Hebreo 1 - Baiboly Katolika

TENY MIALOHA Fahambonian’ny Zanak’Andriamanitra tonga nofo

¹ Fahiny, tamin’ny fotoana sy ny fomba samihafa, dia efa niteny tamin’ny razantsika Andriamanitra, tamin’ny vavan’ny mpaminany;

² fa amin’izao andro farany izao kosa indray, dia tamin’ny Zanany no nitenenany tamintsika, dia Ilay notendreny ho mpandova ny zavatra rehetra, sy nahariany an’izao tontolo izao.

³ Io Zanany io izay famirapiratan’ny voninahiny, sy mariky ny Tenany, ary manohana ny zavatra rehetra amin’ny herin’ny teniny, dia mipetraka eo ankavanan’ny fiandrianany masina any amin’ny avo indrindra nony avy nanao ny fanadiovana ny fahotantsika.

⁴ ka natao ambonin’ny Anjely, arakaraka ny fahambonian’Anarana nolovany, fa tsy tahaka ny azy ireo.

I. AMBONY NOHO NY ANJELY NY ZANAKA Porofo araka ny Soratra Masina

⁵ Fa Anjely iza no mba nilazan’Andriamanitra hoe: Zanako Ianao, Izaho no niteraka Anao androany? sy ny hoe: Izaho no Rainy, ary Izy no Zanako?

⁶ Ary rehefa mampiditra ny Lahimatoa atỳ ambonin’ny tany indray izy, dia manao hoe: Aoka hitsaoka azy ny Anjelin’Andriamanitra rehetra.

⁷ Ny Anjely lazainy hoe: Nanao ny Anjeliny ho rivotra Izy, ary ny mpanompony ho lelafo;

⁸ fa ny Zanaka kosa ataony hoe: Ny seza fiandriananao, Andriamanitra ô, dia mandrakizay doria, ary ny tehim-pahitsiana no tehim-panjakanao.

⁹ Tia ny fahamarinana Ianao, fa mankahala ny heloka kosa, ka nohosoran’Andriamanitra, izay Andriamanitrao, diloilom-pifaliana mihoatra noho ny namanao rehetra.

¹⁰ Ary izao koa: Ianao, Tompo ô, no nanorina ny tany tamin’ny voalohany, ary asan-tananao ny lanitra.

¹¹ Izy ireo ho levona, fa Ianao haharitra; ho tonta toy ny fitafiana izy,

¹² ary havalonao toy ny lamba, ka hovana avokoa; fa Ianao no tsy miova, ary ny taonanao no tsy ho tapitra.

¹³ Ary iza tamin’ny Anjely no nataony hoe: Mipetraha eo ankavanako, ambara-panaoko ny fahavalonao ho fitoeran-tongotrao?

¹⁴ Moa tsy fanahy manompo va izy rehetra, nirahina hanao fanompoana ho an’izay handova ny famonjena?