Ohabolana 5 - Baiboly Katolika

Halaviro ny vehivavy an’olon-kafa; ifikiran’ny hendry ny tena fitiavana

¹ Anaka, tandremo izao fahendreko izao, ary mampandria sofina amin’izao fahalalako izao;

² mba hitahirizanao ny fisainana, sy haharetan’ny molotrao amin’ny fahalalana.

³ Fa mitete tantely ny molotry ny vehivavy an’olon-kafa, ary mamy noho ny diloilo ny vavany.

⁴ Nefa ny farany mangidy toy ny absinta, maranitra toy ny sabatra roa lela.

⁵ Midina ho any amin’ny fahafatesana ny tongony; mamantana ho any amin’ny Seoly ny diany.

⁶ Tsy mandinika ny lalan’ny fiainana, fa manjenjena tsy mahalala izay halehan’ny diany akory izy.

⁷ Koa ankehitriny mihainoa ahy ianareo, anaka, ary aza mihataka amin’ny teny aloaky ny vavako.

⁸ Hampanalaviro azy ny lalanao, aza akekezinao ny varavaran’ny tranony.

⁹ fandrao dia atolotrao ny hafa ny tsara indrindra amin’ny andron’ny fahatanoranao, ary atolotrao ny tompo masiaka ny taonanao;

¹⁰ fandrao dia olon-kafa no hivoky amin’ny fanananao, ary hifindra any an-tranon’ny sasany ny vokatry ny asanao;

¹¹ fandrao dia mitoloko ianao any am-parany, rehefa avy izay hahalevonan’ny nofonao amam-batanao;

¹² ka hanao hoe: «Naninona re aho no nankahala famaizana, ary naninona re ny foko no nanamavo fananarana?

¹³ Naninona re aho no dia tsy nihaino ny feon’ny mpampianatra ahy, ka tsy nampandry sofina tamin’ireo nampianatra ahy?

¹⁴ Efa saiky tonga tamin’ny fara fahoriana aho, teo afovoan’ny vahoaka sy ny fiangonana.»

¹⁵ Ny rano avy amin’ny lavaka famorian-dranonao no sotroy, ny rano mandeha avy amin’ny fantsakanao.

¹⁶ Tsy hipariaka any ivelany anie ny loharanonao; ary tsy handeha any amin’ny kianja anie ny sakeli-dalanao!

¹⁷ Aoka ho anao irery izy, fa aza iombonana amin’ny hafa.

¹⁸ Hosoavina anie ny loharanonao, ary ny vadin’ny fahatanoranao no ataovy fifalianao.

¹⁹ Fa serfa vavy mahatehotia izy ary gazela mahafinaritra, ka aoka ny hasoany hiravoravoanao lalandava, ary ho raiki-pitia azy mandrakariva ianao!

²⁰ Ahoana no ho raiki-pitia vehivavy an’olon-kafa ianao, anaka, ka hanohona izay tratran’olon-tsy fantatra?

²¹ Fa eo imason’i Iaveh ny lalan’ny olombelona, dinihiny avokoa ny lalany rehetra.

²² Ny ratsy fanahy mihitsoka amin’ny ratsy nataony, ny famatoran’ny fahotany ihany no maningotra azy;

²³ Ho faty noho ny tsy fahazoany famaizana izy, ary ho voafitaky ny hadalany tafahoatra.