Salamo 128 - Baiboly Katolika

SALAMO 128 (Volgata 127) Tso-drano ho an’ny mpino

¹ Fihirana fiakarana. Sambatra ny lehilahy matahotra an’i Iaveh, izay mandeha amin’ny lalany.

² Mihinana ny asan-tananao ianao amin’izany, ka dia sambatra sy voky soa.

³ Ny vadinao manahaka ny voaloboka mahavanom-boa, ao an-tokantranonao. Ny zanakao manahaka ny zanak’ôliva manodidina ny latabatrao.

⁴ Toy izany no hitahiana ny lehilahy matahotra an’i Iaveh.

⁵ I Iaveh anie hanambina anao, avy ao Siôna! Enga anie ka hahita an’i Jerosalema miadana tsara ianao, amin’ny andro rehetra hiainanao!

⁶ Hahita ny zanaky ny zanakao anie ianao! Ho amin’i Israely anie ny fiadanana!