DUNGWVNC 1 - ASII LAKDAP Bible (BSI)

Israilnok Ka Ejip Mungti Raq Kai Tiichamchao Haihiito

¹ Jakob setiim apaiq rai loweatek raq achak asetiim nongnong sheaho raüta Ejip mung na laühotaq thun ka arthun ara riito.

² Reuben, Simeon, Lewi, Juda,

³ Isakar, Jebulun, Benjamin,

⁴ Dan, Naphtali, Gad, kiimaq Ashar riito.

⁵ Tsangshiq tlotli Jakob lai ala thun maiq ka roq miishi riito. Ase Joseph ka Ejip mung na asaükai kun she riito.

⁶ Rahiq pahea siwan jai she Joseph nai aphu anotiim thun kiimaq kra pat wa maiq ümchuwa sitaq kra wiita atsaishe riikito.

⁷ Shatmaq tsangshiq saü asetiim, Israilnok ka puwan raüta maiq ka pahea raham hiq ham she pu wanto. Kiimaq ningkun ajong aheng ahong ala siisaq Ejip mung ka tsangshiq nok riili mawanto.

⁸ Kiijiishe, hokhamwe anye ashi, Joseph manphan jam min sapmakwe kriishe hokham ma shongto.

⁹ Apaiq raq asenginok ma akha chongto, “Ara Israilnok arka maiq pahea rama hiq ma she pawanto. Kiimaq ahong ala koilang koilanok siisaq. Tsangshiq ka nashiq ma atiihai chang asi.

¹⁰ Chiq nai re dong raüla tsangshiq ka nashiq ma chiqse rewenok rai mopong wan miraq. Raüta namung ara mikhat dam. Raüta namung arwa molaü wan miraq. Nashiq raq tsangshiq ka pahea pu wan mak chang miitu phanshira lamlu tiidong chang.”

¹¹ Kra ningkhan she Ejip mungti raq tsangshiq tsaiji kra tiijom baiq ma nguta dikong rümtinok raq tsangshiq ma ningkun maq shiitep raüta jaqsham holai henghea she tiishamto. Israilnok raq Pithom chela nai Rameses chela hokhamwe ma rai awong thun lunke chang nyungchong chela kra teito.

¹² Shatmaq Ejip mungti raq Israilnok ka jamkho shiiniim shawantlaq tsangshiq ka pahea puwan wan khoti riito. Raüta tsangshiq ka Ejip mung na pahea nyam wan wan khoti riito. Ejip mungti ka Israilnok ma ahai she riito.

^13-14 Kiimaq tsangshiq raq Israilnok ma jaqsham ka henghea shiitep wan wan tsaija chhunja dikong ma tiija wanto. Tsangshiq raq Israilnok ma tsangshiqnok jam tiihaito kiimaq tsangshiqnok wak na jaq tiishamto. Kiimaq Israilnok ma mangchan ka akhiismin tiichhi kuqmak she haihü wanto.

¹⁵ Kiijiishe Ejip mung hokhamwe raq Hibrunok nyungre no wüchhi na achhü kamketi nyungnai Shiphra nai Pua ma akha chongto.

¹⁶ “Namnai raq Hibrunok nyungre ka nowüchhi na khrum kuqtlan akhing na, maiqwese la chii raüla, no ka atsea riibaiq ronglaq. Shatmaq jechakse la chii raüla, atra tiisi ronglaq.”

¹⁷ Shatmaq kra nowüchhi na achhü kamketi nyung nai ka Shiikeawe ma ahai. Kra ningkhan hokhamwe aming ka lang mak dea riito. Shatmaq tsangnai raq maiqwe sere chiitlaq kra atra tiisito.

¹⁸ Kra ningkhan hokhamwe raq achhü kamketi nyung nai ka tiihea kito. Raüta tsangnai ma akha waito, “Namnai raq ara jamlai wa klo holan? Namnai raq maiqwe sere chhiitlaq kra atra jaram wa tiisi tlan?”

¹⁹ Tsangshiq raq treto, “Hibrunok nyungre ka Ejip mungti nyungre ikhiika riimak. Tsangshiq raq no ka jeriiqriiq heali humtlo. Krai mren nainai ka tsangshiq phana misaüho hai shaq niili tsangshiq raq tsangsetiim ka chhiitlo.”

^20-21 Kra nochhü kamketi nyungnai raq Shiikeawe ma haisong tsantsii riimkha na, Shiikeawe ka tsangnai ma tsanhea riito kiimaq tsangnai ma maiqmii jamkun kuqto. Kiimaq Israilnok ka pahea puwan wan ruq she puwanto. Kiimaq ahong alanok ma jawanto.

²² Atiisup niishe hokhamwe raq asenginok tlotli ma aming ashi akha kuqto, “Hibrunok sere noshii setiim maiqwe sere chiitlaq kra doho lanta Nail Rai na baiqki rongkiq. Shatmaq jechaksere chiitlaq kriili atra misilaq.”