Sant Lucas 4 - Bibl Koad 21: Ar Bibl e Brezhoneg evit ar Vretoned

Pennad 4 Temptadur Jezuz

¹ Jezuz, leuniet eus ar Spered-Santel, a zistroas eus ar Jordan hag a voe kaset gant ar Spered el lec’h distro;

² eno e voe temptet gant an diaoul e-pad daou-ugent devezh. Ne zebras netra e-pad an deizioù-se ha, goude ma voent tremenet, en doa naon.

³ Neuze an diaoul a lavaras dezhañ: Mar d-out Mab Doue, gourc’hemenn d’ar maen-mañ dont da vezañ bara.

⁴ Jezuz a respontas dezhañ: Skrivet eo: An den ne vevo ket gant bara hepken, met gant pep ger a zeu eus Doue.

⁵ An diaoul en kasas war ur menez uhel, a ziskouezas dezhañ en un taol holl rouantelezhioù ar bed,

⁶ hag a lavaras dezhañ: Reiñ a rin dit an holl c’halloud-se ha gloar ar rouantelezhioù-se, rak roet eo bet din hag e roan anezhañ da neb a fell din.

⁷ Mar daoulinez eta dirazon, dit e vo en e bezh.

⁸ Jezuz a respontas dezhañ: A-dreñv din, Satan! Rak skrivet eo: An Aotrou da Zoue a azeuli, hag eñ hepken a serviji.

⁹ Kas a reas anezhañ ivez da Jeruzalem, hag e lakaas anezhañ war lein an templ, hag e lavaras dezhañ: Mar dout Mab Doue, en em daol ac’hann d’an traoñ, rak skrivet eo:

¹⁰ Gourc’hemenn a raio d’e aeled kaout evezh ouzhit evit da ziwall,

¹¹ hag e tougint ac’hanout etre o daouarn, gant aon na stokfe da droad ouzh ur maen bennak.

¹² Jezuz a respontas dezhañ: Lavaret eo: Ne dempti ket an Aotrou da Zoue.

¹³ An diaoul, o vezañ echuet an holl demptadur, en em dennas dioutañ evit un amzer.

Jezuz dianzavet e Nazared

¹⁴ Jezuz a zistroas da C’halilea, dindan galloud ar Spered, hag ar vrud anezhañ a redas dre an holl vro tro-war-dro.

¹⁵ Kelenn a rae en o sinagogennoù hag e oa enoret gant an holl.

¹⁶ Jezuz a zeuas da Nazared e-lec’h ma oa bet savet hag a yeas, hervez e c’hiz, er sinagogenn d’an deiz sabad. Sevel a reas evit lenn.

¹⁷ Roet e voe dezhañ levr ar profed Izaia. O vezañ displeget al levr, e kavas al lec’h ma oa skrivet ennañ:

¹⁸ Spered an Aotrou a zo warnon, dre-se en deus va olevet da brezeg ar c’heloù mat d’ar beorien. Kaset en deus ac’hanon da yac’haat ar re o deus ar c’halon flastret, da embann an dieubidigezh d’ar re zalc’het ha distro ar gweled d’ar re dall, da gas diere ar re gwasket,

¹⁹ da embann bloavezh trugarezus an Aotrou.

²⁰ Goude bezañ pleget al levr hag e roet d’ar servijer, ec’h azezas. Daoulagad an holl er sinagogenn a selle pizh outañ.

²¹ Neuze en em lakaas da lavarout dezho: Hiziv eo peurc’hraet ar gomz-mañ eus ar Skritur hoc’h eus klevet

²² An holl a roas testeni dezhañ hag a voe souezhet eus ar c’homzoù a c’hras a zeue eus e c’henoù, hag e lavarjont: Ha n’eo ket hemañ mab Jozef?

²³ Eñ a lavaras dezho: Hep mar e lavarot din ar c’hrennlavar-mañ: Medisin, en em yac’ha da-unan. Gra ivez amañ, en da vro, kement hon eus klevet ac’h eus graet e Kafarnaoum.

²⁴ Met e lavaras: Me a lavar deoc’h e gwirionez, profed ebet n’eo degemeret mat en e vro.

²⁵ Me a lavar deoc’h e gwirionez, bez’ e oa kalz a intañvezed en Israel en amzer Elia, pa voe serret an neñv e-pad tri bloaz ha c’hwec’h miz ha pa c’hoarvezas un naonegezh vras dre an holl vro.

²⁶ Koulskoude Elia ne voe ket kaset da di hini anezho, nemet da di un intañvez eus Sarepta e bro Sidon.

²⁷ Bez’ e oa ivez kalz a dud lovr en Israel en amzer ar profed Elizea. Koulskoude hini anezho ne oa glanaet, nemet Naaman ar Siriad.

²⁸ Ar re holl a oa er sinagogenn, o klevout kement-se, a yeas droug enno.

²⁹ O vezañ savet, e kasjont anezhañ kuit eus ar gêr hag e lakajont anezhañ war lein ar menez ma oa savet o c’hêr warnañ, evit e deurel d’an traoñ.

³⁰ Met eñ, o tremen dre o c’hreiz, a yeas kuit.

Jezuz a gas ur spered hudur kuit

³¹ Hag e tiskennas da Gafarnaoum, kêr eus Galilea, hag e kelenne anezho d’an deizioù sabad.

³² Souezhet e oant eus e gelennadurezh, rak komz a rae gant galloud.

³³ Bez’ e oa er sinagogenn un den dalc’het gant ur spered a ziaoul hudur hag a grias gant ur vouezh uhel:

³⁴ A! Petra a zo etre ni ha te, Jezuz a Nazared? Ha deuet out evit hor c’holl? Gouzout a ran piv out: Sant Doue.

³⁵ Jezuz a c’hourdrouzas anezhañ o lavarout: Tav ha kae er-maez anezhañ. An diaoul, o vezañ e stlapet er c’hreiz, a yeas kuit anezhañ hep ober droug ebet dezhañ.

³⁶ Spontet e voent holl hag e lavarjont an eil d’egile: Petra eo ar ger-mañ? Gourc’hemenn a ra gant galloud ha nerzh d’ar speredoù hudur hag ez eont kuit!

³⁷ Hag ar vrud anezhañ a yeas e pep lec’h er vro tro-war-dro.

Jezuz a yac’ha mamm-gaer Simon

³⁸ O vezañ aet er-maez eus ar sinagogenn, eñ a yeas e ti Simon. Mamm-gaer Simon he doa ur gwall derzhienn hag e pedjont anezhañ eviti.

³⁹ O vezañ en e sav a-us dezhi, e c’hourc’hemennas d’an derzhienn, hag ez eas kuit diouti. Hi a savas raktal hag a servijas anezho.

Jezuz a yac’ha klañvourien e-leizh

⁴⁰ Pa voe kuzhet an heol, ar re holl o doa re glañv dalc’het gant meur a gleñvedoù o degasas dezhañ. Eñ a lakaas e zaouarn war bep hini anezho hag o yac’haas.

⁴¹ An diaouled ivez a yae er-maez eus kalz a dud, o krial hag o lavarout: Te eo ar C’hrist, Mab Doue. Met eñ o gourdrouzas ha ne lezas ket anezho da gomz, dre ma ouient e oa ar C’hrist.

⁴² Adalek ma teuas an deiz, ez eas er-maez d’ul lec’h distro. Ur bobl vras en klaskas hag a zeuas betek ennañ; hag e c’hoantajont en derc’hel evit n’o c’huitaje ket.

⁴³ Met eñ a lavaras dezho: Ret eo din ivez prezeg Aviel rouantelezh Doue d’ar c’hêrioù all, rak evit-se eo ez on bet kaset.

⁴⁴ Hag e prezege e sinagogennoù Galilea.