TAKSU LAK 30 - ASII LAKDAP Bible (BSI)

Agur Taksu Bomtsi

¹ Arka Agur se Jake raq achongkuq riisham bomtsi Apaiq raq akha chongtlo: “Shiikeawe ka ngi rai ahü, Shiikeawe ka ngi rai ahü, ngi ka jamkhii ijasiq!

² Ngi ka ralang ngamtam kaü ikhli, taksu tsii ahü. Maiqse raq taksu tsii rümtlaq ka, ngi raq sap mang.

³ Ngi raq anyan phaqchi, shrin mang dea. Ngi raq Shiikeawe rai, mang riisap mang dea.

⁴ Ramungtan phaqchi tsinti juwa? Jurwa rahai ka ajaqphi na, khon raüta shamti? Jurwa sammoktra chum ka, khea thum na thopti? Juwa hiq rai ra rai kra, chumtapti? kriiwe mang ka juwa? ümniiraq asap haü shea? ase mang juwa?

⁵ “Shiikeawe raq akiqkham, tsishi min tiikhea mak, tiikutlo. Awokhong na siti wiita ma, apaiq ka akhup wongti liiq.

⁶ Apaiq raq chong mak wa, chongto ngu haüla, apaiq raq ümniika mison; kiimaq ümniika arotwe mijahaü.”

Abiri Uqkhiima Bomtsi

⁷ Shiikeawe lei ümjaq wa, phannai jaütiikang; kra ngi mitsai shaq na kuqlaq.

⁸ Inümaq arot bom, naq tiichongkiq; kiimaq ngi ka chiithehea min, naq tiijakiq miitsan hea min, naq tiijakiq. Ngi ma phaq nai sea, ümchuwa ratlaq kra, khaqkhaq kuq laq.

⁹ Ngi ka rongboqhea riihala, ümniika moshipoq mirha sham, kiimaq ngi ka miitsan hea riihala, i ramtsi ma ahuk mojakai miraq, lata Shiikeawe mang motibi miraq.

¹⁰ Atijongwe man na, ajaqshi se ka naqchong siq kiq; ajaqthi se raq ümniima, man mison, kra ümniima miniki.

¹¹ Maiq wiijam raq, awetiim ka ason riitlo; kiimaq anyungtiim ma, kechu tumkuq mak riitlo.

¹² Maiq wiijam raq tsangshiq tsan ka asii sitiikai nguta tiimatlo. Shatmaq tsangshiq tsan ka anyaq pinthum.

¹³ Maiq wiijamti raq, tsangshiq ka tarü thaq na, maiqshaq pinthum nguta riiweatlo! “Naishiq ka maiqshaq pinthum,” nguta tiimatlo!

¹⁴ Maiq wiijamti ka phususang; tsangshiq raq miitsan maiqse ka, nanshanshan haihiitlo. Raüta tsangshiq chiithe ma jatlo.

¹⁵ Tiiwat ma ase ka anai. Tsangnai mang ka “Ngi ma kuqlaq!” hupsam phantsam asi, kriiraq mit-sito ngumak phan; phanblai ngoja raq, “hongtoshe” ngumak phan.

¹⁶ Wulum mung, sehü nyungwok, kham ahü hiqshin mung kiimaq wakhiim dong raq, ümtiikiimin hongtoshe ngumak.

¹⁷ Awe tikiija na niqsiq tlaq, anyung wikaüja na saisitlaq, kriiti makpo ka khala ma tiichat baiq chang, angam ka langtang ma tiiphaq chang.

¹⁸ Ngi ma phantsam asi kra, chhilata wangtiikang; kiimaq phanblai ngojati ma, ngi amao riitiikang.

¹⁹ Liihawe ra na bitlaq kra, paü raq long raq na khumtlaq kra, sammoktra na mokkiitu jiiqtlaq kra, kiimaq maiqwe nai jechak, liipan riilungwii tlaq kra.

²⁰ Sethoq nyung riika akha riitlo; apaiq raq phaqsiqtlo; raüta anii ka tattlo, raüta, “Ngi raq jammin tiibi mangla?” nguta bomtlo!

²¹ Mang jonghiq na phantsam asi, kra dongraü jaq hiq ka atiikhai riitlo; phanblai ngoja dong raüla, hiq raq ninlot mak she.

²² Dise hokham ma ja raüjaq, maiqjiqwe ma chamtraq tiiphaqsiq raü jaq,

²³ kiimaq jungshu nyung raq, awese hum raüjaq, kiimaq ajaqshi se raq atijong nyung changkhü songho raüjaq.

²⁴ Mangjong hiq na atra phan phanblai asi; tsangshiq ka asham lümaq aransetiim. Shatmaq pinthum khonglaq.

²⁵ Saisiikong: tsangshiq ka akhüsetiim. Shatmaq rajuji na phaqsea miitu, tsangshiq tsamtiip thütlo.

²⁶ Longraq na siti phongtsai ka, ahong ala riimak; shatmaq tsangshiq ka, longraq mong na sitlo.

²⁷ Kiimaq kupchikong ka, apengti hokham ahü. Shatmaq tsangshiq ka, kongta hushhu maq khumtlo.

²⁸ Kiimahali jam na siti waithot ka, jaqphi na khon laita mitiihaisiq lot; shatmaq tsangshiq ka, hokham jam thun na sitlo.

²⁹ Phantsam atra phan asi; tsangshiq khum ka aliisea chang. Phanblai ngojati ka, maiqkha akii khumtlo.

³⁰ Hangsikong, nyamse angu, thaq na honghea pinthum. Kiimaq jamlai miimin, haimak phan.

³¹ Kiimaq chhechhikong, wupongwenai riithaü, kiimaq asengi phong na, hokhambi khumtlaq kra.

³² Ümniidea ajong nguta kumrong tlaü, kiimaq ajiq kiimung tiima tlaü jiila, kra athaq riilaq. Laüta phanshi atiima riilaq!

³³ Minsaü nyakpü ka, thamnyea maq tro raüla, apü miishe mijaki. Kiimaq jaqtham maq, khüpo na thong raüla, tiijai midong. Ümniiraq maiqtsan tiikhiq haüla, tatso midong.