Nehemia 5 - Bibl Koad 21: Ar Bibl e Brezhoneg evit ar Vretoned

Pennad 5

¹ Bez' e voe ur c'hlemm bras a-berzh ar bobl hag o gwragez a-enep o breudeur Yuzev.

² Bez' e oa darn hag a lavare: Ni, hor mibien hag hor merc'hed a zo niverus, ra vo roet deomp ed evit debriñ ha bevañ.

³ Hag e oa darn all hag a lavare: Gouestlet hon eus hor parkeier, hor gwini hag hon tiez, evit kaout ed e-pad an naonegezh.

⁴ Hag e oa ivez darn all hag a lavare: Amprestet hon eus arc'hant evit tailhoù ar roue, war hor parkeier ha war hor gwini.

⁵ Ha koulskoude hor c'hig a zo evel kig hor breudeur, hag hor mibien evel o mibien. Ha setu e lakaomp hor mibien hag hor merc'hed da vezañ sklaved, ha dija darn eus hor merc'hed a zo sujet, hag ez omp dic'halloud, rak hor parkeier hag hor gwini a zo da dud all.

⁶ Pa glevis o c'hlemm hag ar c'homzoù-se, e voen kounnaret-meurbet.

⁷ Kemer a ris ar mennozh start da c'hourdrouz ar re vras hag ar renerien, hag e lavaris dezho: Prestañ a rit war gampi an eil d'egile! Hag e c'halvis a-enep dezho ur vodadeg vras.

⁸ Hag e lavaris dezho: Dasprenet hon eus, hervez hor galloud, hor breudeur Yuzev a oa bet gwerzhet d'ar broadoù, ha c'hwi a werzhfe hoc'h-unan ho preudeur? Ha deomp-ni e vefent gwerzhet? Hag e tavjont, ne ouezjont mui petra lavarout.

⁹ Hag e lavaris: Ar pezh a rit n'eo ket mat. Ha ne fell ket deoc'h kerzhout e doujañs hon Doue, kentoc'h eget bezañ dismegañset dre ar broadoù hon enebourien?

¹⁰ Me ivez, va breudeur ha va servijerien, hon eus prestet dezho arc'hant hag ed. Dilezomp, me ho ped, an dle-se.

¹¹ Daskorit dezho hiziv, me ho ped, o farkeier, o gwini, o gwez-olivez hag o ziez, hag ivez ar c'hantvet eus an arc'hant, eus an ed, eus ar gwin hag eus an eoul a c'houlennit diganto evel kampi.

¹² Hag e respontjont: Ni a zaskoro, ha ne c'houlennimp netra diganto, ober a raimp ar pezh a lavarez. Neuze e c'halvis an aberzhourien, evit ober dezho touiñ e raint hervez ar gomz-se.

¹³ Hag e hejis va dilhad, hag e lavaris: Ra hejo Doue evel-se eus e di hag eus e labour pep den na raio ket hervez ar gomz-se, ha ra vo evel-se hejet ha goullonderet. Hag ar vodadeg a-bezh a lavaras: Amen! Hag e veuljont an AOTROU. Hag ar bobl a reas hervez ar gomz-se.

¹⁴ Adalek an deiz ma voe gourc'hemennet din bezañ o gouarnour e bro Juda, adalek an ugentvet bloaz betek an eil bloaz ha tregont eus ar roue Artakserksez, e-pad daouzek vloaz, me ha va breudeur n'hon eus ket kemeret ar pezh a zo merket d'ar gouarnour.

¹⁵ Ar c'houarnourien a zo bet a-raok din a waske ar bobl, hag a gemere diganto bara ha gwin, en tu all da zaou-ugent sikl arc'hant, hag o servijerien zoken a rene war ar bobl. Met ne'm eus ket graet evel-se, en abeg da zoujañs Doue.

¹⁶ Ha lakaet em eus zoken va dorn e labour ar voger-mañ, ha n'hon eus prenet park ebet. Va holl servijerien a oa dastumet aze da labourat.

¹⁷ Hag ouzh va zaol e veze kant hanter-kant den, ar Yuzevien hag ar renerien, gant ouzhpenn ar re a zeue d'hor c'havout eus ar broadoù a oa en-dro deomp.

¹⁸ Ar pezh a veze fichet bemdez a oa: un ejen, c'hwec'h dañvad a-zibab, ha laboused; ha pep dek deiz e veze aozet a bep seurt gwin a-fonn. Ha gant kement-se ne'm eus ket goulennet ar pezh a zo merket d'ar gouarnour, rak al labour a veze pounner war ar bobl-se.

¹⁹ O va Doue! Az pez soñj ac'hanon, evit ober vad din, hervez kement am eus graet evit ar bobl-se.