NEHEMIA 5 - ASII LAKDAP Bible (BSI)

Thümsaü Litseti Haihiito

¹ Arjai maq heashi sijai na, nokmaiqse wa jechak maiqwe pahea i phana wato. Raüta tsangshiq raq ngi ma, maiqmii Jehudinok raq, tsangshiq ka, nanshan haihiitlo nguta shokto.

² “Naishiq ka jam shi na maiq pahea sitiikai. Naishiq atra si miitu rai awong kuq laq,” nguta tsangshiq phong wa maiq wiijamti raq ramtsi ma tiibotto.

³ Kiimaq, wiijamti raq hali ka, “Naishiq ka ram raq haü wan laita, atsaitsi ma, wak thun, spiqro thun, kiimaq jam thun wiita she maiq ma raipo wonglo miitu shiila na tiikha kuq kai.”

⁴ Kiimaq, maiq wiijamti riika, “Naishiq ha hokhamwe ma wak phunta, kiimaq spiqro phunta thun kewan chang kampho ahü kha maq, kampho nam laita, maiqtijong howan kai. Laita kra kampho maq phunta kuq wan kai.

⁵ Riita, naishiq armin la, nanok kiikha Jehudinok phan maiqsesii. Phanshi maqshi. Naisetiim kiiminla, tsangshiq saü asetiim kiikhiisii lüsaü wasetiim sii riimak sha? Shatmaq, naisetiim jechaksere wiijam ka, maiqdi ma ashabaiqwi she. Ümchaü naishiq ka maiqdi maiqmakong she sitiikai. Jamkhano ngukla, naishiq wak thun nai spiqro thun ka, wiita maiq raq anyeaho wishe.”

⁶ Tsangshiq raq kha shoktaq kra tai lata, ngi ka kai khiq kang.

⁷ Kiimaq arthun khü akha arka, atritsi photsiimke chang nguta, thapthi wan kang. Krai mren, ngi raq welabi nai mung shiilangbi ka tiishut wan kang. Lata, “Namshiq raq maiqmiinok ata jehin nore ka jaram wa nanshan tlan!” nguta tsangshiq ka son kang. Latiishe, ara mungkha ara phoke miitu, ngongthung wan miitu mungmaiqse ka tiihea kang.

⁸ Latiishe, welabi ma, “Naishiq welabi raq Jehudinok phunai notiim, tsangshiq thüm alit tsi ma, maiq ümchu riiwa maiqmii khum ka pongmung maiqsetiim jaqkhon na, di ma tiisha wantaq, kriiti ka, naishiq raq atangtang dokda wan kai. Ümchaü namshiq riishea, maiqmii Jehudinok phan riilantiitiq, namphu namnotiim, Jehudinok kra namdisetiim ma tiija lanta rüm wan tlan!” nguta tsangshiq ka son kang. Kiimaq tsangshiq phukhu welabi ka poshi min bommak kaiqshak li riito.

⁹ Kiijiishe, ngi raq akha ngukang, “Namshiq raq jamlai wa klo tlan ka ashut! Namshiq raq Shiikeawe aming ka lang chang. Lanta ating arai kra sham chang. Kiikha riihan jiitiq, Pongnok phan maiqse raq, nashiq shummii chang lamlu hummak miraq.

¹⁰ Ngi raq nanok ma kampho kiimaq rai awong thun tiinam kuq wan kang. Kiimaq ikongtitiim riimin kiikhiisii tiinam kuq wanto. Kiimaq isengi, ijaqsham kewanti riimin, akhiisii tiinam kuqto. Riita, ümchaü min, nashiq tarü raq thiitham thun ka atham jaümaili she thaq baiq rong i.

¹¹ Tsangshiq raq, namshiq ma athamke chang ümchuwa sitlaq, kampho anam lo, tü atsam anam lo, che anam lo, olip petsitai anam lo, krii thun raüpot akha ka wiita she diibaiq rong laq. Lanta, tsangshiq wak thun ka, spiqro thun ka, olip pero thun ka, kiimaq jam thun ka, wiita tsangshiq ma jangkuq rong laq!”

¹² Kiijiishe, welabi raq akha treto, “Ümniiraq jamlai wa chong tlaü kra naishiq raq mitai hai. Naishiq raq tsangshiq tachong hupsam thun ka wiita mijangkuq hai. Kiimaq thiitham kiimin jaüki mai she.” Kiijiishe ngi raq ramwebi ka heakang. Lata, tsangshiq man na, welabi raq kiq khamkuqtaq kra riikhaqli mishamhai nguta tsangshiq ma tumkham tiinyang kang.

¹³ Kra lot laitiishe, ngi raq ichhü na pa tiikang kheachü shinket kra chhut lata, naüshaüshaü naübaiq kang. Kra naü baiq lam maq, “Ikhii jiila, ümchaü armiiphat, namshiq phong wa jurwa, ara kiqkham raüpot lang mak riijiiq, Shiikeawe raq kriiti jamkun nai kriiti tachong kra hutjok, minaü baiq laq. Raüta namshiq ka kheahü kealok she mitiichamchao laq,” nguta tsangshiq ma tumkham tiinyang kang. Krai mren, kiijaq ngati tarü raq, “Amen!” nguto. Kiimaq Tatiwe ka tiitsamto. Krai mren welabi raq tsangshiq kiqkham ka riikhaqli maq lang wanto.

Tsantsii Kiinong Raüta Mung Pengto

¹⁴ Ngi raq Judia wang na wiiroqshi ri wiinai wanghuptiwe jaqsham wan kang. Kriika hokhamwe Artajarses raq munglang wan li maq wiiroq nai ngoja rawii maq shampha wan lata, wiiroqtsam ri wiinai ngoja na saüli sham kang. Kra jaqsham kang akhing na, ngi raq wanghuptiwe rii athiiq, phaq nai sea thun, ijamtitiim riimin jaü phaqsiq wan mak dea riito. Kiimaq ngi riimin jaü phaqsiq wan mang riikang.

¹⁵ Ngi ma sinkhu na wanghuptibi siwantaqti thun dunghea wan ka, mungmaiqse ma hekii laihea ashi riito. Tsangshiq raq phaq nai sea miitu kiimaq che miitu, mungmaiqse jaq wa kampho ka ranaiqtek kamsii roqblailai jaü wanto. Kiimaq tsangshiq lukhapbi riimin, mungmaiqse ka shiiteplep raüta jaüphaqsiq wanto. Shatmaq ngi riikaq jaüphaq siq wan mang. Jamkhano ngukla, ngi raq Shiikeawe shreng tiikang.

¹⁶ Ngi raq iningkun ka, ruk tiihea hai wan jaqsham niili tiitsi lata, jaqsham wan kang. Kiimaq maiqmii miitu tachong hupsam jamlai min riichom wan mang. Kiimaq ijaq khong na siti luqkhapbi loweatek raq, ngi rai adam maq, ruk tiihea hai jaqsham kra, sham rangrang sham wan damto.

¹⁷ Kiimahali, ngi raq miitut wan tlii maq, Jehudinok nai tsangshiq shunshea wanti phukhu welabi ka, maiq shishi ri roqbiingi ijam na dung wan kang. Arthaq niimin, maiq mung ahinti Judia wang tro wa, wanwe aki awa khumti üntinkhan wa, i jam na saü tlaq, kra dunghiq wan kang.

¹⁸ Ngi raq ranaiqtek, minsaü pongwe shamheaheati kra tsea lata, kiimaq aheaheati skusetiim trok, kiimaq wu ka pahea takuq wan lili riilata, mungmaiqse ka dunghiq wan kang. Kiimahali, raroq shishi sijai na, che ka anye asum akam chamtraq tiiphaq siq lili riikang. Shatmaq, wanghuptiwe pao wan holai ka mungmaiqse ma laihea nguta asapha. Kriikha maq, mungmaiqse raq wanghuptiwe rii ümtinkhan tsiiq nai nyam kewan chang wa kriika, ngi raq jaüphaqsiq wan mang riikang.

¹⁹ O, sanseng ramungtan na siti Shiikeawe lei, ngi raq mungmaiqse miitu ümtinkhan wa jaqsham athuk atsom shamkuq wan kang kra, ümtsan na tiitsang laq nguta achu jaü tiikang.