra any an-tendrombohitra Ziona izany sady ho eny ambonin’ny fivoriany rehetra; satria ho fiarovana eo ambonin’ny zavatra rehetra ny voninahiny.

⁶ Hisy tranolay ho fialokalofana amin’ny hainandro raha antoandro sady ho fialofana sy fierena amin’ny tafio-drivotra sy ny ranonorana.