Isaia 3 - Baiboly Protestanta Malagasy 2011

Ny korontana ao amin’ny fanjakana Joda

¹ Indro NY TOMPO Andriamanitra, Tompon’izao rehetra izao, manaisotra amin’i Jerosalema sy Joda ny andry sy tohana rehetra, dia ny sakafo rehetra sy ny rano rehetra izay tohan’aina,

² ny lehilahy mahery fo sy ny mpiady, ny mpitsara sy ny mpaminany, ny mpisikidy sy ny loholona,

³ ny mpifehy dimampolo sy ny manankaja, ny mpanolotsaina sy ny mpahay taozavatra ary ny mahay ny boredirediky ny mpitana ody.

⁴ Hanendry ankizilahy ho lehibeny Aho, ary haitraitran-jaza no hitondran’ireo azy.

⁵ Hifampijaly ny vahoaka, dia izy samy izy sy ny namany avy; ny tanora dia hihetraketraka amin’ny zokiolona, ary ny tsinontsinona amin’ny manankaja.

⁶ Hisy olona hohazonin’ny rahalahiny ao an-tranon’ny rainy ka hitenenany hoe: Ianao no manana fitafiana ka aoka ho mpanapaka aminay! Ary aoka ho andraikitrao izao faharavana izao!

⁷ Dia hanangam-peo izy amin’izany andro izany hoe: Tsy mpitsabo aho ary tsy misy hanina na fitafiana ao an-tranoko; koa tsy azonareo apetraka ho mpanapaka amin’ny olona aho!

⁸ Fa tafintohina i Jerosalema ary potraka i Joda satria ny lelany sy ny asany dia samy manohitra NY TOMPO mba hikomy eo anatrehan’ny voninahiny.

⁹ Miampanga azy ny fisehon’ny tarehiny; mampiharihary ny fahotany tahaka an’i Sodoma izy ka tsy manafina azy. Loza ny manjo azy! Fa mampidi-doza amin’ny tenany izy.

¹⁰ Lazao hoe: Hahita soa ny marina, fa ny vokatry ny asany no hohaniny.

¹¹ Loza no hanjo ny ratsy fanahy! Satria ny valin’ny nataon’ny tanany ihany no hanody azy.

¹² Ny amin’ny oloko dia zaza no mampahory azy, ary vehivavy no mitondra azy. Ry oloko ô, ny mpitarika anao no mampivily anao sady mandrava ny lalana alehanao.

Ny fitsarana ireo mpitarika ny Israely

¹³ Mitsangana handahatra NY TOMPO ary mijoro hitsara ny olona.

¹⁴ Miampanga ny loholona sy ny lehiben’ny olony amin’ny fitsarana NY TOMPO hoe: Ripakareo ny tanim-boaloboka! Ary ao an-tranonareo ny fananan’ny mahantra izay efa nalainareo an-keriny!

¹⁵ Nahoana no dia hosihosenareo ny oloko ary torotoroinareo ny tavan’ny madinika? Hoy NY TOMPO, Andriamanitra Tompon’izao rehetra izao.

Ny famaizana ny zanakavavin’i Jerosalema

¹⁶ Hoy NY TOMPO: Satria miavona ireo zanakavavin’i Ziona ka mandeha mianjonanjona sy manao maso meloka sady kasikasy fandeha ary mampikorintsandrintsana ny fehin-tongony,

¹⁷ dia hataon’ny Tompo feno takompery ny tampon-dohan’ny zanakavavin’i Ziona ary hahanjahanjan’NY TOMPO ny tampon-kandriny.

¹⁸ Amin’izany andro izany dia hesorin’NY TOMPO ny firavaka rehetra: Ny fehin-tongotra, ny sarondoha, ny firavaka sarim-bolan-tsinana,

¹⁹ ny kavina, ny rojo, ny fisalobonana,

²⁰ ny satroka, ny rojo parapaingo, ny fehikibo misy haingony, ny fitoeran-dranomanitra, ny ody fiambozonany,

²¹ ny peratra, ny kavin’orona,

²² ny akanjo fihaingoana, ny akanjobe fanao ivelany, ny salotra, ny poketra,

²³ ny fitaratra, ny atin’akanjo, ny fehiloha ary ny lamba fisaronana.

²⁴ Hosoloana zavatra maimbo ny ranomanitra; hosoloana mahazaka ny fehikibo tsara; hosoloana loha sola ny volo voavoatra tsara; hosoloana akanjo fisaonana ny akanjo mirebareba ary hosoloana marika amin’ny vy mahamay ny hatsaran-tarehy.

Ny mpitondratenan’i Jerosalema

²⁵ Ho lavon-tsabatra ny lehilahy ao aminao ary ho faty an’ady ny lehilahy mahery fo ao aminao

²⁶ ka hitomany sy hisaona ny vavahadiny; ho foana ny tanàna ka hitorovoka amin’ny tany.