Salamo 10 - Baiboly Katolika

Lamed

¹ Nahoana, ry Iaveh, no mijanona eny lavitra eny Ianao, sy miery amin’ny andron’ny fahoriana?

² Raha mirehareha ny ratsy fanahy dia ny mahantra no levona; izy ireo dia voan’ny teti-dratsy noforonon’io.

Mem

³ Mirehareha amin’ny fitsiriritany ny ratsy fanahy; manamavo an’i Iaveh ny mpandroba mandoza.

Non

⁴ Hoy ny ratsy fanahy, amin’ny fianjonanjonany: Tsy mamay izy! Tsy misy Andriamanitra. Izany no totalin-keviny.

⁵ Fa ambinina hatrany hatrany izy, amin’izay alehany. Ny fitsaranao dia avo loatra ka tsy ahoany; ny mpandrafy azy, tsofiny indray mandeha dia mihahaka.

⁶ Hoy izy anakampony: Tsy hangozohozo aho, voafefy tsy ho azon-doza aho na oviana na oviana.

Fe

⁷ Feno ozona sy fitaka amam-panaovana an-keriny ny vavany; hasomparana sy tsy fahamarinana no ao ambany lelany.

⁸ Manao otrika eo akaikin’ny tanàna izy; mamono ny tsy manan-tsiny ao amin’ny fitoerany an-katakonana. Mitsikilo ny olona tsy manan-kiaro ny masony;

Ain

⁹ mitily ao amin’ny fitoerana miafina toy ny liona ao anaty hazo milobolobo izy; mitily izy hisovoka ny malahelo; samboriny ny malahelo, taominy ho ao amin’ny fandrika haratony.

Tsade

¹⁰ Miondrika izy, mifitsaka, dia lavo eo amin’ny hohony ny ory.

¹¹ Hoy izy, anakampony: «Nanadino Andriamanitra; efa nanarona ny Tavany Izy ka tsy mahita na inona na inona, na oviana na oviana!»

Kôf

¹² Mitsangàna, ry Iaveh, asandrato ny tananao ry Andriamanitra! Aza manadino ny ampahorîna

¹³ Nahoana ny ratsy fanahy no dia mamingavinga an’Andriamanitra? ahoana no anaovany anakam-po hoe: Tsy mamay Ianao?

Resh

¹⁴ Nahita anefa Ianao, fa nijery ny fahoriana amam-pijaliana, mba hiandraiketanao ny momba azy, Ianao no iankinan’ny malahelo; mamonjy ny kamboty Ianao.

Shin

¹⁵ Tapaho ny sandrin’ny ratsy fanahy; ny tsy mpivavaka - raha karohinao ny helony, tsy ho hitanao va izany?

¹⁶ I Iaveh no mpanjaka mandrakizay doria, ho voafongotra eo amin’ny taniny ny firenena.

Tao

¹⁷ Efa nihaino ny fanirian’ny ory Ianao, ry Iaveh; mankahery ny fony sady manongilana ny sofinao mihaino,

¹⁸ mba hanomezanao rariny ny kamboty sy ny hampahorina, ka hitsahatra tsy hampitahotra intsony, ny olombelona nalaina tamin’ny tany.