Adlezenn 24 - Bibl Koad 21: Ar Bibl e Brezhoneg evit ar Vretoned

Pennad 24

¹ P'en devo kemeret un den ur wreg ha dimezet dezhi, ma ne gav ken houmañ trugarez dirak e zaoulagad, dre m'en devo kavet enni un dra bennak mezhus, e lakaio dezhi en he dorn ur skrid a dorr-dimeziñ, hag he c'haso kuit eus e di.

² Pa vo aet kuit eus e di, e c'hello dont da vezañ gwreg da un den all.

³ Mar kasa anezhi ar pried diwezhañ-mañ, e lakaio dezhi en he dorn ur skrid a dorr-dimeziñ, hag he c'haso kuit eus e di, pe mar deu da vervel ar pried diwezhañ-mañ en deus he c'hemeret evit e wreg,

⁴ he fried kentañ, an hini en deus he c'haset kuit, ne c'hello ken hec'h adkemer evit e wreg, goude ma vo bet saotret, rak un euzhusted e vefe dirak an AOTROU, ha ne lakaio ket da bec'hiñ ar vro a ro dit an AOTROU da Zoue evel hêrezh.

⁵ P'en devo kemeret un den ur wreg nevez, ne yelo ket d'ar brezel ha ne vo lakaet warnañ karg ebet; diskarget e vo e-pad ur bloaz en abeg d'e diegezh, hag e laouenaio ar wreg en devo kemeret.

⁶ Ne vo ket kemeret e gouestl an daou vaen eus ur vilin, nag ar maen-reder, dre ma vefe kemer e gouestl ar vuhez hec'h-unan.

⁷ Pa vo kavet un den en devo laeret unan eus e vreudeur, eus mibien Israel, ha m'en devo graet ur sklav dioutañ pe gwerzhet anezhañ, al laer-se a varvo. Evel-se e vo lamet an droug diouzh da greiz.

⁸ Diwall diouzh gouli al lorgnez, evesha mat ha gra kement a gelenno deoc'h an aberzhourien, al Levited, evesha d'ober evel ma em eus gourc'hemennet dezho.

⁹ Az pez soñj eus ar pezh a reas an AOTROU da Zoue da Vari war an hent, pa'z ejoc'h kuit eus an Ejipt.

¹⁰ Pa bresti un dra bennak da'z nesañ, ned i ket en e di evit kemer e gred,

¹¹ en em zerc'hel a ri er-maez, hag an den a bresti dezhañ a zegaso dit ar c'hred er-maez.

¹² Mard eo un den paour, ne gouski ket gant e gred,

¹³ ne vanki ket da reiñ dezhañ ar c'hred en-dro da guzh-heol, evit ma kousko en e zilhad ha ma vennigo ac'hanout. Kement-se a vo kontet dit da reizhder dirak an AOTROU da Zoue.

¹⁴ Ne heskini ket ar mevel paour hag ezhommek, a-douez da vreudeur pe a-douez an diavaezidi a vo ez pro hag e-barzh da zorojoù.

¹⁵ E c'hopr a roi dezhañ en deiz memes, a-raok ma kuzho an heol, rak paour eo hag e ene a c'hortoz kement-se. Krial a rafe etrezek an AOTROU a-enep dit, hag e vefe ur pec'hed evidout.

¹⁶ Ne vo ket lakaet d'ar marv an tadoù evit ar vibien, ha ne vo ket lakaet d'ar marv ar vibien evit an tadoù; lakaet e vo d'ar marv pep hini evit e bec'hed.

¹⁷ Ne gemmo ket barnedigezh un diavaeziad, nag hini un emzivad, ha ne gemeri ket e gouestl dilhad un intañvez.

¹⁸ Dalc'h soñj ez out bet sklav e bro Ejipt, hag en deus dasprenet ac'hanout an AOTROU da Zoue, setu perak e c'hourc'hemennan dit ober an traoù-se.

¹⁹ Pa ri da eost e-barzh da bark hag az po ankounac'haet ur feskenn er park, ne zistroi ket d'he c'herc'hat, evit an diavaeziad, evit an emzivad hag evit an intañvez e vo, evit ma vennigo ac'hanout an AOTROU da Zoue e kement a ri gant da zaouarn.

²⁰ Pa heji da olivez, ne zistroi ket da sellout skourr ha skourr, evit an diavaeziad, evit an emzivad hag evit an intañvez e vo.

²¹ Pa vendemi da winienn, ne zastumi ket war da lerc'h, evit an diavaeziad, evit an emzivad hag evit an intañvez e vo.

²² Dalc'h soñj ez out bet sklav e bro Ejipt, setu perak e c'hourc'hemennan dit ober an traoù-se.