Salamo 63 - Baiboly Katolika

SALAMO 63 (Volgata 62) Faniriana an’Andriamanitra

¹ Salamon’i Davida. Fony izy tany an’efitr’i Jodà .

² Andriamanitra ô, Andriamanitro Ianao, mitady Anao aho hatramin’ny vao maraina; mangetaheta Anao ny fanahiko, manina Anao ny nofoko, ao amin’ny tany maina mangentana tsy misy rano.

³ Toy izany no nibanjinako Anao tao amin’ny fitoerana masina, mba hahitako ny Herinao amam-boninahitrao.

⁴ Fa tsara lavitra noho ny aina ny fahasoavanao, ka aoka hiventy fankalazana Anao ny molotro.

⁵ Dia hidera Anao amin’ny andro rehetra iainako aho, hanandra-tanana amin’ny Anaranao.

⁶ Toy ny voky tsoka sy ny matavy no ahavokisan’ny fanahiko, ka midera Anao ny vavako, amin’ny molotro falifaly.

⁷ Raha mieritreritra Anao eo am-pandriako aho, dia any aminao ny saiko mandritra ny fiambenana alina.

⁸ Fa Ianao no vonjiko, ary eo ambanin’ny aloky ny elatrao no iravoravoako.

⁹ Tafaraikitra aminao ny fanahiko; manohana ahy ny Tananao ankavanana.

¹⁰ Fa izy ireo mitady hanala ny aiko kosa dia hidina ambanin’ny tany.

¹¹ Hatolotra ho an’ny sabatra, ho rembin’ny amboahaolo.

¹² Dia hifaly amin’Andriamanitra ny mpanjaka; ho ravoravo izay rehetra mianiana aminy, satria hakombona ny vavan’ny mpandainga.