DUNGWVNC 21 - ASII LAKDAP Bible (BSI)

Disetiim Rüm

¹ “Israilnok ma arthun thungtri raüto ara kuqlaq:

² Ümniiraq Hibru phan wa di la ri haüla, apaiq raq ümniima wiitrok jaq mishamkuq. Wiimiishi saüto angu na apaiq ka ümwokhong wa dokdahü miilishe apaiq ka wase she miraq. Raüta apaiq ka miwawan.

³ Apaiq ka ümdise ma jawantaq akhing na achak lamhü jiila, apaiq ka wase ma donghotlaq akhing na apaiq raq achak ka apaiq rai shea wan lot mak miraq. Shatmaq ümtiikiiwa apaiq ka ümdise ma jawantaq akhing na achak asi riitaq jiika, apaiq raq achak ka apaiq rai shea wan dam mimai.

⁴ Shatmaq atijongwe raq apaiq ma achak lamkuqtaq, raüta tsang nyung raq asetiim maiqwe sere lo jechaksere humtaq jiila, krii-nyung nai asetiim ka atijongwe rii she. Kriiwe ka apaiq hon hon li she mikiho.

⁵ Shatmaq kra diwe raq atsan tsü maq apaiq raq atijongwe ka lungwiitlaq kiimaq tsang nyung nai asetiim ka lungwiitlaq jiika, kiimaq apaiq ka wase ma jaho romak jiila,

⁶ atijongwe raq apaiq ka noqku chang ba kiijaq misheaho. Raüta apaiq ka kiijaq kilamchong tiinap na lo kilamchong pumpat na tiininsaq tiichap chang. Raüta anilok ka tiipu thot chang. Raüla apaiq ka rilung pattup atijongwe dise miili she misi.

⁷ “Kiimaq maiq weshi ra raq ase jechakse ka maiq ma di miila shabaiq raüla, kriinyung ka maiqwe dise tiidongbaiqtlaq kiikha wase ma tiidong baiq ka raamak she.

⁸ Kiimaq apaiq ka maiq weshi ra raq achak ma rom wan tiimatlaq kriiti ma shakuq raüla, shatmaq apaiq raq lungwii mak, raüla apaiq ka awe ma hali shake nong ratlo. Atijongwe raq apaiq ka pong mungti ma shake maimak. Jamkhano ngukla apaiq raq adi nyung ka riikhaq tri maq shiili liimak riito.

⁹ Kiimaq maiq weshi ra raq ase ma romke ma nguta dinyung ri raüla, apaiq raq krii-nyung ka ase jechakse ikha shiili liichang.

¹⁰ Kiimaq maiq kriiraq achak nyung nye nyungchü thaq na lam raüla, apaiq raq tsang-nyung nyung chiiti kiimiimin tü adung kiimaq khu akhea ka apha na jamkho dunghiqtaq kiikha dunghea ratlo. Kiimaq kongkhu na singataq kiikha sinyung siwe hainga ka mren chhaq li riichang.

¹¹ Kiimaq apaiq raq arthun ara tsangnyung ma liiko kuq mak raüla, apaiq raq tsang nyung ka ajam wa atu niili tiiwabaiq ratlo kiimaq apaiq raq ari athii lapchang jamin ahü miraq.

Mat Atsa Kha Tri

¹² “Jurwa maiqwe ashi ka buktlaq raüta tiitsai baiqtlaq, raüla apaiq ka atsea baiq chang.

¹³ Shatmaq kra mra pintaq ka shaiqshuq shi miili pinkitaq apaiq raq samsam maq atsea dongdii nguta atsat riimak jiika, kriiwe ka Ngi raq namshiq miitu ümra hiqshong wa tsea lata thütiikang kra hiqshong na juraüta tiipaü kaichang. Kiimaq apaiq ka kiijaq tiiwongshat misi.

¹⁴ Shatmaq maiq weshi raq, atsankhiq tsi ma tamlam lam maq maiq ashi kra tiitsailaq tsatbaiq raüla, kra matwe ka atsea baiq chang. Apaiq ka akhum tiikhe wa i berong-wacha na tiipaü juraü min atsea baiq ratlo.

¹⁵ “Jurwa awe lo kiimaq anyung lo buktlaq, apaiq ka tiitsailaq tsea baiq ratlo.

¹⁶ “Jurwa maiq weshi ra ka maiq ma shaphaq miitu lo riimakla adi ma tiija miitu ahukse maq lap wan tlaq, apaiq ka atsea baiq ratlo.

¹⁷ “Jurwa awe ma lo anyung ma lo manson kiqsü riitlaq, apaiq ka atsea baiq ratlo.

^18-19 “Kiimaq maiq wenai liipan na tatso raüta, maiq weshi raq arewe ka long maq thongtlaq, riimakla ajaq tham maq thaütaq jiila, shatmaq tiitsailaq ka tsat mak dea jiila, apaiq ma mo ka tiiho raamak. Kiimaq maiqmo hotiwe ka chang na tiibum li shatmaq, jaimaq ahea she riiki raüta apaiq ka nyeakii thi raüta kinphai na khumkilot tlaq jiila, apaiq tseatiwe raq mo hotiwe kiima ümchu ranaiq wa apaiq chiim raitaq kra ningchang ka keraatlo. Kiimaq atsitiwe ka miheashaq wiiwii ajaqtiwe raq dunghea ratlo.

²⁰ “Kiimaq maiq weshi raq pekii maq adise ka tsat raüla, dise ka maiqwe lo jechak lo jiimin, kiimaq dise ka kiijaq chut tsaiki raüla, kriiwe ma mo ka tiiho ratlo.

²¹ Shatmaq kra dise ka ranaiq shi nai ranaiq nai liipan na tsaimak dea jiila, atijongwe ma mo ka tiiho raamak. Apaiq tachong hupsam adise sumtaq kriili she apaiq ma moho ma mija.

²² “Kiimaq maiqwere wiijam ka tatso rai. Raüta maiqnyung wiihan kra tangrat raüta, ase ka mase ma tiijabaiq raüla, shatmaq anyung ka mitsi mak ahea jiila, kriinyung dü na jaq miiqtiwe kriika awese raq ümchuwa jaütlaq kra phan phan atsa chang. Kiitiina phowebi raq tri ka tanke chang.

²³ Shatmaq kra jechak nyung apaiq kriimin moholi she riitaq jiila, kra kha tham ka miisaq ka miisaq ma song ratlo,

²⁴ mak ka mak maq song raa, wi ka wi maq song raa, jaq ka jaq maq song raa, hok ka hok maq song raa,

²⁵ wakhiim ka wakhiim maq song raa, ami ka ami maq song raa, mopung ka mopung maq song raa.

²⁶ “Kiimaq maiq weshi raq adiwe lo adi nyung lo kra amakpo na buk raüta, makpo ka tiiphok raüla, apaiq raq adiwe lo adi nyung lo ka amakpo tiiphoktaq kra song ma phemaq adise ka wase ma tiiwabaiq ratlo.

²⁷ Kiimaq apaiq raq adise wi ka tiidearok buk raüla, apaiq raq adise ka phemaq awisong ma wase miishe tiiwa baiq ratlo.

Atati Raq Arangho

²⁸ “Kiimaq minsaü saüla pongwe raq maiq weshi ra ka tiitsailaq thaü baiq raüla, kriika longmaq tiitsailaq thongbaiq chang. Kra ngam ka aphaq maimak. Shatmaq atatiwe ma mo tiiho ka raamak.

²⁹ Shatmaq kra minsaü saüla pongwe ka maiq thaüti dongdii kiimaq atati miimin hon tlam jeshe, shatmaq minpongwe ka banthü mak li thü raüta, kriima maiq ka tiitsailaq tiithaü baiq raüla, minsaü pongwe ka longmaq tiitsailaq tiiqbaiq chang kiimaq atatiwe kiimin tiitsailaq tiiqbaiq chang.

³⁰ Shatmiitiina, atatiwe ka apaiq miisaq tiichhii wan ato ke mimai nguta pho raüla, apaiq raq maiqto ka tri na ümchu kechang wa kra riikhaqli ke ratlo.

³¹ Kiimaq minsaü pongwe kriiraq maiq nose maiqwe se lo jechakse lo thaü raüta tsai raü min, tri ka kriisiili miraq.

³² Kiimaq kra mirsaü saüla pongwe raq, maiq diwe riimakla maiq di nyung thaü raüta tsatbaiq raüla, minsaü tatiwe raq dise tijongwe kiima kampho roqtsam maq tham kechang. Kiimaq minsaü saüla pongwe ka long maq tiitsailaq tiiq baiq raa.

³³ “Kiimaq maiq weshi ra raq hiq khobok pang chang kra linbaiq raüta, riimakla apaiq raq hiq khobok ka thü raüta panghü maq thü kha na, maiq minsaü saüla pongwe lo, kumtoq kaü lo ka kra mong na dea wa raüla,

³⁴ apaiq raq kra nyamse dea wantaq kriika athamke chang. Apaiq raq kra tham ka atatiwe ma kechang. Raüta ngam maa kriika apaiq rii she miraq.

³⁵ Kiimahali maiq weshi minsaü saüla pongwe raq maq weshi minsaü saüla pongwe ka thaü raüta tsaiki raüla, kra atatiwe nai kriiraq atrati saü pongwe kra asha riichang. Raüta kra kampho ka riiphea riingea chhaq rii phea chang. Kiimaq tsang nai raq amaati kra chum raüta ngam ka riiphea riingea chhaq riiphea phaq chang.

³⁶ Shatmaq kra minsaü saüla pongwe ka anok thaüti dongdii nguta sapshat dongdii, shatmaq atatiwe raq kra minpongwe ka aban raüta thümak raüla, apaiq raq minsaü tsattaq tatiwe ma atra minsaü pongwe maq atham kechang miraq, raüta apaiq raq amaati ka apaiq raq thüho mimai.