DUNGWVNC 7 - ASII LAKDAP Bible (BSI)

¹ Tatiwe raq nguto, “Ngi raq ümniika hokhamwe man na shiikeawe ikha mitiijaha. Kiimaq ümphu Aron ka ümshammiwe ma jaraüta bom michong.

² Ngi raq ümniima aming kuqtiikang thun ka wiita Aron chonglaq, kiimaq apaiq raq hokhamwe ma Israilnok ka amungtan kiiwa tiiwalaq nguta michong.

^3-4 Shatmaq Ngi raq hokhamwe tsantsii ka wanshak lanlaqlaq mitiija baiqha. Kiimaq apaiq raq ümbom ka taimak miraq. Ngi raq Ejip mung na phiiptsi jiiptsi ümtinkhanli shamha jiimin taimak miraq. Kiijiishetiq Ngi raq Ejip mung ma imo ka hengbiti she mitiihoha. Lata Ngi raq isenginok maiq phan thun ka armung wa ahin na mitsuq wanha.

⁵ Ngi raq ijaq ka tsangshiq khuthaq na dolata, mo tiiho latiishe Israilnok ka tsang mung wa tsuq wan tiikang kra chhi raütiitiq, Ejip mungti raq Ngi ka Tatiwe dea nguta misap.”

⁶ Mosheq nai Aron raq Tatiwe raq jamlai aming wa tataq kra kloto.

⁷ Tsangnai raq hokhamwe rai riibomtaq akhing na, Mosheq ka wiiroq tiichat maiq riito. Kiimaq Aron ka wiiroq tiichat ri wiitsam maiq riito.

Aron Nyeakii

⁸ Tatiwe raq Mosheq nai Aron ma chongto,

⁹ “Hokhamwe raq namnai raq arang hotlan ka awang chang jaqsham lanta tiichhike raa nguta shiitepho raüla, Aron ma anyeakii ka hokhamwe miki na riiwak baiqlaq nguta thaülaq. Raüla kra nyeakii ka paükaü ma mijaki.”

¹⁰ Krai mren Mosheq nai Aron ka hokhamwe phana wato. Raüta Tatiwe raq aming kuqtaq kiikha kloto. Aron raq hokhamwe nai asengi ajong alabi miki na anyeakii ka hiq na riiwak baiqto. Kiimaq kra nyeakii ka paükaü ma jakito.

¹¹ Kiijiishe hokhamwe raq asenginok taksu maiqsetiim nai mintin klotibi thun ka tiihea kito. Kiimaq tsangshiq raq mintin klo raüta kiikhiisii kloto.

¹² Tsangshiq raq tsang nyeakii thun ka hiq na baiqto. Riikiita kra nyeakii thun ka paükaütiim ma jakito. Shatmaq kriithun ka Aron nyeakii raq wiita jokbaiqto.

¹³ Shatmaq, hokhamwe ka akhiismin mak riijap mak wanshak shak riito. Arka Tatiwe raq chongtaq kra phan phan lankito. Hokhamwe raq Mosheq nai Aron bom ka taimak riito.

Ejip Mung Ka Tsamku Wa Thun Raq Bukto Tiijai Thadong

¹⁴ Kiijiishe Tatiwe raq Mosheq ma nguto, “Hokhamwe ka pinthum wanshak shak kiimaq isenginok ka tiiwa mak ningtang hoto.

¹⁵ Kra ningkhan ümniika kilaq. Laüta apaiq ka ranap na Nail rai na kitlaq kiijaq kilaüta riihumkikiq. Ümjaq na nyeakii paü ma jakitaq kra lamho laüta kilaq. Laüta apaiq ka Nai rai kii na saükai kra khelilaq.

¹⁶ Laüta hokhamwe ma akha ngulaq, Tatiwe, Hibrunok Shiikeawe raq ngi ka ümniima asenginok ka tiiwa laq, raüta tsangshiq raq apaiq ka kumtsaiphii rumnyangkhi wang na mishomnoq kilaq nguta tiichong kito. Shatmaq ümchaü niitaq ümniiraq kra bom chong ka taimaü li ngiimtlaü.

¹⁷ Chaü lei, ümchaü, Tatiwe raq ümniima ngutlo, apaiq ka juwa kra ümniiraq apaiq jaqsham kra chhi laütiishetiq misap haü nguta chongtlo. Liilaq, ümchaü ngi raq jurai wa kham ka ara nyeakii armaq mitsat-ha, kiimaq jürai wa kham ka tiijai ma mijaki.

¹⁸ Raüla, ngiq thun ka wiita mijiim. Kiimaq jürai wa kham ka wiita anamshe mirki. Kiimaq Ejip mungti raq arwa kham ka nyanglot mak she miraq.’”

¹⁹ Tatiwe raq Mosheq ma thaüto, “Aron ma chonglaq, anyeakii ka lamho raüta Ejip mung na sitlaq tlotli jürai thun, khamchelam thun, kiimaq thamchum thun thaq na tiinyi raüta anyeakii ka ra na midolaq. Kra raüla kham thun ka wiita tiijai ma mijaki. Mung tlotli na tiijai tonglong lishe miraq. Pe maq ahai khamthii chang waqkhü thun nai long tsabum thun wiimin kham ka wiita tiijai ma siisaq mijaki.”

²⁰ Kiijiishe Mosheq nai Aron raq tsangnai ma Tatiwe raq aming tattaq kra phan phan kloto. Hokhamwe makki na nai asenginok ajong alabi thun makki na, Aron raq anyeakii ka ra na doto. Raüta jürai wa kham ka riihot bukto. Kiimaq kiiwa kham tlotli ka wiita tiijai miishe jakito.

²¹ Jürai wa ngiq thun ka wiita jiimto. Raüta anam tsangwa lishe Ejip mungti raq kham ka nyanglot mak she riito. Ejip mung tlotli na tiijai tonglongli she riito.

²² Kiijiishe hokhamwe sengi mintin klotibi raq tsangshiq mintin klo raüta kiikhiisii kham ka tiijai ma tiijato. Kiimaq hokhamwe ka kongkhuji na jamkho kiikha wanshak shak, akhiismin riilap makli riito. Tatiwe raq chongtaq kra phan phan, hokhamwe raq Mosheq nai Aron bom ka taimak ngiimra li riito.

²³ Apaiq ka, kra mra pin kra chhi raüta bomtai rii na khoti, jamlai atsan atsii min kuqmak maq, tiiphe phok raüta, apaiq ahokham jam nü kiina kokkok wawanto.

²⁴ Ejip mungti tlotli raq jürai kii binjü na anyang chang kham miitu khappong she thuto. Jamkhano ngukla tsangshiq raq jürai wa kham ka nyanglot mak she riito.

²⁵ Tatiwe raq jürai ka tiithen baiq jai maq ramiishi she sito.