Adlezenn 34 - Bibl Koad 21: Ar Bibl e Brezhoneg evit ar Vretoned

Pennad 34 Marv Moizez

¹ Moizez a bignas eus plaenennoù Moab war menez Nebo, war-lein ar Pisga, a-dal da Jeriko. An AOTROU a ziskouezas dezhañ an holl vro,

² adalek Galaad betek Dan, holl vro Neftali, bro Efraim ha Manase, holl vro Juda betek mor ar c'huzh-heol,

³ ar c'hreisteiz, plaenenn traonienn Jeriko, kêr ar palmez, betek Zoar.

⁴ An AOTROU a lavaras: Setu ar vro am eus touet reiñ da Abraham, da Izaak, da Jakob, o lavarout: He reiñ a rin da'z lignez. Diskouezet em eus anezhi da'z taoulagad, met ned i ket enni.

⁵ Moizez, servijer an AOTROU, a varvas eno, e bro Voab, hervez ger an AOTROU.

⁶ Hag e sebelias anezhañ en un draonienn e bro Voab, a-dal da Vet-Peor. Ha den n'en deus anavezet e vez betek hiziv.

⁷ Moizez a oa en oad a gant ugent vloaz pa varvas; ne oa ket gwanaet e zaoulagad, ne oa ket tremenet e nerzh.

⁸ Mibien Israel a ouelas Moizez e-pad tregont devezh e maezioù Moab, ha deizioù-gouelañ kañvoù Moizez a voe peurc'hraet.

⁹ Jozue mab Nun a oa leuniet gant ar Spered a furnez, rak Moizez en doa lakaet e zaouarn warnañ. Mibien Israel a sentas outañ hag a rejont hervez m'en doa an AOTROU gourc'hemennet da Voizez.

¹⁰ N'eo biskoazh savet profed ebet en Israel evel Moizez, en devoa anavezet anezhañ an AOTROU dremm ouzh dremm,

¹¹ evit an holl sinoù ha mirakloù a gasas anezhañ an AOTROU d'ober e bro Ejipt, dirak Faraon, dirak e holl servijerien hag en e holl vro,

¹² hag evit an dorn kreñv hag ar spontoù bras a ziskouezas Moizez da zaoulagad Israel.