Salamo 34 - Baiboly Katolika

SALAMO 34 (Volgata 33) Fiderana ny rariny ataon’Andriamanitra

¹ Nataon’i Davida, tamin’izy nody adala teo anatrehan’i Abimeleka, ka noroahiny izy, dia lasa.

Alef

² Te hisaotra an’i Iaveh mandrakariva aho; ho eo am-bavako mandrakariva ny fiderana Azy.

Bet

³ I Iaveh no ireharehan’ny fanahiko; aoka handre sy hifaly ny manetry tena.

Gimel

⁴ Miaraha amiko ianareo hankalaza an’i Iaveh: aoka isika hiara-midera ny Anarany.

Dalet

⁵ Nitady an’i Iaveh aho, dia nihaino ahy Izy, ary nanafaka ahy tamin’ny tahotro rehetra.

He

⁶ Raha mitodika azy ny olona dia miramiran’ny hafaliana, ary tsy safo-kenatra ny tavany.

Vao Jain

⁷ Niantso ity olo-mahantra, dia nohenoin’i Iaveh, sy novonjeny tamin’ny fahoriany rehetra.

Het

⁸ Ny Anjelin’i Iaveh mitoby, manodidina izay matahotra Azy, ka mamonjy azy.

Tet

⁹ Andramo ka zahao ange izany hatsaran’i Iaveh. Sambatra ny olona manao Azy ho fialofany.

Iôd

¹⁰ Matahora an’i Iaveh ianareo olo-masiny, fa tsy ho voan’ny fahantrana izay matahotra Azy.

Kaf

¹¹ Ny liona tanora mety noana aman-tsy ampy hanina ihany, fa izay mitady an’i Iaveh tsy orin-java-tsoa akory.

Lamed

¹² Avia, anaka, mihainoa ahy, hampianariko ny fahatahorana an’i Iaveh ianareo.

Mem

¹³ Iza no olona mankamamy ny aina, iza no maniry andro lava hanaranam-po amin’ny fahasambarana?

Non

¹⁴ Arovy amin’ny ratsy ny lelanao, ary amin’ny teny fitaka ny molotrao.

Samek

¹⁵ Mandosira ny ratsy ary manaova ny tsara, mitadiava fihavanana ary katsaho izany.

Ain

¹⁶ Ny mason’i Iaveh mitsinjo ny marina ary ny sofiny mihaino ny fitarainany.

Fe

¹⁷ Ny Tavan’i Iaveh manandrina ny mpanao ratsy, mba hamongorany ny fahatsiarovana azy eo amin’ny tany.

Tsade

¹⁸ Fa mitaraina kosa ny marina, dia mihaino azy i Iaveh, ka manafaka azy amin’ny fahoriany rehetra.

Kôf

¹⁹ Eo akaikin’izay torotoro fo i Iaveh, ary mamonjy izay rera-panahy Izy.

Resh

²⁰ Iharam-pahoriana matetika ny marina, fa esorin’i Iaveh amin’izany rehetra izany kosa.

Shin

²¹ Miaro ny taolany rehetra Izy, tsy hisy ho tapaka ireny, na dia iray aza.

Tao

²² Ny ratsy no mahafaty ny ratsy fanahy; ary sazina ny mpankahala ny olo-marina.

²³ Fa avotan’i Iaveh kosa ny fanahin’ny mpanompony; ary tsy misy faiziny izay rehetra mialoka aminy.