Salamo 25 - Baiboly Katolika Baiboly Katolika
Salamo 25

¹ Salamon’i Davida. Ianao, ry Iaveh, no anandratako ny fanahiko, ry Andriamanitra ô!

² Ianao no itokiako, aoka tsy ho menatra aho, aoka tsy hifalian’ny fahavaloko aho!

³ Tokoa fa tsy hisy ho menatra izay rehetra manantena Anao; izay mivadika foana dia ireo no ho menatra.

⁴ Iaveh ô, ampahafantaro ny lalanao aho; ampianaro ny sakeli-dalanao aho.

⁵ Tariho amin’ny fahamarinanao aho, ary ampianaro, fa Andriamanitry ny famonjeko Ianao; Ianao no antenaiko mandritra ny andro.

⁶ Tsarovy ny famindram-ponao, ry Iaveh, sy ny hatsaram-ponao, fa mandrakizay ireny.

⁷ Aza tsarovanao ny fahotan’ny fahatanorako, na ny hadisoako, fa tsarovy araka ny famindram-ponao aho, noho ny hatsaram-ponao, ry Iaveh.

⁸ Tsara sy mahitsy fo i Iaveh; izany no anoroany lalana ny mpanota.

⁹ Mampizotra ny manetry tena amin’ny fahamarinana Izy, mampianatra ny manetry tena ny lalany Izy.

¹⁰ Famindram-po amam-pahamarinana avokoa ny lalan’i Iaveh amin’izay mitandrina ny fanekeny sy ny didiny.

¹¹ Noho ny Anaranao, ry Iaveh, dia hamela ny heloko Ianao fa lehibe izy.

¹² Iza no olona matahotra an’i Iaveh? Hampianarin’i Iaveh azy ny lalana tokony hofidiny.

¹³ Mandry amim-piadanana ny fanahiny, ary hanana ny taniny ny taranany.

¹⁴ Ny fifankazarana amin’i Iaveh dia anjaran’ny matahotra Azy. Hampahafantariny azy ny fanambinana avy amin’ny fanekem-pihavanany.

¹⁵ Mitodika any amin’i Iaveh mandrakariva ny masoko, fa Izy no hanafaka ny tongotro amin’ny fandrika harato.

¹⁶ Jereo aho, ka amindrao fo, fa manirery aho, ka mahantra.

¹⁷ Mihalehibe ny fahorian’ny foko, afaho amin’ny fahaporetako aho!

¹⁸ Jereo ny fahoriana amam-pijaliako; ary avelao ny fahotako rehetra.

¹⁹ Jereo ity hamaroan’ny fahavaloko, sy izato halozan’ny fankahalany ahy.

²⁰ Arovy ny fanahiko, ary vonjeo aho; aoka tsy ho menatra aho, fa Ianao no nametrahako ny fitokiako.

²¹ Haharo ahy anie tsy fananan-tsiny amam-pahitsiana, fa Ianao no antenaiko.

²² Ry Andriamanitra ô, afaho i Israely amin’ny fahoriany rehetra.