መጽሐፈ ሲራክ 5 - መጽሐፍ ቅዱስ - (ካቶሊካዊ እትም - ኤማሁስ)

ሀብትና አጉል ድፍረት

¹ በሀብትህ አትመካ፤ ሀብቴ ይበቃኛል አትበል፤

² የልብህን ፈቃድ ለመፈጸም በስሜትህ ና በጉልበትህ አትመራ።

³ እግዚአብሔር በርግጥ ይቀጣሃልና፥ “በኔ ላይ ሥልጣን የሚኖረው ማነው?” አትበል።

⁴ እግዚአብሔር ትዕግሥት ትልቅ ነውና፥ “ኃጢአት ሠራሁ ምን መጣብኝ?” አትበል።

⁵ በበደል ላይ በደል እየከመርህ፥ ይቅርታ አገኛለሁ ብለህ እርግጠኛ አትሁን።

⁶ “ኀዘኔታው ታላቅ ነው፤ ኃጢአቶቼንም ይቅር ይልልኛል” አትበል።

⁷ ሳትዘገይ ወደ እግዚአብሔር ተመለስ፤ ነገ ከነገ ወዲያ እያልህ ቀኑን አታራዝም፤ ምክንያቱም የእግዚአብሔር ቁጣ በድንገት ከተፍ ይላል፤ በቅጣት ቀን ትደመሰሳለህ።

⁸ አላግባብ በተገኘ ሀብት አትመካ፤ በመከራ ቀን ለምንም አያገለግልህም።

ግልጽነትና ራስን መሆን

⁹ በመጣው ነፋስ ሁሉ አትነፈስ፤ ባገኘኸው መንገድ ሁሉ አትሂድ። በሁለት ምላስ እንደሚናገረው ኃጢአተኛ አትሁን

¹⁰ በእምነትህ ጽና፤ በቃልህ ታመን፤

¹¹ ለመስማት የፈጠንክ፥ ለመልስ የገዘገየህ ሁን።

¹² ጉዳዩ ከገባህ ለጐረቤትህ መልስለት፤ አለበለዚያ እጅህን በአፍህ ላይ አድርግ።

¹³ ክብርም፥ ውርደትም ከንግግር ይገኛል፤

ምላስ የባለቤቷን ውድቀት ታስከትላለች።

¹⁴ የሐሜተኛ ዝነኝነት ይቅርብህ፤ በምላስህ የሐሜት ወጥመድ አትዘርጋ፤ በሌላ ላይ እፍረት እንደሚወድቅበት፤ በአታላይ ሰው ላይም ብርቱ ፍርድ ይወድቅበታል።

¹⁵ ከታናናሾችም ሆነ ከታላላቆች፤ ስሕተቶች ተጠንቀቅ፤