Ohabolana 31 - Baiboly Katolika

8. TENIN’I LAMOELA

¹ Tenin’i Lamoela mpanjaka. Oha-teny nampianarin-dreniny azy.

² Inona no ho lazaiko aminao, anaka? Inona no holazaiko, ry zanako nateraky ny kiboko? Inona no holazaiko aminao, anaka, ianao izay nalehan’ny faniriako!

³ Aza atolotra ny vehivavy ny herinao; na ny lalanao an’ireo vehivavy mamery mpanjaka.

⁴ Tsy mba an’ny mpanjaka, ry Lamoela, tsy mba an’ny mpanjaka ny misotro divay, na an’ny mpanapaka ny mitady toaka;

⁵ fandrao manadino ny lalàna izy, raha misotro; ka mamily ny rariny ananan’ny mahantra rehetra.

⁶ Fa ny efa ho faty no omeo toaka, ary ny efa vontom-pahoriana ny fanahiny no omeo divay;

⁷ aoka hisotro izy, ka hanadino ny fahoriany ary tsy hahatsiaro ny manjò azy intsony.

⁸ Sokafy ny vavanao hanasoavana ny moana, sy hanohana ny resy tondro maso rehetra manana ady.

⁹ Sokafy ny vavanao, mamoaha fitsarana marina, ary omeo rariny ny ory sy ny mahantra.

9. NY VEHIVAVY MAHERY FO Alef

¹⁰ Iza no mba mety mahita vehivavy mahery fo? mihoatra lavitra noho ny an’ny voahangy, ny tombany.

Bet

¹¹ Matoky azy, ny fon’ny lahy, ary tsy mba handao azy ny tombony miditra

Gimel

¹² Soa ny ataony aminy, fa tsy mba ratsy; amin’ny andro rehetra iainany.

Dalet

¹³ Mamory ny volon’ondry aman-drongony izy, dia miasa an-kafaliana amin’ny tanany.

He

¹⁴ Manahaka ny sambon’ny mpandranto izy, mitondra ny haniny, avy lavitra.

Vao

¹⁵ Mifoha mbola alina izy, dia manome hanina ny ankohonany, sy lahasa ho an’ny ankizy vaviny.

Jain

¹⁶ Mandinika saha izy, dia mividy azy, ary mamboly tanimboaloboka amin’izay efa azon’ny tanany.

Het

¹⁷ Sikinany hery ny valahany, ary hatanjahany ny sandriny.

Tet

¹⁸ Tsaroany mamy ny tombony efa azony, tsy maty jiro izy mandritra ny alina.

Iôd

¹⁹ Mandray ny fihazonam-bohavoha ny tanany; ary mihazona ny ampela ny rantsan-tanany.

Kaf

²⁰ Manatsò-tanana amin’ny ory izy; ary mamela-tanana amin’ny mahantra.

Lamed

²¹ Tsy atahorany fanala ny ankohonany, fa voatafy lamba mena antitra avokoa izy ao an-tranony.

Mem

²² Manao firakotra ho azy izy, manam-pitafiana rongony fotsy madinika sy jaky izy.

Non

²³ Fantatra tsara ny lahy eo am-bavahady, raha mipetraka hitsara miaraka amin’ny loholona.

Samek

²⁴ Manao akanjo lobaka izy, hamidiny; ary mivarotra fehikibo amin’ny mpandranto.

Ain

²⁵ Ny hery sy ny hasoavana no firavaka eny aminy, ary ny andro ho avy ihomehezany.

Fe

²⁶ Amim-pahendrena no isokafan’ny vavany, ary teny soa no eo amin’ny lelany.

Tsade

²⁷ Mitandrina ny alehan’ny ankohonany izy; ary tsy mba mihinana mofom-pahakamoana.

Kôf

²⁸ Ny zanany lahy mitsangana ka milaza azy hoe sambatra; ny vadiny koa mitsangana manome fankalazana azy.

Resh

²⁹ Maro ny zaza vavy miseho ho tsara fanahy, fa ianao kosa anefa dia tafahoatra azy rehetra.

Shin

³⁰ Fitaka ny bika soa, zava-poana ny hatsaran-tarehy; fa ny vehivavy matahotra an’i Iaveh ihany no hoderaina.

Tao

³¹ Aoka ny vokatra avy amin’ny tanany homena azy; ary aoka hitory fiderana eo am-bavahady ny asany.