Salamo 41 - Baiboly Katolika

SALAMO 41 (Volgata 40) Vavaky ny marary tsy misy mpikarakara

¹ Ho an’ny mpampianatra hira. Salamon’i Davida.

² Sambatra ny miahy ny mahantra, fa hovonjen’i Iaveh amin’ny andro fahoriana izy.

³ Harovan’i Iaveh sy hovelominy izy; dia ho sambatra ambonin’ny tany, ary tsy mba hatolotrao amin’ny sitrapon’ny fahavalony.

⁴ I Iaveh hamonjy azy eo am-parafara fijaliany; havadikao avokoa ny fandriany rehetra eo am-paharariany.

⁵ Hoy aho: «Mamindrà fo amiko, ry Iaveh! sitrano ny fanahiko, fa nanota taminao aho.»

⁶ Fa ny fahavaloko kosa manonona fanozonana ahy: «Rahoviana no ho faty io? Rahoviana no ho very ny anaran’io?»

⁷ Nony mba misy mamangy ahy, lainga no hany avoakany, faharatsiana no angonin’ny fony; nony mivoaka avy eo indray izy dia miteny eny ivelany.

⁸ Mitakoritsika mamely ahy avokoa ny fahavaloko, misaina hanisy ratsy ahy izy ireo.

⁹ «Loza tsy azo odiana, hoy izy, no nanjò azy, indro izy milamaka, dia tsy hiarina intsony.

¹⁰ Na dia izay olona sakaizako aza, izay nitokiako sy nihinana ny haniko, dia nanangana ny ombalahin-tongony hamely ahy.»

¹¹ Fa Ianao ry Iaveh, mamindrà fo amiko, areno aho, dia hamaly azy ireo araka ny tandrify azy.

¹² Ny hahafantarako fa tia ahy Ianao, dia raha tsy resin’ny fahavaloko aho.

¹³ Noho ny tsy fananako tsiny dia nanohana ahy Ianao, ary nampitoetra ahy mandrakizay eo anatrehanao.

¹⁴ Hisaorana anie i Iaveh Andriamanitr’i Israely, amin’ny taona mandrakizay rehetra! Amen! Amen!