Lioka 21 - Baiboly Katolika

Ny rakitr’ilay mpitondra tena

¹ Ary nanopy ny masony i Jesoa ka nahita ny mpanan-karena nanatitra vola tao amin’ny fandatsahan-drakitra.

² Dia nahita mpitondratena mahantra anankiray nanatitra farantsa kely varahina roa tao koa Izy,

³ ka nanao hoe: «Lazaiko marina aminareo fa io mpitondratena mahantra io no nandatsaka bebe kokoa noho izy rehetra;

⁴ satria ireo rehetra ireo dia nanatitra ny ambim-bavany ho an’Andriamanitra, fa io kosa, dia tamin’ny fahantrany indrindra izy no nanatitra ny fivelomana rehetra nananany.»

Tenin’i Jesoa momba ny haharavàn’i Jerosalema Filazana mialoha

⁵ Ary nisy nilaza ny Tempoly ho voaravaka vato tsara sy fanatitra sarobidy, fa hoy i Jesoa:

⁶ «Ho avy ny andro handravana ireo zavatra rehetra hitanareo ireo, ka tsy havela hisy vato mifanongoa eo izay tsy horavana.»

⁷ Dia nanontany Azy izy ireo nanao hoe: «Ry Mpampianatra, rahoviana no ho tonga izany, ary inona no famantarana hahalalana fa efa akaiky izany?»

Ireo famantarana mialoha

⁸ Ka hoy i Jesoa hoe: «Tandremo sao voafitaka ianareo, fa maro no ho avy hisandoka ny Anarako hanao hoe: Izaho no izy, ary efa akaiky ny andro, ka aza manaraka azy.

⁹ Ary raha mandre ady sy fikomiana ianareo, aza taitra: fa tsy maintsy ho tonga aloha izany, nefa tsy mbola ho tonga miaraka amin’izay akory ny farany.»

¹⁰ Dia hoy koa Izy tamin’izy ireo: Hisy firenena hitsangana hiady amin’ny firenena, sy fanjakana hiady amin’ny fanjakana;

¹¹ hisy horohoron-tany mafy sy areti-mandringana ary mosary amin’ny tany samihafa; eny an-danitra koa, dia hisy fisehoana mahatahotra sy famantarana lehibe.

¹² Fa alohan’izany rehetra izany ianareo dia hosamborina, hoenjehina, hoentina any amin’ny sinagoga sy an-tranomaizina, ary hatolotra amin’ny mpanjaka sy ny mpifehy noho ny Anarako.

¹³ Izany no ho tonga aminareo, dia mba ho vavolombeloko ianareo.

¹⁴ Koa alatsaho ao am-ponareo ny mba tsy hihevitra mialoha izay havalinareo akory;

¹⁵ fa Izaho ihany no hanome vava anareo, sy fahendrena tsy ho azon’ny fahavalonareo toherina na lavina velively.

¹⁶ Na ny ray aman-dreny sy ny rahalahinareo aza, mbamin’ny havana aman-tsakaizanareo dia hanolotra anareo koa, ka hovonoiny ny maro aminareo,

¹⁷ ary ho halan’ny olona rehetra ianareo noho ny Anarako;

¹⁸ nefa tsy hisy ho very na dia singam-bolo iray amin’ny lohanareo aza.

¹⁹ Ny faharetanareo no hamonjenareo ny tenanareo.

I Jerosalema ho voahodidina

²⁰ «Ary rehefa hitanareo voahodidin’ny miaramila i Jerosalema, dia fantaro amin’izany fa efa antomotra ny fandravana azy,

²¹ ka amin’izany, izay any Jodea aoka handositra any an-tendrombohitra, izay ao an-tanàna aoka hivoaka any ivelany, ary izay any an-tsaha aoka tsy hiditra ao an-tanàna intsony,

²² satria izany andro izany no ho andro famaizana sy hahatanterahan’izay rehetra voasoratra.

²³ Loza no hanjò ny bevohoka sy ny mitaiza kely amin’izany andro izany, fa ho lehibe tokoa ny fahoriana eto an-tany ary ho mafy ny hatezeran’Andriamanitra amin’ity firenena ity:

²⁴ haringana amin’ny lela sabatra izy, sy ho lasan-ko babo any amin’ny firenena rehetra, ary hohitsakitsahin’ny Jentily i Jerosalema mandra-pahafenon’ny andron’ny Jentily.»

Antambo handrava sy ny hahatongavan’ny Zanak’olona

²⁵ «Hisy famantarana koa eny amin’ny masoandro sy ny volana ary ny kintana, ary etỳ an-tany dia ho ory sy very hevitra ny firenena noho ny fikotrokotroky ny ranomasina sy ny onjany;

²⁶ ho ankona foana ny olona noho ny fahatahorany sy ny fiandrasany izay loza hanjò an’izao tontolo izao, fa hihozongozona ny herin’ny lanitra.

²⁷ Dia ho hita amin’izay ny Zanak’olona avy any ambonin’ny rahona amim-pahefana sy voninahitra lehibe.

²⁸ Raha vao miantomboka izany zavatra izany, dia miandrandrà ka asandrato ny lohanareo, fa efa akaiky ny fanavotana anareo.»

Ny fotoana hiavian’ny Zanak’olona

²⁹ Ary Izy nanao fanoharana taminy hoe: «Jereo ny aviavy sy ny hazo rehetra:

³⁰ raha vao hitanareo fa manaroka izy, dia fantatrareo fa akaiky ny fahavaratra.

³¹ Toy izany koa raha vao hitanareo fa tonga izany zavatra izany, dia fantaro fa akaiky ny fanjakan’Andriamanitra.

³² Lazaiko marina aminareo fa tsy ho lany ity taranaka ity ambara-pahatongan’izany rehetra izany.

³³ Ho levona ny lanitra sy ny tany fa ny teniko tsy mba ho levona.»

Miambena mba tsy hotampohina

³⁴ «Tandremo àry fandrao vesaran’ny fihinanan-doatra sy ny fimamoana ary ny fiahiana izao fiainana izao ny fonareo, ka tratrany tonga tampoka aminareo anie izany andro izany e!

³⁵ Fa ho sahala amin’ny fandrika hahavoa ny olona rehetra mitoetra eto ambonin’ny tany izany.

³⁶ Koa miambena àry, ary mivavaha mandrakariva mba ho mendrika ho afaka amin’izany loza rehetra tsy maintsy tonga izany ianareo, ka hitsangana hiseho eo anatrehan’ny Zanak’olona.»

Ireo andro faramparany niainan’i Jesoa

³⁷ Tamin’ny antoandro no nampianatra tao an-Tempoly i Jesoa, fa nony avy ao dia lasa nivoaka nandritra ny alina tany amin’ny tendrombohitra Oliva.

³⁸ Ary vao maraina koa dia nanatona azy tao an-Tempoly ny vahoaka rehetra mba hihaino Azy.