Salamo 73 - Baiboly Katolika

SALAMO 73 (Volgata 72) Fitsarana farany

¹ Salamon’i Asafa. Eny, tsara fo Andriamanitra amin’i Israely sy amin’izay madio fo!

² Kanefa saika nikoy aho, saika nibolisatra ny tongotro.

³ Fa sosotra tamin’ny tsy mpivavaka aho, nahita ny fiadanan’ny ratsy fanahy.

⁴ Ho azy ireo: ny fanaintainana tsy misy mandra-pahafatiny; ny vatany tomady fatratra.

⁵ Tsy mba niasa amin’izay asa fanaon’ny olona izy, ary tsy mba voadonan-javatra toy ny olon-kafa rehetra.

⁶ Ka dia rehareha no firaratan’ny vozony, ary halozana no akanjo sarobidy itafiany.

⁷ Mivoaka heloka, avy ao an-kibony, miseho andro ny hevitry ny fony.

⁸ Mamazivazy izy, miresaka haratsiana sy halozana, manonona teny an’avona.

⁹ Ny vavany, entiny mamely ny lanitra aza, ary ny lelany miasa eto an-tany.

¹⁰ Ka tafatodika any aminy ny vahoakako, migoka rano erỳ izy.

¹¹ Hoy izy: «Ahoana no hahafantaran’Andriamanitra? Ahoana no hahalalan’ny Avo Indrindra?

¹² Fa izany no toetry ny ratsy fanahy: miadana mandrakariva, mampitombo ny hareny izy.»

¹³ Ka dia foana tsy misy asany ny nitandremako ny foko ho madio; sy ny nanasako ny tanako amin’ny tsy fananan-tsiny,

¹⁴ voakapoka mandritra ny andro aho, ary faizina ihany isa-maraina.

¹⁵ Raha izay aho no nanao hoe: «Te-hiteny toa azy ireo aho» dia ho nivadika tamin’ny taranaky ny zanakao aho.

¹⁶ Nandinika hahatakatra izany zavatra izany aho, ka zava-tsarotra tokoa teo imasoko izany,

¹⁷ mandra-pahatafiditro tao amin’ny fitoerana masin’Andriamanitra sy namantatra ny anjara hiafaran’izy ireo.

¹⁸ Eny, ampandehaninao eo amin’ny lala-malama ireny, dia alavonao, ka levona foana eo izy.

¹⁹ Hia! indray mipy maso monja lahy, dia rava ireny! Levona terỳ! Matin-doza mahatsiravina ka tsy hita intsony!

²⁰ Tahaka ny nanaovan’ny olona ny nofy nony mahatsiaro, no androahanao ny fahatsiarovana azy, ry Tompo, rehefa mifoha Ianao.

²¹ Raha lotika ny foko, ka mahatsiaro voatsindrona lalina aho,

²² dia ketrina tsy misy saina intsony aho fa toy ny biby no mitomoetra eo anatrehanao.

²³ Ho eo aminao mandrakariva anefa aho, fa efa voahazonao ny tanako ankavanana;

²⁴ hoentinao amin’ny torohevitrao aho, dia horaisinao any amin’ny voninahitra, rehefa afaka izany.

²⁵ Manana an’iza indray moa aho, any an-danitra? Tapi-java-nirina aho manana Anao eto an-tany.

²⁶ Torana ny nofoko sy ny foko: ny vatolampin’ny foko sy anjarako dia Andriamanitra mandrakizay doria.

²⁷ Indro very kosa izay manalavitra Anao; aringanao avokoa izay mivadika aminao.

²⁸ Raha izaho, dia ny miray amin’Andriamanitra no fahasambarako; I Iaveh Tompo no anton’ny fitokiako; mba hitoriako ny asanao rehetra.